Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
9 Псалом
1 Сьыліссезӧн веськӧтлісьлӧ. Лабен кулӧ́м бӧрын. Давидлӧн псалом.2 Дӧсвидзисьӧ, ме ошка Тэнӧ быдсӧн сьӧлӧмнам.
Висьтася Тэнат адззывлытӧм керӧ́ммез
*а йылісь.
3 Тэ сетан меным радъявны да гажӧтчыны.
Медвылісьӧ, ме сьылӧта Тэнчит нимтӧ.
4 Ме вылӧ лэбтісьӧммес бӧр бергӧтчасӧ да пышшасӧ,
Тэнат син одзын нія падмасӧ да куласӧ.
5 Веськыта Судитісь, Тэ юрала́н пукӧ́с
*б вылӧ пуксин,
менчим судсӧ веськыта чулӧтін да менӧ дорйин.
6 Му вылісь отиррез вылӧ Тэ лӧгасин,
Ентӧг оліссезлісь Тэ ола́ннысӧ орӧтін.
Нылісь нимсӧ тӧдвылісь пыр кежӧ чышкин.
7 Ме вылӧ лэбтісиссезлӧн эз ло тышкася́ныс
*в.
Нылісь карресӧ
*г Тэ разин,
и некин нійӧ оз видз тӧдвылын.
8 Но Дӧсвидзисьыс пыр олӧ.
Судсӧ чулӧтны Ассис юрала́н пукӧ́ссӧ Сія лӧсьӧтіс.
9 Ола́н мусӧ Сія пондас судитны веськыта,
отирресӧ ─ асланыс олӧ́м-керӧ́м сьӧрті.
10 Дзескӧтӧм мортлӧ Дӧсвидзисьыс ─ дзебсисянін
*д,
дзебсисянін ─ сьӧкыт кадӧ.
11 Дӧсвидзисьӧ, Тэнчит нимтӧ тӧдіссес
пондасӧ надейтчыны Тэ вылӧ,
Тэ эд он коль отсӧттӧг Тэнӧ кошшиссесӧ.
12 Сьылӧ Дӧсвидзисьлӧ, Сион вылын Олісьлӧ!
Сылӧн керӧ́ммез йылісь отиррезлӧ висьтасьӧ.
13 Морт вийиссезлӧ кисьтӧм вир понда Сія вештісьӧ,
оз вунӧт,
дзескӧтӧм
*е отирлісь герьясьӧ́мсӧ тӧдвылас видзӧ.
14 Дӧсвидзисьӧ, ло ме дынӧ небыт сьӧлӧма.
Видзӧт, кыдз ме песся-мырся ны кузя,
кӧдна ме вылӧ синӧн видзӧтны озӧ вермӧ.
Кулӧ́мсис, шойна
*ж дорсис Тэ менӧ лэбтан.
15 Сэк ме понда ошкыны Тэнӧ
Сион нывлӧн
*з ыбӧссэз дынын.
Понда гажӧтчыны,
Тэ эд менӧ мездін.
16 Отиррез усисӧ ямаӧ,
кӧдӧ асьныс жӧ гарйисӧ.
Асланыс сувтӧтӧм кыйся́нӧ
*и коккезныс каттисисӧ.
17 Дӧсвидзисьӧс тӧдан Сылӧн веськыта судитӧ́м сьӧрті:
Ентӧг олісьыс сюрӧ аслас киэзӧн керӧм кыйся́нӧ.
18 Ентӧг оліссес ась быдӧнныс
сюрӧны кулӧммез коласӧ ─
отиррез, кӧдна вунӧтісӧ Енсӧ.
19 Корись морт эд оз ло пыр кежӧ вунӧтӧм,
умӧля олісьлӧн надеяыс нач оз быр.
20 Лэбтісь, Дӧсвидзисьӧ!
Мортыс ась оз лэбты асьсӧ Тэсся вылынжыка!
Ачыт судит отирресӧ!
21 Дӧсвидзисьӧ, ӧддьӧн повзьӧт нійӧ,
медбы тӧдісӧ ─ нія эд дзир морттэз.
22 Дӧсвидзисьӧ, мыля Тэ сэтшӧм ылына сулалан,
сьӧкыт кадӧ Асьтӧ сайӧвтан?
23 Ентӧг олісь асьсӧ вылына лэбтӧ
да дзескӧтлӧ умӧля олісьсӧ.
