Выбрать язык
Книги Ветхого Завета
Книги Нового Завета
с русским текстом1Азоро, Тонь лангс кеман-нежедян,
илязан уле мон зярдояк совавтозь визьксчамас!
2Идемак ды олякстомтомак монь Эсь видечить коряс.
Чиремтик пилеть монь ёнов ды идемак-менстемак монь.
3Ульть монень ошпандокс*а,
козонь мон свал кекшевлинь.
Тон кармавтыть идемс монь,
Тон – монь кевпандом ды кекшема таркам.
4Пазом! Менстемак монь зыяновонть кедьстэ,
койтементь ды лепштицянть кедьстэ.
5Эдь Тон монь седейнежедьксэм!
Азоро Пазом, Тонь лангс кеман-нежедян од шкасто саезь.
6Тон ульнить монень нежекс чачома шкастон,
Тон таргимик монь авань пекестэ.
Тонь шнамодот мон а лотксян.
7Ламонь туртов мон ульнинь дивань невтемакс.
Ансяк Тон – монь кемевикс кекшема таркам.
8Монь кургом пештязь Тонь шнамосо,
[секскак шнан Тонь моразь]
ды эрьва чистэ пачтян-моран Тонь инемазычидеть*б.
9Илямак кадо монь сыречистэнь,
илямак ёрто монь, зярдо машты вием.
10Эдь монь душмантнэ апаро валт ёвтыть мондень,
ды оймень мельга пансицятне кортыть эсь ютковаст:
11«Пазось кадызе сонзэ.
Азёдо мельганзо ды кундынк сонзэ,
эдь кияк а лезды тензэ».
12Пазом! Иля аште васоло монь эйстэ!
Монь Пазом! Капшак лездамо тень.
13Улест совавтозь визьксчамас
ды ёмаст монь каршо стякшныцятне.
Вельтявост визькссэ ды покордамосо
монень зыянонь вешницятне!
14Мон жо свал карман нежедеме [Тонь лангс]
ды яла седе пек ды седе пек карман Тонь шнамот.
15Монь кургом карми ёвтнеме Тонь видечидеть,
эрьва чистэ пачтямо Тонь идема тевтнеде, –
а содангак зяро эйстэст.
16Ёвтнян Азоро Пазонть ине тевтнеде,
ледстяса Тонь видечить – ансяк Тонсенть.
17Пазом! Тон путымик превс од пингестэнь саезь,
ды течис мон пачтнян Тонь дивань тевтнеде.
18Сыредемазон ды шержейгадомазон
илямак кадо монь, Пазом,
зярс а ёвтнян Тонь вийдеть те пингень ломантненень
ды Тонь нардевчидеть весе икелепелев сыцятненень.
19Тонь видечить, Пазом, пачкоди менеленть видьс.
Ине тевть теить Тон, Пазом.
Кие ули Тонь кондямо?
20Тон кучнить лангозон ламо ды пек кежей зыянт,
ансяк тагояк Тон вельмевтилимик
ды модань отьматнестэ таргилимик.
21Тон кепедилимик монь ды оймавтылимик,
[ды модань отьматнестэ таргилимик].
22Истя монгак карман шнамо Тонь лирасо,
карман шнамо Тонь видечить, Пазом.
Карман морамо Теть арфасо, Израилень Иневанькс.
23Кенярксов морот монь кургосо,
зярдо мон моран Тонеть,
ды кишти-моры монь оймем,
конань Тон идик-менстик.
24Монь келем эрьва чистэ карми ёвтнеме Тонь видечидеть,
эдь визделгавтозь ды покордазь сетне,
кить арсить-вешнить монень зыян.
*а 70:3 ошпандо – замок, дворец, крепость на горе
*б 70:8 инемазычи – великолепие
Глава 70