Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
138 Псалом
Сьыліссезӧн веськӧтлісьлӧ. Давидлӧн псалом.1 Дӧсвидзисьӧ,
Тэ менӧ тӧдмалін-видзӧтін
и менӧ тӧдан.
2 Тэ тӧдан, кӧр ме пукся, кӧр чечча.
Тэ ылісянь ни тӧдан,
мый ме юрам видза.
3 Муна ме, шоччися я, Тэ менӧ адззан,
менчим туйезӧс быдӧс тӧдан.
4 Ме ӧмӧс эг на ешты осьтны,
а Тэ тӧдан ни, мый ме мӧда висьтавны.
5 Тэ ме гӧгӧрын, и одзсяням, и бӧрсяням,
Тэ ме вылӧ Ассит китӧ пуктан.
6 Тэнат быдӧс тӧдӧ́мсянь диво кутӧ.
Тӧдӧ́мыт сэтшӧм ыджыт,
сійӧ ме аслам вежӧрӧн и вежӧртны ог вермы.
7 Кытчӧ верма мунны Тэнат Лов дынiсь?
Кытчӧ верма пышшыны Тэнат чужӧ́м одзись?
8 Ме кая кӧ енӧжӧ, Тэ сэтчин,
лэдзча кӧ кулӧммез дынӧ, Тэ и сэтчин.
9 Босьта кӧ асъя кыалісь
*а борддэз
да лэбзя саридз сайӧ,
10 и сэтчин Тэнат киыт менӧ нуӧтас,
Тэнат веськыт киыт менӧ видзас.
11 Ме шуа кӧ:
«Пемытыс менӧ сайӧвтас,
и ме гӧгӧрись югытыс ойӧ пӧртчас»,
12 но и пемытыс Тэ шогья оз сайӧвт,
и ойыс лоас лун кодь югыт,
пемытыс лоӧ югытӧн.
13 Мамӧ кынӧмын Тэ менӧ аркмӧтін,
менчим пытшкӧс быдӧс кыйин.
14 Ошка Тэнӧ,
диво кутӧ, кытшӧмӧ Тэ менӧ керин.
Тэнат керӧ́ммезсянь диво кутӧ,
ме этӧ бура тӧда.
15 Тэ шогья эзӧ вӧлӧ сайӧвтӧмӧсь менам лыэзӧ,
кӧр ме вӧлі гусьӧн аркмӧтӧм,
кӧр ме вӧлі мам кынӧмын керӧм.
16 Кӧр ме мам кынӧмын эг на и тыдав,
Тэнат синнэт менӧ адззисӧ ни.
Ме эг на шогмы,
а Тэнат небӧгын менам ола́н луннэзӧ
вӧлісӧ гижӧмӧсь ни.
17 Енӧ, кытшӧм донаӧсь меным Тэнат юрын видзӧ́ммет!
Кытшӧм нiя уна!
18 Кин нiйӧ вермас лыддьыны?
Нiя эд муын лы чиррезся
*б унажыкӧсь!
Кӧр сайма, ме сё Тэкӧт.
19 Енӧ, кӧбы Тэ уськӧтін Ентӧг оліссесӧ!
Мунӧ ме дынiсь, вир юиссез!
20 Тэ вылӧ лэбтісьӧммес Тэнӧ умӧльтӧны,
вӧвлытӧмсӧ Тэ йылісь висьталӧны.
21 Верма разь ме радейтны нiйӧ,
кӧдналӧ Тэ син вылӧ он ков?
Кӧдна Тэ вылӧ лэбтісьӧны,
ме нiйӧ сэрпӧсь отирӧ пукта.
22 Ме ны вылӧ нельки видзӧтны ог вермы.
Нiйӧ ме вылӧ лэбтісьӧм отирӧ пукта.
23 Енӧ, тӧдмав-видзӧт менӧ,
тӧд менчим сьӧлӧмӧс.
Тӧдмав-видзӧт менӧ да тӧд юрам видзӧ́мӧс.
24 Видзӧт, ог я ме мун ылӧта́н туй вылӧт.
Туйдӧ́т менӧ Аслат пырся туй вылӧ.
*а 138:9 асъя кыа ─ утренная заря
*б 138:18 лы чир ─ песчинка
Глава 138
