Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
73 Псалом
Асафлӧн велӧтӧ́м.1 Енӧ, мыля Тэ миянӧс пыр кежӧ колин?
Аслат йӧрись баляэз вылӧ мыля лӧгасин?
2 Уськӧт тӧдвылат отиртӧ,
кӧднӧ Тэ важынсянь ни бӧрйин да небин,
медбы нія вӧлісӧ Тэнат отирӧн.
Уськӧт тӧдвылат Сион керӧссӧ,
кӧда вылын Тэ пондін овны.
3 Иньдӧт Ассит оськӧвветӧ кӧркӧся вежаинланьӧ,
кӧдӧ миян вылӧ уськӧтчӧм йӧзыс
быдсӧн жугдісӧ-паздісӧ.
4 Тэ вылӧ лэбтісьӧммес равзӧны
Тэнат отирлӧн ӧксянінын.
Миян дӧрапас
*а туйӧ ассиныс лэбтісӧ.
5 Нія вӧр пӧрӧтіссез моз
асланыс черрезӧн ӧвтчисӧ.
6 Кузь оропа быдкодь черрезӧн
нія вежаинсис жугдісӧ быдӧс,
мыйӧн вӧлісӧ баситӧмӧсь стенаэс.
7 Тэнчит вежаинтӧ сотісӧ,
Тэнат нимлісь оланінсӧ сэрпӧсьтісӧ.
8 Нія аслыныс шуисӧ:
«Нійӧ быдсӧн куштамӧ-паздамӧ!»
И миян муись Енлӧ кейманіннэсӧ быдӧс сотісӧ.
9 Мыччала́н пассэз мийӧ огӧ адззывлӧ,
Енсянь юӧртісьыс миян абу ни,
и миян коласісь некин оз тӧд,
дыр я этадз пондас кыссьыны.
10 Енӧ, миян вылӧ лэбтісьӧммес
дыр я пондасӧ серавны миян вылын?
Йӧз отир дыр я пондас умӧльтны Тэнчит нимтӧ?
11 Мыля вештан китӧ, Ассит веськыт китӧ?
Китӧ нюжӧт, нійӧ вачкы!
12 Енӧ, менам Ӧксуӧ, одзза кадсянь ни
Тэ му вылас вайин мезмӧ́м.
13 Аслат вынӧн Тэ саридзсӧ поткӧтін,
кыйезлісь юрресӧ Тэ ваас мургы́льтін.
14 Левиафа́нлісь
*б юрсӧ Тэ мургы́льтін.
Сійӧ сетін сёйны [Эфиопия] кушмуын оліссезлӧ.
15 Ва петаніннэзлӧ да визывта́н ваэзлӧ
Тэ туйез лӧсьӧтін,
Тэ пыдын юэз косьтін.
16 Луныс и ойыс Тэнатӧсь,
Тэ аркмӧтін тӧлісьсӧ да шондісӧ.
17 Тэ сувтӧтін муыслӧ дорресӧ,
Тэ лӧсьӧтін гожумсӧ да тӧвсӧ.
18 Дӧсвидзисьӧ, уськӧт тӧдвылат:
миян вылӧ уськӧтчӧм йӧзыс Тэнӧ умӧльтӧны,
мывкыдтӧм отирыс Тэнчит нимтӧ видӧны.
19 Вӧрпаэзлӧ эн сет босьтны ловсӧ Аслат дудіоклісь,
Ассит пессись-мырсись отиртӧ нач эн вунӧт.
20 Ассит йитӧ́ттӧ
*в уськӧт тӧдвылат!
Му вылас быд пемытіныс лёка дзескӧтлӧ́мӧн тырис.
21 Дзескӧтӧм морт вылын ась озӧ сералӧ.
Умӧля олісь да корись Тэнчит нимтӧ ась ошкӧны.
22 Енӧ, сувт, чулӧт Ассит судтӧ!
Уськӧт тӧдвылат,
кыдз мывкыдтӧммез лунтыр Тэнӧ умӧльтӧны.
23 Тэ вылӧ лэбтісьӧммезлісь эн вунӧт горӧтлӧ́мнысӧ,
Тэныт паныт муніссезлӧн горӧтлӧ́мныс содӧ.
Ошкӧ́м.
*а 73:4 дӧрапас ─ флаг, знамя
*б 73:14 левиафа́н ─ саридзын олісь ыджыт вӧрпа
*в 73:20 йитӧ́т ─ завет
Глава 73
