Выбрать язык
Книги Ветхого Завета
Книги Нового Завета
с русским текстом1 Адам шке Ева ватыж дене мален, тудыжо мӱшкыраҥын да Каиным ыштен. Ева каласен: «Мыланем Господь эргым пуэн».2 Вара тудын шольыжым, Авельым, ыштен. Авель шорыкым кӱтен, а Каин мланде пашам ыштен.
3 Каин, икмыняр жап эртымеке, Господьлан надыр семын мланде саскам конден.4 Авелят шке кӱтӱж гыч ончыч шочшо пача-влакым да нунын кояштым конден. Авель шкежат, тудын надыржат Господьлан келшен.5 А Каин да тудын надырже Господьлан келшен огытыл. Каин тидлан чот шыдешкен, чурийжат вашталтын.6 Господь [Юмо] Каинлан каласен: «Молан тый шыдешкышыч? Молан чуриетат вашталте?7 Порым ыштет гын, вуетым от нӧлтал ыле мо?*а А порым от ыште гын, сулык омса денак кия. Тудо тыйым шкеж деке шупшеш, но тый тудлан оза лий».
8 Каин шке шольыжлан каласен: [«Каена нурыш»]. Нурышто тудо Авель шольыж ӱмбаке кержалтын да тудым пуштын.9 Господь [Юмо] Каинлан каласен: «Кушто тыйын Авель шольыч?» Каин вашештен: «Ом пале. Мый шольымлан орол улам мо?»10 Господь каласен: «Мом тый ыштенат?! Шольычын вӱржӧ мланде гыч Мый декем кычкыра.11 Тый ынде каргыме, тиде мланде гыч поктен колтымо улат. Вет тыйын кидет дене йоктарыме шольычын вӱржым мланде шке кӧргышкыжӧ налын.12 Кунам тый мланде пашам ыштет, тудо тыланет тетла лектышым ок пу. Тый поктен колтымо да тӱня мучко перныл коштшо лият».
13 Каин Господь [Юмылан] каласен: «Мыланем мутым кучаш логалеш, тиде пеш неле да чыташат ок лий.14 Теве ынде Тый мыйым тиде мланде гыч поктен колтет – мый шинча ончычет шылам. Мый поктен колтымо, перныл коштшо лиям, да вашлийме кеч-могай еҥат мыйым пуштын кертеш».15 Господь [Юмо] тудлан каласен: «Уке, кӧ Каиным пуштеш – тудлан ӱчӧ шым пачаш савырна». Каиным вашлийын, тудым нигӧат ынже пушт манын, Господь [Юмо] тудын ӱмбакше палым пыштен.16 Каин Господьын чурийже ончыч кораҥ каен да Нод мландыште, Эдем деч эрвелныла, илаш тӱҥалын.
17 Каин шке ватыж дене мален, тудыжо мӱшкыраҥын да Енохым ыштен. Каин олам чоҥен да тудым эргыжын лӱмжӧ дене Енох манын лӱмден.18 Енох деч Ирад [Гаидад] шочын, Ирад деч Мехиаель [Малелеил] шочын, Мехиаель деч Мафусал шочын, Мафусал деч Ламех шочын.
19 Ламех кок ватым налын: иктыжын лӱмжӧ Ада, весыжын – Цилла [Селла].20 Ада Иавалым ыштен, тудо кӱтӱм кӱтен омашыште илыше-влакын чылаштынат ачашт лийын.21 Тудын шольыжын лӱмжӧ Иувал, тудо кӱсле ден шиялтышым шоктышо-влакын чылаштынат ачашт лийын.22 Цилла ватыжат Тувалкаин [Фовел] лӱман эргым ыштен, тудыжо той да кӱртньӧ гыч тӱрлӧ ӱзгарым ыштыше апшат лийын. Тувалкаинын Ноема шӱжарже лийын.
23 Ламех ватыже-влаклан каласен:
«Ада ден Цилла, колыштса мыйын мутем!
Ламехын ватыже-влак, пылышышкыда пыштыза шомакем!
Пӧръеҥ мыйым сусырта – тудым пуштам,
рвезе еҥ мыйым пера – тудым пуштам.
24 Каин верч ӱчӧ шым пачаш шукталтеш гын,
Ламех верч – шымле шым пачаш».
25 Адам [Ева] ватыж дене адакат мален, ватыже эргым ыштен да тудлан Сиф*б лӱмым пуэн. «Каинын пуштмо Авель олмеш Юмо мыланем вес эргым пуэн» манын, Ева ойлен.26 Сифынат эргыже шочын, тудлан Енос лӱмым пуэн.
Тиде жапыште Господь [Юмын] лӱмжым ӱжын кумалаш тӱҥалыныт.
*а 4:7 Тиде верым вес семынат кусарат: «Порым ыштет гын, тый декет поро кумыл огеш лий ыле мо?»
*б 4:25 «Сиф» лӱм еврей йылмысе ’пуэн’ глагол дене ик семынрак йоҥга.
Глава 4