Выбрать язык
Книги Ветхого Завета
Книги Нового Завета
с русским текстом1Моравтомань ветицянтень. Струна марто седямопельсэ. Давидэнь тонавтомазо.
2Пазом, марик монь озксом
ды иля кекше озномадон-энялдомадон.
3Кунсоломак-марямак монь
ды ёвтак тень каршо вал.
Мон кувсян эсень мелявкстнэде
ды ранган-авардян
4душманонь вайгельденть,
зыяновтнень лепштямодонть.
Сынь кучить монь лангс зыян
ды кежень пачк, апаро валсо, сёвныть-пазить эйсэнь.
5Седеем потсон сорны,
куломань тандавкст каявсть лангозон.
6Пелема ды талнома саимизь монь,
тандадома тапардымим монь.
7Ды мон меринь:
”Улевельтькак гулькань кондят сёлмон,
сестэ мон туевлинь ливтязь
ды муевлинь оймамо тарка.
8Мон оргодевлинь васов-васов
ды кадовлинь чаво модас.
9Капшавлинь муеме кекшема тарка
кежей вармадо ды даволдо”.
10Азоро! Калавтыть сынст арсемаст,
тапить-човорить сынст келест!
Мон неян ошсонть виев нарьгамот
ды сёвномат-пелькстамот.
11Читькак, ветькак яксить сынь ошпирявттнэнь ланга.
Зыянов тевть ды кажот те ошсонть.
12Сонзэ потсо ёмамочи.
Лепштямотне-пансематне ды манчематне
а тукшныть сонзэ кужостонть.
13Аволь душманось покорды монь –
тень мон, нама, кирдевлия-цидярдовлия.
Аволь каршон аштицясь кепси прянзо икелень –
сондензэяк мон кекшевлинь.
14Те тон покордат монь, монь кондямось,
кона ульнесь монь ялгакс ды малавиксэкс,
15кона марто минь седейшкава кортнилинек
ды яксилинек вейсэ Пазонь кудов.
16Сынст лангс каявозо кулома, соваст живстэ тоначис.
Кудовасткак, ютковасткак зыянов тевть.
17Мон вана тердьса Пазонть,
ды Азорось идесамам монь.
18Чокшне, валске ды чинь куншкат
ознан ды пеняцян-ранган.
Сон марясы монь вайгелем.
19Сон идесы-олякстомтсы сэтьмес монь оймем,
ванстасамам каршон тюрицятнеде,
эдь сындест пек ламо.
20Пазось монь марясамам,
пингеде пингес Инязорокс аштицясь сэтьмелгавтсынзе сынст.
Эйсэст арасть кодаткак полавтовомат.
Сынь а пелить Паздонть.
21Сынь кепедизь кедест сетнень лангс,
конат мартост ладильть.
Сынь колызь эсест валост-ладямост.
22Сынст валост ойде валанят –
ансяк седейсэст кирдить тюрема.
Валост елейде соланят-валанят –
ансяк сынь теке пшти торот.
23Путыть Азоронть лангс эсеть ризксэть-мелявксот,
ды Сон ули теть кеме нежекс.
Сон зярдояк а максы чатазевемс видечисэнтень.
24Пазом, нолдасыть-валгстасыть сынст
куломань-ёмамонь латкос.
Верень валыцятне ды манчицятне
а эрясызь эсест читнень пелевидьскак.
А вана мон, [Азоро,] кеман-нежедян Тонь лангс.
Шнамо
Глава 54