Сія ачыс ась шедӧ аслас юрись петӧм ылӧтлӧ́мӧ.
24 Ентӧг олісь аслас ӧзйӧтчӧ́ммезӧн
*к ошшасьӧ.
Горшасись ассис сьӧлӧмсӧ бурмӧтӧ.
25 Ентӧг олісь нырсӧ лэбталӧ
да Енсӧ абутӧм туйӧ пуктӧ.
Сія шуӧ: «Еныс оз мыжйы».
А юрас пыртӧ:
«Еныс абу».
26 Быд кадӧ сылӧн туйес вайӧтӧны кулӧ́мӧ.
Сія чайтӧ,
оз пӧ сюр сія Дӧсвидзисьлӧн суд вылӧ.
Сы вылӧ лэбтісьӧммесӧ сія абутӧм туйӧ пуктӧ.
27 Аслыс сія шуӧ:
«Ме ог усь,
мекӧт некӧр оз ло умӧльыс».
28 Ӧмыс сылӧн тырӧм ёрдӧ́мӧн,
ылӧтлӧ́мӧн да бӧбӧтчӧ́мӧн.
Сылӧн кылыс вайӧ пессьӧ́м-мырсьӧ́м да кулӧ́м.
29 Сія дзебсисьӧмӧн видзчисьӧ оланіннэз дынын,
кытӧн сійӧ некин оз адззы.
Сэтӧн вийӧ мортӧс, кӧда эз кер умӧльсӧ.
Синнэс сылӧн видзӧтлӧны умӧля олісь сьӧрын.
30 Сія лев моз ляпкӧтчӧмӧн видзчисьӧ,
медбы вынтӧмсӧ кутны.
Сійӧ кутӧ да аслас кыйся́нӧ кыскӧ.
31 Сія мышкыртчӧ да уськӧтчӧ.
Вынтӧммес сылӧн вына гыжжезӧ шедӧны.
32 Ентӧг олісь аслыс висьталӧ:
«Еныс вунӧтіс, бергӧтіс Ассис чужӧ́мсӧ,
Сія некӧр оз казяв».
33 Дӧсвидзисьӧ, Енӧ [менам], лэбтісь!
Лэбты Ассит китӧ!
Дзескӧтӧммесӧ эн жӧ [нач] вунӧт!
34 Мыля умӧльсӧ керисьыс Енсӧ абутӧм туйӧ пуктӧ?
Мыля сія аслыс баитӧ:
«Еныс менӧ оз мыжйы»?
35 Но Тэ, Енӧ, быдӧс адззан.
Тэ эд видзӧтан,
кыдз умӧльсӧ кериссез отирлӧ
сьӧлӧм шог да дзескӧтлӧ́м вайӧны.
Тэ Аслат киӧн вештісян.
Умӧля олісь Тэнат киӧ асьсӧ сетӧ.
Айтӧм-мамтӧмлӧ Тэ отсасян.
36 Ентӧг олісьлісь да лёк керисьлісь выннысӧ бырӧт,
мыжйы нійӧ лёк керӧ́мныс понда,
медбы эзӧ ни керӧ умӧльсӧ.
37 Дӧсвидзись, Тэ ─ Ӧксу пыр кежӧ.
Ентӧдтӧммез Тэнат му вылісь ӧшасӧ.
38 Дӧсвидзисьӧ, Тэ кылан, мый колӧ рам
*л сьӧлӧмаэзлӧ.
Вынсьӧт нылісь сьӧлӧммезнысӧ,
осьт Ассит пельтӧ кывны нылісь кеймисьӧ́мсӧ.
39 Тэ дорьян айтӧм-мамтӧммесӧ да дзескӧтӧммесӧ,
медбы му вылас овтӧн
нійӧ сэсся некин ни эз повзьӧтлы.
*а 9:2 адззывлытӧм керӧ́м ─ чудо
*б 9:5 юрала́н пукӧ́с ─ престол
*в 9:7 тышкася́н ─ оружие
*г 9:7 кар ─ город
*д 9:10 дзебсисянін ─ прибежище
*е 9:13 дзескӧтны ─ притеснять, угнетать
*ж 9:14 шойна ─ могила
*з 9:15 Сион ныв ─ сідз шуӧны Ерусалим карсӧ
*и 9:16 кыйся́н ─ сеть
*к 9:24 ӧзйӧтчӧ́м ─ страсть, похоть
*л 9:38 рам ─ кроткий
Глава 9
