Выбрать язык
Книги Ветхого Завета
Книги Нового Завета
с русским текстом1 Левий тукым гыч ик пӧръеҥ тиде тукым гычак ӱдырым марлан налын улмаш.2 Тудын ватыже мӱшкыраҥын да эргым ыштен. Азан пеш мотор улмыжым ужмеке, эргыжым кум тылзе шылтен ашнен.3 Умбакыже шылтен кертын огылат, омыж комдым налын, мланде киш да тегыт дене шӱрен, тушко азам пыштен да Нил сер воктенысе омыж коклашке шынден коден.4 А азан акаже, тудын дене мо лиеш манын, ӧрдыж гыч эскераш тӱҥалын.
5 Эҥер дек фараонын ӱдыржӧ мушкылташ лектын, а тудын тарзе ӱдырамашыже-влак сер мучко коштыныт. Фараон ӱдыр омыж коклаште комдым ужын да ик тарзыжым тудым налаш колтен.6 Ӱдыр комдым почын да азам ужын. Тудыжо шортын колтенат, [фараон ӱдыр] азам чаманен да «тиде йоча еврей-влакын» манын.
7 Тунам азан акаже фараон ӱдыр дек миен да тудлан темлен: «Ала тыланет еврей ӱдырамаш кокла гыч аза пукшышым ӱжын кондаш?»8 «Ӱжын кондо», – фараон ӱдыр каласен. Тудыжо каен да азан аважым ӱжын конден.9 Фараон ӱдыр каласен: «Тиде азам нал да мыланем пукшен лук, мый тыланет тӱлем». Ӱдырамаш азам налын да пукшен ашнен.10 Азан кугурак лиймекше, ӱдырамаш тудым фараон ӱдырлан конден коден. Фараон ӱдыр ты йочам эргылыкеш налын, тудлан Моисей лӱмым пуэн, вет «азам мый вӱд гыч луктынам» манын.*а
11 Жап ятырак эртен. Кунам Моисей кушкын шуын, тудо икана шке иза-шольыж-влак деке, [Израильын эргыж-влак деке,] лектын да нунын неле пашам ыштымыштым ужын. Тудо тыгак египет еҥын еврейым – [израиль эрге кокла гыч] ик шке иза-шольыжым – кырымыжым ужын.12 Моисей тышке-тушко ончалын да ужын: лишне нигӧат уке. Тудо египтяным пуштын да ошмаш тоен.
13 Моисей тушко вес кечынат лектын да кок еврейын кучедалмыштым ужын. Тудо туманлаш тӱҥалше деч йодын: «Молан тый лишылъеҥетым кырет?»14 Тудыжо вашештен: «Кӧ тыйым мемнан вуйлатышылан да судьялан шогалтен? Кузе тый [теҥгече] египтяным пуштынат, ала тыгак мыйымат пуштнет?» Моисей лӱдын колтен, тудо умылен: тидын нерген чынжымак пален налыныт.
15 Фараон, тидын нерген колмеке, Моисейым пуштнеже улмаш. Но Моисей фараон деч шылын куржын да Мадиам мландеш шогалын. [Мадиам мландыш толмеке,] тудо таве воктеке шинчын.16 Мадиамысе иерейын шым ӱдыржӧ лийын, [нуно шке Иофор ачаштын кӱтӱжым кӱтеныт]. Таве деке толын, нуно ачаштын шорыкшо-влакым йӱкташ вӱдым луктыныт да волыш темкаленыт.17 Ты жапыште вес кӱтӱчӧ-влак толыныт да нуным поктен колташ тӱҥалыныт. Тунам Моисей кынелын да ӱдыр-влакым пыдал налын, [вӱдым луктын да] шорыкыштым йӱктен.
18 Ӱдыр-влак шке ачашт деке, Рагуил*б деке, пӧртылыныт. Тудыжо йодын: «Таче мо пеш вашке толында?»19 Нунышт вашештеныт: «Кӱтӱчӧ-влак деч мемнам ала-могай египет еҥ пыдал налын, вӱдымат тудак нӧлтен да шорыкнам йӱктен».20 Ӱдыр-влаклан ачашт каласен: «Кушто тудыжо? Молан тудым коденда? Ӱжса тышке, тек мемнан дене пырля кочкеш».21 Моисейлан тиде еҥ дене илаш келшен. Тудыжо Моисейлан Сепфора ӱдыржым марлан пуэн.22 Сепфора [мӱшкыраҥын да] эрге йочам ыштен. Моисей тудлан Гирсам лӱмым пуэн, вет «мый йот элышке толшо айдеме улам» манын тудо.*в [Вара Сепфора угыч мӱшкыраҥын да вес эргым ыштен. Моисей тудлан Елиезер лӱмым пуэн да каласен: «Ачамын Юмыжо мыланем полшен да фараонын кидше деч утарен».]
23 Кужу жап эртымеке, Египетысе кугыжа колен. Израиль эрге-влак неле пашалан кӧра орланен кечкыжыныт, полышым йодын кычкыреныт. Нунын магырымышт Юмо деке шуын.24 Нунын кечкыжмыштым Юмо колын да Авраам, Исаак да Иаков дене ыштыме ойпидышыжым шарналтен.25 Юмо Израиль эрге-влакым ончалын да нуным чаманен.
*а10 «Моисей» лӱм еврей йылмысе ’лукташ’ манме дене ик семынрак йоҥга.
*б18 Рагуил – Иофорым вес семынже тыге лӱмденыт.
*в22 «Гирсам» лӱм еврей йылмысе ’йот элыш толшо айдеме’ манме дене ик семынрак йоҥга.
Глава 2