Выбрать язык
Книги Ветхого Завета
Книги Нового Завета
с русским текстомАсафонь тонавтомазо.
1Монь раськем, кунсолык монь превс путомам,
весе маринк монь ёвтавт валтнэнь.
2Ушодан тенк ёвтнеме валвелявкссо
ды карман кортамо кезэрень шкань салавачитнеде.
3Мезе маринек минь ды карминек содамо,
ды мезе минек тетятне-покштятне ёвтнесть миненек,
4тень а сёпсынек сынст эйкакштнеде-нуцькатнеде.
Ёвтнетяно сыця шкань ломантненень Азоронть инексчидензэ,
Сонзэ вийдензэ ды дивань тевдензэ,
конатнень Сон теинзе.
5Сон ёвтызе Эсь мелензэ-валонзо Иаковнень
ды максызе Коенть Израилентень.
Сон кармавтынзе минек тетятнень
пачтямс те Коенть эйкакшост туртов.
6Кадык содасызь сыця шкань буесь,
эйкакштне, конат чачить,
ды кадык сыньгак эсь шкасто ёвтнесызь
те Коенть эсест эйкакштненень.
7Кадык сынь нежедить Пазонть лангс
ды а стувтыть Пазонь тевтнень,
ды топавтыть Сонзэ кармавтовкстнэнь.
8Сынь иляст уле тетяст кондят,
а кунсолыцят ды каршо стякшныцят,
конат эзть кеме-нежеде Пазонть лангс весе седейсэст,
конат оймесэст икелензэ авидельть.
9Ефремень цёранзо, налчирькенек-мезнек, ледницят,
тюрема чистэ потасть-оргодсть.
10Сынь эзизь вансто Пазонь вейсэньлувонть,
лоткасть топавтомо Сонзэ Коенть.
11Сынь стувтызь весе Сонзэ тевтнень ды тамашатнень*а,
конатнень Сон тенст невтинзе.
12Пазось тейнесь тамашат минек тетятнень икеле
Египетэнь модасо, Цоан лайменть лангсо.
13Сон явизе иневеденть, ютавтынзе сынст сонзэ трокс
ды кармавтынзе ведтнень аштеме стенакс.
14Чить Сон ветясь сынст пельсэнть,
веть – толонь валдосонть.
15Чаво модасо Сон лазнызе кевпандонть
ды теке потмакстомо отьмасто явавтсь сынст симемаст.
16Кевпандостонть Сон ливтсь чудикерькст
ды ведтнень кармавтынзе чудеме леекс.
17Сынь жо поладсть пежетев тевест Сонзэ икеле
ды лоткасть кунсоломо Верепазонть чаво модасо.
18Сынь нернесть Пазонтень,
вешсть тантей ярсамопель эсест оймест коряс.
19Сынь покордасть Пазонть, истя кортазь:
«Машты-арась Пазось анокстамо
чаво модасо столь ярсамопель марто?
20Алкукс, Сон вачкодсь кевс, ды чудезевсть ведтне,
ды валозевсть чудикерькстнэ.
Ансяк машты-арась максомо кшияк?
Машты-арась анокстамо
Эсензэ раськентень сывелень ярсамопель?»
21Азорось маринзе ды кирвазсь кежсэ,
ды толозо палозевсь Иаковонь лангсо,
кежезэ прась Израиленть лангс
22сень кисэ, мекс эзть кеме Пазонтень
ды эзть кеме-нежеде Сонзэ идеманть лангс.
23Сон кармавтсь вере пельтненень
ды панжинзе менелень кенкштнень.
24Ды пиземекс валсь лангозост ярсамопелекс манна,
истя макссь тенст менелень кши.
25Ангелэнь кшиденть ярсасть ломантне.
Сон кучсь тенст ярсамопель пешкедемазост.
26Сон сыремтсь-кепедсь менельсэ чилисемань варма
ды обедъёнксонсенть пувавтызе Эсензэ вийсэ.
27Теке пуль Сон пизевтсь-правтсь лангозост менельстэ сывель,
теке иневедень чувар – толгав нармунть.
28Сон ёртызе сывеленть аштема тарказост,
коцткудост перька.
29Ломантне ярсасть ды пешкедсть.
Пазось макссь тенст сень, мезес сынь бажасть.
30Сынст мелест ялатеке эзь топавтовкшно,
кургост яла пешксельть ярсамопельде,
31зярдо Пазонь кежесь сась лангозост.
Сон маштынзе сынст вадрятнень-шумбратнень,
правтынзе Израилень од ломантнень.
32Ды сестэяк сынь яла тейнесть пежетть
ды эзть кеме Сонзэ дивань тевтнес.
33Секс Сон ёмавтынзе чист варма ялтокс
ды ютавтынзе иест пелемасо-тандалемасо.
34Зярдо Сон маштнесь сынст,
сестэ сынь кармасть вешнемензэ ды велявтомо Тензэ.
Ансяк ашолгадыль, сынь пшкалесть Пазонтень.
35Сынь ледстнесть:
Пазось – сынст кекшема таркаст.
Пазось, Верепазось, – сынст Идицяст-Менстицяст.
36Ансяк сынсь ёжов кургосост савтсть Сонензэ
ды эсест кельсэст кенгелесть Тензэ.
37Седеест ульнесть а видеть Сонзэ икеле,
ды сынь колсесть Сонзэ вейсэньлувонть.
