Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
36 Псалом
Давидлӧн псалом.1 Эн лӧгав лёк кериссез вылӧ,
эн завидуйт умӧль кериссезлӧ.
2 Турун моз эд нія чожа косьмасӧ,
зеленӧй турун моз рушмасӧ.
3 Надейтчы Дӧсвидзись вылӧ да кер бурсӧ,
Енлӧн сетӧм муын ов Сылӧн быль сьӧрті.
4 Сьӧлӧмтӧ бурмӧт Дӧсвидзисьӧн,
и Сія сетас, мый колӧ сьӧлӧмытлӧ.
5 Ола́н туйтӧ сет Дӧсвидзисьлӧ,
надейтчы Сы вылӧ,
и Сія быдӧс лӧсьӧтас.
6 Тэнчит сӧстӧма олӧ́мтӧ шонді югӧр моз петкӧтас,
веськыта керӧ́мтӧ луншӧрся шонді моз мыччалас.
7 Дӧсвидзись одзын шы эн сет
да надейтчы Сы вылӧ.
Эн завидуйт бӧбӧтчись мортлӧ,
кӧдалӧн ола́нас быдӧс бура мунӧ.
8 Дугды лӧгавны, кучиксит эн пет,
лёксялӧ́м увьят медбы эз пет умӧльыс.
9 Лёк кериссезлӧн ола́нныс орас,
а Дӧсвидзись вылӧ надейтчиссезлӧ
дӧнзяс Енлӧн кӧсйӧм му.
10 Эшӧ недыр, и Ентӧг олісьыс оз ло.
Видзӧтан, кытӧн сія вӧлі, а сія абу ни.
11 А раммезлӧ дӧнзяс Енлӧн кӧсйӧм му,
лӧнь ола́ннас нія бурмӧтасӧ сьӧлӧмнысӧ.
12 Ентӧг олісь веськыта олісьлӧ
лӧсьӧтчӧ керны умӧльсӧ,
пиннесӧ сы вылӧ йирӧ.
13 Но Дӧсвидзисьыс сы вылын сералӧ,
адззӧ эд,
сылӧ вештіся́н луныс сибалӧ.
14 Ентӧг оліссез кыскӧны ассиныс шыпурттэсӧ,
зэлӧтӧны ньӧввесӧ,
медбы вийны умӧля олісьсӧ да корисьсӧ,
медбы бытшкыны веськыт туй вылӧт мунісьсӧ.
15 Но нылӧн шыпуртныс бытшкас ассиныс сьӧлӧмнысӧ,
нылӧн ньӧвныс
*а чегас.
16 Веськыта олісьлӧн пажытьыс
*б етша,
но сія буржык Ентӧг оліссезлӧн уна дона берсяся.
17 Ентӧг оліссезлӧн етшныс
*в орас,
а веськыта олісьсӧ Дӧсвидзись вынсьӧтӧ.
18 Дӧсвидзись тӧдӧ сӧстӧм сьӧлӧмаэзлісь ола́н луннэсӧ,
нылӧ лӧсьӧтӧм пайыс некӧр оз ӧш.
19 Сьӧкыт кадӧ нылӧ оз ковсьы гӧрдӧтны,
тшыгьяла́н кадӧ нія лоасӧ пӧтӧсь.
20 А Ентӧг оліссез куласӧ,
Дӧсвидзись вылӧ лэбтісиссез баля гос моз сыласӧ,
тшын моз ӧшасӧ.
21 Ентӧг олісь одзӧстӧ, но оз вешты.
А веськыта олісьыс небыт сьӧлӧма,
сія уна сетӧ.
22 Дӧсвидзисьлӧн бласлӧви́тӧммезлӧ
дӧнзяс Енлӧн кӧсйӧм му,
а Дӧсвидзисьӧн ёрдӧммес куласӧ-ӧшасӧ.
23 Мортлӧн туйыс Дӧсвидзись сьӧрті кӧ,
сылісь оськӧввесӧ Сія вынсьӧтӧ.
24 Сія и джӧмдас кӧ, оз усь,
Дӧсвидзисьыс эд сійӧ киӧттяс видзӧ.
25 Ме вӧлі том, а ӧні пӧрисьми.
Но ме некӧр эг адззыв,
медбы веськыта олісьӧс Дӧсвидзисьыс ӧтнассӧ колис,
и сылӧн челядьыс кортӧн ветлӧтісӧ.
26 Веськыта олісьыс небыт сьӧлӧмсянь
быд лун отсасьӧ да одзӧсӧн сетӧ.
Сылӧн челядьыс ваясӧ сылӧ бласлӧвитӧ́мсӧ.
27 Лёк керӧ́мись видзсьы ылына,
кер бурсӧ,
сэк пыр пондан овны.
28 Дӧсвидзисьыс эд радейтӧ веськыта судитӧ́мсӧ.
Ассис вежаэсӧ Сія оз коль,
Сія нійӧ пыр видзӧ.
[Но Ентӧг оліссесӧ вашӧтасӧ.]
Лёк кериссезлӧн челядьлісь ола́нсӧ орӧтасӧ.
29 Веськыта оліссезлӧ дӧнзяс Енлӧн кӧсйӧм му,
нія сэтӧн пыр пондасӧ овны.
30 Веськыта олісь баитӧ мывкыда кыввезӧн,
сылӧн ӧмыс висьталӧ быльсӧ.
31 Еныслӧн Туйдӧ́тыс сы сьӧлӧмын,
и сія джӧмдавтӧг оськалӧ.
32 Ентӧг олісь видзӧтлӧ веськыта олісь сьӧрын,
кыдз бы сійӧ вийны.
33 Но Дӧсвидзисьыс веськыта олісьсӧ оз сет сы киӧ,
судын оз лэдз сійӧ мыжйыны
*г.
34 Надейтчы Дӧсвидзись вылӧ
да Сылӧн туй вылӧт ветлӧт!
Сія лэбтас тэнӧ,
и тэныт дӧнзяс Енлӧн кӧсйӧм му.
Тэ адззылан,
кыдз Ентӧг оліссезлісь ола́ннысӧ орӧтасӧ.
35 Ме адззылі лӧг Ентӧг олісьӧс,
сія бабай
*д моз вужьясьӧм, паськалӧм.
36 Но сія муніс, и эз ло.
Ме кошша сійӧ, и ог адззы.
37 Видзӧт сӧстӧм сьӧлӧмаэз вылӧ,
веськыта оліссез вылӧ,
сэтшӧммеслӧн эд лоас лӧнь ола́ныс.
38 А умӧльсӧ кериссез быдӧнныс изводасясӧ
*е,
Ентӧг оліссезлӧн оз ло одзланься ола́ныс.
39 Веськыта оліссезлӧ
мезмӧ́мыс локтас Дӧсвидзисьсянь,
умӧль кадӧ Сія нійӧ дорьяс.
40 Дӧсвидзисьыс нылӧ отсалас,
мырддяс нійӧ Ентӧг оліссезлӧн киись да мездас,
нія эд Дӧсвидзись вылӧ надейтчӧны.
Ошкӧ́м.
*а 36:15 36:15 ньӧв ─ лук
*б 36:16 пажыть ─ имущество
*в 36:17 етш ─ сила
*г 36:33 мыжйыны ─ наказать
*д 36:35 бабай ─ сильно сучковатое, толстое дерево
*е 36:38 изводасьны ─ уничтожиться
Глава 36
