Выбрать язык
Книги Ветхого Завета
Книги Нового Завета
с русским текстом1 Шужымаш мландымбалне эше чот талышнен.2 Кунам Египет гыч кондымо шурным кочкын пытареныт, Иаков эргыже-влаклан каласен: «Адакат кайыза да изишак кочкышым налын кондыза».3 Иуда вашештен: «Саде айдемет мыланна пеҥгыдын каласен: ”Шольыда тендан пелен ок лий гын, мыйын шинчашкем ида кончо”.4 Шольынам мемнан дене колтет гын, ме каена да тылат кочкышым налына.5 А от колто гын, огына кай, вет тудо еҥет каласен: ”Шольыда тендан пелен ок лий гын, мыйын шинчашкем ида кончо”».6 Израиль каласен: «Тудо еҥлан эше ик шольыда улмым ойлымыда дене молан мыланем тыгай осалым ыштен улыда?»7 Нуно каласеныт: «Тудо еҥет мемнан нерген, ешна нерген йодышто: ”Ачада эше ила мо? Шольыда уло мо?” Меже нине йодышлан вашмутым пуышна. ”Шольыдамат кондыза” каласа манын, ме кушеч пален кертынна?»
8 Иуда шке Израиль ачажлан каласен: «Шольым мый денем пырля колто, ме тарванена да каена. Тунам ме огына коло, а илыше кодына – меат, тыят, мемнан шочшынат.9 Вениамин верч мутым мый кучаш тӱҥалам, тудын дене иктаж-мо лиеш гын, мый дечем йодат. Тыйын ончыкет тудым конден ом шогалте гын, ончылнет ӱмырешлан титакан кодам.10 Жапым шуйкален огына шого ыле гын, ме тымарте кок гана савырнен толын шуктена ыле».
11 Израиль, нунын ачашт, каласен: «Тыге гын, теве мом ыштыза: мландынан саскажым – бальзамым, мӱйым, стираксым, ладыным, фисташкым да миндальым, – мешакыш пыштен, пеленда наҥгайыза да тудо еҥлан пӧлеклыза.12 Пеленда шийым кок пачаш шукырак налза, мешакешда мӧҥгеш пыштен колтымо шийымат пӧртылтыза: ала йоҥылыш пыштеныт.13 Шольыдамат пырля налза да адакат тудо еҥ деке тарваныза.14 Чылакертше Юмо тудо еҥын кумылжым тендан деке савырыже да тудо тендан дене пырля Симеон ден Вениаминым колтыжо ыле. А мый шочшо деч посна кодшаш улам гын, тек шочшыдымо лиям».
15 Тыге эргыж-влак пеленышт пӧлекым, кок пачаш шуко ший оксам, тыгак Вениаминым налыныт да Египетыш тарванен каеныт. Вара Иосиф ончыко миен шогалыныт.16 Нунын коклаште Вениаминым, [шочмо шольыжым, шке аважын эргыжым] ужмекше, Иосиф шке пӧртшын вуйлатышыжлан каласен: «Нине еҥ-влакым пӧртыш пурто. Иктаж-кудо вольыкым шӱшкыл да чесым ямдыле. Таче кечывалым нуно мый денем кочкаш тӱҥалыт».17 Тудыжо Иосифын каласымыж семынак ыштен да нуным Иосифын пӧртышкыжӧ наҥгаен.18 Иосифын пӧртышкыжӧ наҥгайымылан нуно лӱдын колтеныт да каласеныт: «Кодшо гана мешакышкына мӧҥгеш пыштыме ший верч мемнам тышке конденыт. Вара ӱмбакына кержалтыт, мемнам кулыш савырат, а осёлнам поген налыт».
19 Нуно омса воктене Иосифын пӧрт вуйлатышыже деке лишемыныт да тудлан ойлаш тӱҥалыныт:20 «Озана, поро лий, мемнам колышт: кочкышым налаш ме ончычат толынна.21 Тунам мӧҥгӧ кайыме корныштына, йӱдлан шогалмеке, мешакнам рудышна – кажныжын шийже мешак аҥыштыже, нелытше денат мыняр лийын – тунарак. Ме тудым конденна.22 А кочкышым налаш ме вес шийвундым конденна. Кӧ шийвундынам мешакышкына пыштен, ме огына пале».23 Тудыжо каласен: «Ида тургыжлане, ида лӱд. Тендан да ачадан Юмыжо мешакышкыда ты поянлыкым шылтен. А тендан шийда мый денем». Вара нунын деке Симеоным конден.
24 Да нуным чылаштымат Иосифын суртышкыжо пуртен, йолыштым мушкаш вӱдым конден, осёлышт-влаклан кургым пуэн.25 Иосифын кечываллан толмыжлан изак-шоляк-влак пӧлекыштым луктыныт, вет нуно колыныт: кечывал кочкышым нуно тушто ышташ тӱҥалыт.26 Иосифын мӧҥгыжӧ толмекше, нуно тудлан пӧлекыштым конденыт да мланде марте вуйыштым савеныт.27 Иосиф нунын деч тазалыкышт нерген йодын да каласен: «Те шоҥго ачада нерген ойленда ыле, таза мо тендан ачада? Тудо эше ила?»28 Нунышт каласеныт: «Тыйын тарзет, мемнан ачана, таза, эше ила». [Иосиф каласен: «Тудо Юмын суапландарыме айдемыже».] Нуно, сукалтен шинчын, тудлан вуйыштым савеныт.
29 Вара Иосиф ончалын да шке Вениамин шольыжым, шочмо аважын эргыжым, ужын да каласен: «Тиде тендан изирак шольыда, кудын нерген те ойлен улыда ыле?» Да пелештен: «Эргым, Юмын порылыкшо пеленет лийже!»30 Иосиф содор лектын каен: шольыж деке тудын кугу йӧратымаш ылыжын, изиш гына шортын колтен огыл. Тудо кӧргӧ пӧлемыш пурен да тушто шортын.31 Вара шӱргыжым мушкын да лектын, шкенжым кидыш налын да кочкышым нумалаш кӱштен.32 Кочкышым тудлан посна пуэныт, нуныланат посна, тудын дене кочшо египтян-влакланат посна. Египет калыклан еврей-влак дене пырля кочкаш ок лий улмаш – египтян-влаклан тиде йырнык лийын.33 Иосиф ончылно нуно кугурак гыч тӱҥалын изирак марте радам дене шинченыт да кочкыныт, мо лиймылан ӧрын, ваш-ваш ончыштыныт.34 Кочкышым нунылан Иосифын ӱстелже гыч нумалыныт, тыгодым Вениаминлан, моло дене таҥастарымаште, вич пачаш утларак кондеденыт. Иза-шольо-влак Иосиф дене пырля йошкар аракам подылыныт, да кумылышт нӧлталтше лийын.
Глава 43