38Сон, Седеймарицясь, нолдылинзе пежетест
ды эзь маштне-чавно сынст.
Сон ламоксть мадстнесь Эсь кежензэ ды эзь азаргале.
39Сон эзь стувтне: сынь ансяк ломанть, варма ялт,
кона туи ды а велявты мекев.
40Зяроксть сынь стякшность Сонзэ каршо чаво модасо
ды савтсть Сонзэ кежензэ эрицявтомо таркасо!
41Сынь таго варчавтнесть*б Пазонть
ды покордасть Израилень Иневаньксэнть.
42Эзть кирде мельсэ Сонзэ идиця кедензэ,
чинть, зярдо Сон менстинзе сынст лепштямодонть,
43зярдо Сон теинзе Эсензэ дивань тешкстнэнь Египетсэ
ды Эсензэ тамашатнень Цоан лайменть лангсо.
44Сон теинзе Египетэнь лейтнень ды чудикерькстнэнь верекс:
иляст маштово сынь египетэнсетненень симемапелекс.
45Сон кучсь египетенсетнень лангс сеськеть-маравт, сынст пупсемга,
ды ватракшт, весементь сэвемга-маштнемга.
46Сынст касовкстнэнь Сон максынзе сукстнэнень
ды важодемань тевест – тастотненень.
47Винаумарь*в пирест Сон чавинзе цярахмансо
ды инжирэнь чувтост вельтинзе эйсэ.
48Сынст ракшатнень Сон чавинзе цярахмансо
ды сынст стадатнень – ёндолсо.
49Сон кучинзе лангозост Эсензэ кежень пси толкеленть,
ацирьгадоманть, весе азарсьчинзэ ды кажонть,
куловтыця ангелтнэнь пувозонть*г.
50Сон панжизе кинть Эсензэ кежентень,
эрямост эзинзе вансто
ды максынзе сынст ракшатнень куломань ормас.
51Сон маштынзе Египетсэ весе васенце чачозь цёратнень,
Хамонь коцткудотнесэ – неть цёрань виень ушодкстнэнь.
52Мейле Сон реве ваныця ладсо ливтизе Эсензэ раськензэ
ды ветясь сынст, кода стада, чаво модава.
53Сон ветясь сынст ванстозь,
ды сынь ютасть апак пеле.
А вана сынст душмантнэнь вельтинзе иневедь.
54Сон ветинзе сынст Эсензэ иневанькс масторс,
се пандонть лангс, конань саизе Сонзэ виев вить кедезэ.
55Израилень буетнень икельде Сон панинзе лия раськетнень,
модасткак явинзе-максынзе израиленсетненень,
эрямояк озавтынзе кудоваст.
56Сынь ялатеке варчавтнесть ды покордасть Верепазонть
ды эзть вансто Сонзэ койтнень.
57Сынь потасть ды ульнесть акемевикст, кода сынст тетяст,
теевсть амаштовиксэкс, кода берянь налчирьке.
58Сынь коласть Пазонть ёжонзо эсест репештясост*д
ды сыремтсть Сонзэ кежензэ
чачо марто эсест керсевкстнэсэ, конатненень озность.
59Теде содазь, Пазось кирвазсь кежсэ
ды допрок велявтсь Израиленть эйстэ.
60Сон кадызе Силомсо эрямо тарканзо, Эсензэ коцткудонзо,
конасонть эрясь ломантнень ютксо.
61Сон максызе полонс Эсензэ вейсэньлувонь озпаргонть,
душманонь кедьс – Эсензэ инексчинь тешксэнть.*е
62Торо алов Сон максызе Эсензэ раськензэ
ды пек кеждясь Эсензэ ломантнень лангс.
63Сонзэ од цёратнень сэвсь тол,
ды сонзэ тейтертненень эзть мора венчамонь морот.
64Сонзэ озатятне*ж пракшность тородо,
ды сонзэ доватне киньгак эзизь лайше.
65Ды вана, теке удомсто, сыргозсь Азорось,
теке винасо матедевтезь мараля*з.
66Сон сеске панинзе Эсензэ раськень душмантнэнь,
совавтынзе сынст пингеде пингень визьксэс.
67Сон кадызе Иосифень коцткудонть
ды эзизе кочка Ефремень буенть.
68Сон кочкизе Иудань буенть,
Сион пандонть, кона вечкевсь Тензэ.
69Тосо Сон теизе Эсензэ иневанькс эрямо тарканзо сэреекс, кода менель,
ды кемекстызе сонзэ пингеде пингес, кода моданть.
70Сон кочкизе Давидэнь, Эсензэ уренть,
ды саизе сонзэ ревень стадань ваномсто.
71Сень, кие вансь реветнень-вирезтнэнь мельга,
Пазось саизе вана мекс:
кадык сон карми ваномо Сонзэ раськензэ, Иаковонть мельга,
Сонзэ ломантнень, Израиленть мельга.
72Ды сон вансь сынст мельга ванькс седейсэнзэ
ды ветясь сынст превейстэ.
Шнамо
*а 77:11 тамаша – чудо
*б 77:41 варчавтнемс – искушать
*в 77:47 винаумарь – виноград
*г 77:49 пувоз – рой
*д 77:58 репештя – кезэрень ознома тарка
*е 77:61 вейсэньлувонь озпарго – ковчег завета; инексчинь тешкс – знак славы
*ж 77:64 озатя – священник
*з 77:65 мараля – богатырь, исполин
Глава 77