Выбрать язык
Книги Ветхого Завета
Книги Нового Завета
с русским текстом1 Сарра шӱдӧ коло шым ийым илен – ӱмыржӧ тудын тынаре шуйнен.2 Сарра Ханаан мландысе Кириаф-Арба олаш колен, [тудыжо лапверыште лийын]. Кызыт тудо Хеврон маналтеш. Авраам Сарран колымыжлан пеш чот ойганен да шортмо йӱлам эртарен.3 Вара, колышо ватыжым коден, хеттей-влак деке каен. Тудо манын:4 «Мый тендан коклаште ӧрдыж гыч толшо йотъеҥ улам. Колышо ватемым шӱгарыш пышташ манын, мыланем тойышаш мландым ужалыза».5 Хеттей-влак Авраамлан вашештен каласеныт:6 «Колышт мемнам, озана. Тый мемнан коклаште Юмын айдемыже улат. Колышо ватетым мемнан эн сай тойымо мландеш тойо. Ватетлан тойымо верым пуаш нигӧат тореш огыл».
7 Авраам кынел шогалын да тудо мландысе калыклан, хеттей-влаклан, вуйжым савалтен,8 тыге каласен: «Колышо ватемым тойымо дене келшеда гын, тендам мыйын лӱмем дене Цохарын Ефрон эргыж дене кутырен ончаш йодам.9 Тудын нуржо тӱрыштӧ Махпела курыкпомыш уло. Тек тиде курыкпомышым тудо мыланем ужала. Тендан ончылныда сай акым пуэн, мый тудым налнем, тек тудо мемнан тойымо верна лиеш».
10 Ефронжо тыгодым хеттей-влак коклаштак шинчен улмаш. Ола капка воктене погынышо чыла хеттей-влак ончылно тудо Авраамлан вашештен:11 «Уке, мыйын озам, колышт мыйым: мый тыланет нурымат, тушто улшо курыкпомышымат пуэм. Тидым мый тылат шке калыкем ончылно пӧлеклем – тойо колышо ватетым».
12 Авраам тудо мландысе калыклан вуйжым савен13 да уло калык ончылно Ефронлан манын: «Поро лий, мыйым колышт: нурлан мый тылат шийым пуэм – нал тудым мый дечем, а мый колышо ватем тушан тоем».14 Ефрон Авраамлан вашештен:15 «Мыйын озам! Колышт мыйым: мланде нылшӱдӧ сикль шийым шога. Мыланемат, тыланетат тиде кугу ак мо? Тойо ватетым».16 Авраам Ефронын акше дене келшен да тудлан хеттей-влак ончылно каласыме акым висен пуэн – нылшӱдӧ сикль шийым, купеч-влакын висашт дене келшышын.
17 Тыге Ефронын Мамре турасе Махпела воктенысе нур, тушто улшо курыкпомыш, ты нурышто да йырже кушшо чыла пушеҥге18 Авраамын лийын. Чыла тидыже олан капкаж воктене погынышо хеттей-влакын шинча ончылнышт ышталтын.19 Вара Авраам Сарра ватыжым Махпела нурышто улшо курыкпомышеш тоен. Тудыжо Мамре воктене – вес семынже тудым Хеврон маныт – Ханаан мландыште лийын.20 Тыге хеттей-влакын тиде нурышт да тушто улшо курыкпомыш Авраамын тойымо мландышкыже савырненыт.
Глава 23