Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
65 Псалом
Сьыліссезӧн веськӧтлісьлӧ. Сьыланкы́в.1 Му вылын оліссез,
быдӧнныт Еныслӧ гажӧн горӧтӧ!
2 Сылісь нимсӧ сьылӧтӧ,
Сійӧ ошкӧ́мнаныт лэбтӧ!
3 Еныслӧ висьталӧ:
«Тэнат керӧ́ммет ӧддьӧн повзьӧтӧны!
Тэнат сэтшӧм уна выныт,
нельки Тэ вылӧ лэбтісьӧммез Тэныт сетчӧны.
4 [Медвылісьӧ,]
му вылын оліссес быдӧнныс
ась копыртчӧны Тэныт,
сьылӧмӧн ошкӧны Тэнӧ,
сьылӧтӧны Тэнчит нимтӧ!»
5 Локтӧ да видзӧтӧ Енлӧн керӧ́ммез вылӧ!
Отирлӧ нія ыджытӧсь да повзьӧта́наӧсь!
6 Саридзсӧ Сія пӧртіс кӧс муӧ,
юсӧ отирыс вуджисӧ кӧсінӧт.
Сылӧн керӧ́ммезсянь сэтчин мийӧ гажӧтчим.
7 Аслас вынӧн Сія юралӧ пырся-пыр,
отирресӧ оз лэдз син вылісь.
Зык лэбтіссес Сылӧ паныт ась оз мунӧ!
8 Отиррез, ошкӧ миянлісь Енсӧ,
горӧн сьылӧтӧ Сійӧ!
9 Сія видзис миянлісь ола́ннымӧс,
миян коклӧ эз лэдз джӧмдыны.
10 Енным, миянӧс Тэ тӧдмалін-видзӧтін,
да эзы́сь
*а моз сылӧтӧмӧн сӧстӧмтін.
11 Тэ лэдзин миянӧс кыйся́нӧ кутны,
миян вылӧ сьӧкыт ноп
*б пуктыны.
12 Тэ лэдзин миянӧс тальны вӧввезӧн.
Мийӧ мунім биӧт и ваӧт,
но Тэ миянӧс мездін.
13 Ме Тэнат керкуӧ пыра,
езъяла́н козиннэз Тэ одзын сота,
кӧсйисьӧ́мӧ сьӧрті кера.
14 Кера сы сьӧрті,
мый ме аслам ӧмӧн висьталі,
сьӧкыт кадӧ аслам кылӧн шуи.
15 Ме Тэныт медбур езъяла́н козиннэз сотӧмӧн вая,
баля гос Тэ одзын сота.
Пороззэз да кӧзаэз Тэныт езъяла́н козинӧн вая.
16 Енісь поліссез, локтӧ, быдӧнныт кывзӧ!
Ме висьтася тіянлӧ, мый Сія меным керис.
17 Ме Сійӧ аслам ӧмӧн кори,
аслам кылӧн Сійӧ ошки.
18 Менам сьӧлӧмын кӧбы вӧлі умӧль керӧ́мыс,
сэк менӧ Дӧсвидзисьыс эз бы кывзы.
19 Но Еныс менӧ кыліс,
менчим кеймисьӧ́мӧс Сія кывзіс.
20 Ме ошка Енӧс,
Кӧда менчим кеймӧ́мӧс кыліс,
Кӧда Аслас небыт сьӧлӧмсянь
эз дугды меным отсасьны.
*а 65:10 эзы́сь ─ серебро
*б 65:11 ноп ─ бремя
Глава 65
