Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
ОЗНОМАМОРОТ
Глава 140
Азоро, ванстомак авиде кинть лангс понгомадо!
Давидэнь псалмась.
1Азоро! Тонь тердян, капшак монень!
Марик озномань вайгелем, зярдо тердян Тонь.
2Монь озномам улезэ теке тантей сувтамо*а Тонь икеле,
монь кедень кепсемась – теке чокшнень анокс.
3Путт, Азоро, монь кургонтень ванстыця
ды онкстик монь келенть.
4Иля мере монь седеентень човоргадомс зыянов тевс.
Илязан тее мезеяк берянь
зыянонь теицятнень марто вейсэ.
Илязан уле сынст ютксо мельвитема тевсэст.
5Кадык видечинь ломанесь панды монень чумо –
те седеймарямо.
Кадык сон ливти эйсэнь лангс –
те сехте паро елей, кона а теи зыян монь прянтень.
Кадык ансяк лоткавтовлизь зыяновтне зыянов тевест –
вана мезень кисэ мон свал ознан.
6Зярдо сынст прявттнэ улить ёртозь кевпандо прясто,
сестэ сынь чарькодьсызь:
монь валон ульнесть видеть.
7Кода сокить мода, истя минек эйсэ яжить,
истя певерить минек ловажанок тоначинь отьманть кургос.
8Азоро, Азоро, Тонь лангс, мон ванан.
Тонь лангс кеман-нежедян.
Илямак кадо монь!
9Ванстомак монь кундамкатнеде, конат путозь монень.
Идемак зыянонь теицятнень эйстэ.
10Зыяновтне понгить эсест кундамкатнес,
мон вана а понган, ютан вакскаст.
*а 140:2 сувтамс – нолдамс ладанонь чине
Глава 140
