Выбрать язык
Книги Ветхого Завета
Книги Нового Завета
с русским текстом1Моравтомань ветицянтень. «Шошанним-Эдуф»△ седямопель марто. Асафонь псалмась.
2Израилень Ваныця! Марямизь минек!
Тон, кона вети Иосифень цёратнень,
кода Эсеть ревень стаданть,
Тон, херувимтнень велькссэ, инеэзем лангсо озадо аштиця,
невтик Эсь сияждомат.
3Ефремень, Вениаминэнь ды Манассиянь буетненень
невтик Эсеть виеть ды сак минек идеме.
4Пазом! Одов теемизь минек истямокс,
кодат ульнинек,
кадык сияжды Тонь чачот миненек,
ды минь идевтяно!
5Азоро, менелень вийтнень Паз!
Зярс кармат кежиявтнеме
ды а марямо Тонь раськеть озноматнень?
6Тон андыть сынст кшинь таркас мелявкссо
ды симдить сынст алоткавикс сельведьсэ.
7Тон теимизь минек сёвнома таркакс шабранок туртов,
ды минек душмантнэ нарьгить лангсонок.
8Менелень вийтнень Паз!
Одов теемизь минек истямокс,
кодат ульнинек,
кадык сияжды Тонь чачот миненек,
ды минь идевтяно!
9Тон кандык Египетстэ винаумарьксэнть*а,
панить лия раськетнень
ды озавтык сонзэ те таркантень.
10Тон анокстыть сонензэ тарка,
сон нолдась корёнт-ундокст
ды раштась моданть келес.
11Пандотне вельтявсть сонзэ сулейсэ
ды сэрей кедратне – сонзэ тарадсонзо.
12Сон нолдынзе тарадонзо иневедь видьс
ды эсензэ од лисевксэнзэ – леенть видьс.*б
13Мекс Тон калавтык пирявксонзо?
Ней весе, кить ютыть киланга,
сезнить умарензэ.
14Вирень идем тувось сокари корёнонзо,
паксянь идем ракшась порни керензэ.
15Менелень вийтнень Паз!
Велявтт эно минек ёнов,
варштак менельстэ ды вант,
ды явт мель те винаумарьксэнтень.
16Ванстык сень, мезенть озавтызе Тонь виев вить кедеть,
лисевксэнть, конань Тон кастык-кемекстык Эстеть.
17Душмантнэ пултасть сонзэ толсо ды керизь.
Кадык сынь ёмить-кулыть Тонь тандавтыця вановтот эйстэ.
18Кадык Тонь кедеть ули ванстыцякс
вить кедеть ёно аштицянть лангсо,
ломанень цёранть лангсо,
конань Тон кастык Эстеть.
19Сестэ минь а потатано Эйстэть.
Вельмевтимизь,
ды минь карматано тердеме Тонь леметь.
20Азоро, менелень вийтнень Паз!
Одов теемизь минек истямокс,
кодат ульнинек.
Кадык сияжды Тонь чачот миненек,
ды минь идевтяно!
*а 79:9 винаумарькс – виноград (растение)
*б 79:12 Тесэ иневедь – Модакуншкань (Средиземной) иневедь ды лей – Евфрат лей.
Глава 79