Выбрать язык
Книги Ветхого Завета
Книги Нового Завета
с русским текстом1Кие кежейгали-назойгали мурнемань-тонавтомань марямсто,
се вейке липкес сявори ды уш а идеви.
2Зярдо прявтсо аштить видечисэтне – раськесь кенярды,
зярдо покшокс арыть пазтомотне – ломантне кувсить.
3Кие вечки покш превейчи, се кенярдовты тетянзо.
Кие чийни усксевиця тейтерьава мельга, се ёмсевти ули-паронзо.
4Видестэ судиця инязорось масторонть кирди-кемексты,
казнень-каявксонь вечкицясь сонзэ сравтни-калавтни.
5Кие кельсэнзэ савты ялганстэнь,
се сонзэ пильге алов ацы алтыма.*а
6Зыяновонтень кундамкась – эсь пежетезэ,
видечисэсь эри олячисэ ды кенярдозь.
7Видечисэсь пек домкасто ванкшны кажовтнень судямо тевест.
Пазтомось сыненст тунь мель а яви.
8Ломантнень вейке-вейке лангс узавтницятне кепедстить ошсонть аладямот,
пек превейтне оймавтыть кепсевематнень.
9Зярдо пек превеесь ушоды судямонь тевть превтементь марто,
тонась азаргали эли пеедькшни – ялатеке оймамо а ули.
10Верень валыцятне вельть а вечксызь асатыкстэме ломаненть,
видечисэтне мелявтыть сонзэ кисэ.*б
11Превтемесь лангс ливти весе кежензэ,
пек превеесь эйсэст кекши.
12Зярдо прявтось кунсолы кенгелемань валт,
сестэ весе сонзэ важотнеяк кармить зыяновт.
13Кажовось ды лепштицязо аравтовить рядсек:
тень ды тонань сельметненень валдонть максы Инешкипазось.
14Зярдо инязорось кажовтнень суди видечинь лувсо,
сестэ сонзэ инязорксчись кемекстави свалшкас.
15Илевесь ды мурнемась-тонавтомась максыть превейчи.
Вановттомо кастозь цёрась аванзо совавтсы визьксчамас.
16Пазтомотнень ламолгадомаст марто ламолгали койтемечись,
видечисэтненень максови неемс сынст прамост-ёмамост.
17Цёрат путт превс казямосто ды улят кисэнзэ оймазь.
Сон карми улеме тонеть седей кенярксокс.
18Косо арась верде максозь неявкс-тешкс – раськесь апак онкстя.
Кодамо уцяскав се, кие топавты Коенть!
19Уресь ансяк веень валсо превс а путови,
куш сон чарькоди сынст, ялатеке мельс а сайсынзе.
20Тон некшнить ломань, кона корты апак арсе? –
Натой чаволанть лангс кемемась седе покш.
21Бути уренть вишкинестэ саезь трямс-кастомс кольневтезь,
мейле сон саи мель улемс азоронь цёракс.*в
22Кежейгалиця ломанесь кирвазти сёвномат,
ацирьгалицясь теи ламо пежетть.
23Прянь верьга кандыцясь ули покордазь,
сэтьментень максови инексчи-арнема*г.
24Кие салыцянтень ялга, се эсензэ туртов ят.
Эдь сон мари, кода судсо сюдыть салыцянть, ансяк чатьмони.*д
25Ломанде пелицясь эри теке алтымас кундазь,
Инешкипазонть лангс кемицясь – апелема таркасо.
26Ламот вешнить паро мелень путома прявтонть ёндо,
куш виде судямось – ансяк Инешкипазонть пельде.
27Кода видечисэсь нулгоди зыянонь теицядонть,
истя пазтомось нулгоди виде киява ютыцядонть.
*а 29.5 сонзэ пильге алов – эли: эсензэ пильге алов. Алтыма – сеть.
*б 29.10 Эли: видечисэтнень бажить маштомс.
*в 29.21 Эли: паросо те а прядови.
*г 29.23 арнема – уважение, почитание.
*д 29.24 Истямо чатьмонемась – пежеть. Вант Левит 5.1-6.
Глава 29