Выбрать язык
Книги Ветхого Завета
Книги Нового Завета
с русским текстом1 Господь, шке ойлымыж семынак, Сарра деке поро лийын да тудлан сӧрымыжым шуктен.2 Сарра мӱшкыраҥын да Юмын каласыме жапшылан Авраамлан шоҥгылык велешыже эргым ыштен.3 Авраам Сарра деч шочшо эргыжлан Исаак лӱмым пуэн.4 Исаакын кандаш кечаш улмыж годым Авраам Юмын кӱштымыж почеш эргыж дене пӱчмӧ йӱлам эртарен.5 Исаак эргыже шочмо годым Авраамлан шӱдӧ ий улмаш.6 А Сарра манын: «Юмо мыланем куанен воштылмашым конден: тидын нерген кӧ гына ок кол, чыланат мый денем пырля куанен воштылыт».7 Да ешарен: «Сарра азажлан чызыжым пукшаш тӱҥалеш манын, кӧ Авраамлан каласен кертын? Авраамын шоҥго улмыж ӱмбач мый эргым ыштенам».
8 Аза кушкын, да тудым чызе деч ойыреныт. Исаак [эргыжым] ава шӧр деч ойырымо кечын Авраам кугу кочмаш-йӱмашым эртарен.9 Сарра ужын: египтянке Агарьын Авраамлан ыштыме эргыже [тудын Исаак эргыж дене] модеш.10 Тунам Авраамлан каласен: «Тиде кул ӱдырамашым да эргыжым поктен колто. Кул ӱдырамашын эргыже мыйын Исаак эргым дене пырля наследник лийын ок керт».11 Измаил эргыж шотышто тыге каласыме Авраамым пеш чот ойгандарен.12 Но Юмо Авраамлан каласен: «Тиде эрге йоча да ӱдырамаш кулет верч ит тургыжлане, Сарран каласыме чыла мутшым колышт: тыйын тукымет Исаак гоч шуйна.13 Ӱдырамаш кулет деч шочшо эргыч дечат мый [кугу] калыкым ыштем, тудат вет тыйын шочшет».
14 Авраам эрдене эр кынелын, киндым налын, шувышыш вӱдым темен. Вара чыла тидым Агарьын вачӱмбакыже пыштен, эргыжым кучыктен да луктын колтен. Агарь лектын каен да Вирсавий ир мландыште йомын коштын.15 Шувышышто вӱд пытымеке, Агарь эргыжым ик вондер йымаке шынден коден,16 а шкеже ӧрдыжкырак, пикш чоҥештен кертме торашке, миен шинчын. «Эргымын кузе колымыжым ынем уж», – шкаланже шке каласен да, [умбалне] тудын могырыш савырнен шинчын, мӱгырен шорташ тӱҥалын.17 [Шынден кодымо вер гыч] рвезын йӱкшым Юмо колын, да кавапомыш гыч Юмын Суксыжо Агарьым ӱжын каласен: «Мо лийын, Агарь? Ит лӱд: Юмо рвезын йӱкшым колын.18 Кынел, эргычымат кынелте да кидшым кучо. Мый тудын деч кугу калыкым ыштем».19 Юмо ӱдырамашын шинчажым почын, да тудыжо [илыше] вӱдан тавым ужын. Каен, вӱд дене шувышыжым темен, эргыжым йӱктен.
20 Юмо рвезе пелен лийын. Рвезе кушкын шуын да ир мландыште илаш тӱҥалын, пикшызе лийын.21 Тудо Фаран лӱман ир мландыште илен. Ӱдырым тудлан аваже Египет мланде гыч налын пуэн.
22 Тиде жапыште Авимелех, [оръеҥым кондышо Ахузаф] да сарзывуй Фихол Авраамлан тыге каласеныт: «Кеч-мом тый ыштет гынат, Юмо эреак пеленет.23 Ынде Юмын ончылно тый мылам тыште товатле: мыланемат, эргымланат, уныкамланат тый нимогай удам от ыште. Кузе мый тый денет шкемым кученам, тыят тугак мый декем да кызыт илыме мландет деке поро кумылан лият».24 Авраам каласен: «Товатлем».
25 Вара Авраам Авимелехым таве верч шылтален: Авимелехын тарзыж-влак тиде тавым шупшын налыныт улмаш.26 Авимелех каласен: «Кӧ тидым ыштен, мый ом пале. Тыят мыланем ойлен отыл, тымарте тидын нерген мый колынат омыл ыле».27 Авраам икмыняр тыгыде да шолдыра вольыкым налын да Авимелехлан пуэн. Нуно шке коклаштышт ойпидышым ыштеныт.28 Тыгыде вольык кӱтӱ гыч шым шорык пачам Авраам посна шогалтен.29 Авимелех Авраам деч йодын: «Молан [кӱтӱ гыч] нине шым пачам тый посна шогалтенат?»30 Авраам вашештен: «Нине шым пачам мый дечем нал, тек нуно тавым кӱнчымемлан пале семын лийыт».31 Санденак тиде верым тудо Вирсавий*а манын лӱмден, вет тыште нуно икте-весыштлан товатленыт.
32 Вирсавийыште ойпидышым ыштымеке, Авимелех, [оръеҥым кондышо Ахузаф] да сарзывуй Фихол филистим-влакын мландышкышт пӧртылыныт.33 Вирсавий воктене Авраам тамариск пушеҥгым шынден да тушто Господьын, курымашлык Юмын, лӱмжым ӱжын кумалын.34 Филистим-влакын мландыштышт Авраам ӧрдыж гыч толшо еҥ семын кужу жап илен.
*а 21:31 «Вирсавий» лӱм еврей йылмыште ’товатлымаш таве’ але ’шым еҥын тавышт’ манмым ончыкта.
Глава 21