Выбрать язык
Книги Ветхого Завета
Книги Нового Завета
с русским текстом1 Господь Моисейлан каласен:2 «Тый израиль эрге-влаклан ойло: тек нуно мӧҥгеш савырнат да Пи-Гахироф дене, Мигдол ден теҥыз коклаште, Ваал-Цефон ончылан шогалыт, станым тудын ваштареш теҥыз воктене шогалтат.3 Израиль эрге-влак нерген фараон [шке калыкшылан] тыге каласа: нуно тиде мландеш йомыныт, ир мланде нунылан корным петырен.4 А Мый фараонын шӱм-чонжым вустыкым ыштем, тудо тендан почеш тарвана. Фараон да тудын сарзе калыкше дене мом ыштымем гочын Мый шке чапем ончыктем, да египет калык пален налеш: Мый Господь улам». Израиль калык Господьын кӱштымыж семынак ыштен.
5 Калыкын куржмыжо нерген Египет кугыжалан увертареныт. Фараон ден тарзыж-влакын Израиль калык шотышто шонымашышт вашталтын. Нуно каласеныт: «Мом ме ыштенна? Молан ме израильтян-влакым, мыланна пашам ыштыше-шамычым, колтенна?»6 Фараон имньыжым кычкен, пеленже сарзе калыкшым налын.7 Тудо кудшӱдӧ эн сай сарлык орвам,*а Египетысе чыла моло сарлык орвам да нунын виктарышыштым налын.8 Господь фараонын, Египетысе кугыжан, [да тарзыж-влакын] шӱм-чоныштым вустыкым ыштен, да тудыжо Израиль эрге-влакым покташ лектын. А Израиль эрге-влак Господьын виян кидше йымалне*б каеныт.9 Нунын почеш египтян-влак – фараонын чыла имньыже орвашт дене, имнешкыже, сарзыже – тарваненыт да теҥыз воктене шогалше Израиль калыкым Пи-Гахироф дене, Ваал-Цефон ончылан поктен шуыныт.
10 Фараон нунын деке лишемын. Израиль эрге-влак ончалыныт да ужыныт: нунын почеш египтян-влак толыт. Израиль эрге-влак чот лӱдыныт да Господь деч полышым йодын кычкыраш тӱҥалыныт.11 Нуно Моисейлан каласеныт: «Тый мемнам ир мландышке колаш конденат. Египетыште шӱгарла уке мо? Мом тый мемнан дене ыштенат, молан мемнам Египет гыч луктынат?12 Кодо мемнам, ме египтян-влаклан пашам ыштена манын, тыланет Египетыште ойлен огынал мо? Ир мландыште колымеш мыланна египтян-влакын кулышт кодаш сайрак ыле».13 Моисей калыклан вашештен: «Ида лӱд, верыштыдак шогыза. Те ужыда, кузе таче тендам Господь утара. Вет кызыт ужмо египтян-влакым тетла нигунамат огыда уж.14 Господь тендан верч кредалаш тӱҥалеш, а те лыпланыза».
15 Господь Моисейлан каласен: «Мом тый Мый дечем полышым йодын кычкырет? Каласе Израиль эрге-влаклан, тек нуно ончыко каят.16 А тый шкеже пондетым нӧлтал да кидетым теҥыз ӱмбаке шуялте, теҥызым пелыгыч шел. Тунам Израиль эрге-влак теҥыз гоч кукшо мланде дене ошкыл кертыт.17 Мый [фараон да чыла] египтян-влакын шӱмыштым ӱскыртым ыштем, да нуно тендан почеш каят. Мый фараон да тудын чыла сарзе калыкше дене – орваште шинчыше да имнешкыже-влак дене – мом ыштымем гочын шке чапем ончыктем.18 Кунам фараон, орваште улшо сарзыже да имнешкыже-влак дене мом ыштымем гоч шке чапемым ончыктем, тунам уло Египет калык пален налеш: Мый Господь улам».
19 Израиль калык ончылно кайыше Юмын Суксо тарванен да нунын шеҥгеке каен. Тыгак ончылно кайыше пыл меҥгат тарванен да нунын шеҥгеке каен шогалын.20 Египет тӱшка ден израиль тӱшка коклашке пурен, иктыштлан тудо пыл да пычкемыш лийын, весыштлан йӱдым волгалтарен. Йӱд мучко кок тӱшкажат икте-весышт дек лишемын огытыл.
21 Моисей кидшым теҥыз ӱмбаке шуялтен, Господь виян эрвел мардеж дене вӱдым йӱдвошт поктен наҥгаен: вӱд кок могырыш кораҥын, да кукшо мланде лектын.22 Израиль эрге-влак теҥыз покшечын кукшо мланде дене каеныт, а вӱд нунын пурла да шола велнышт пырдыжла шоген.23 Нунын почеш египтян-влакат тарваненыт – фараонын чыла имньыже, орваже, имнешкыже теҥыз покшеке пуреныт.24 Волгыжаш тӱҥалме деч ончыч Господь тул да пыл меҥге кокла гыч египет еҥ тӱшкам ончалын да коклашкышт пудыранымашым колтен.25 А орва-влак дене Господь теве мом ыштен: оравашт чыгынен шогалыныт, сандене нуным пыкше шупшын наҥгаеныт. Египтян-влак каласеныт: «Айста израильтян-влак деч куржына, нунын верч мемнан ваштареш Господь кредалеш».
26 Господь Моисейлан каласен: «Кидетым теҥыз ӱмбаке шуялте – тек вӱд мӧҥгеш пӧртылеш да египтян-влакым, нунын орвашт ден имнешкыштым леведеш!»27 Моисей кидшым теҥыз ӱмбаке шуялтен, да теҥыз вӱд эр эрдене шке верышкыже пӧртылын. А египтян-влак тыгодым вӱдтолкын ваштареш куржыныт – тыге Господь нуным теҥыз покшелне вӱд йымак колтен.28 Вӱд мӧҥгеш пӧртылын да Израиль калык почеш теҥызыш пурышо орва ден имнешке-влакым – фараонын чыла сарзыжым – леведын. Нунын кокла гыч иктат кодын огыл.29 А Израиль эрге-влак теҥыз покшечын кукшо мланде дене эртеныт, вӱд нунын пурла да шола велнышт пырдыж семын шоген.
30 Тыге Господь тиде кечын Израиль калыкым египет еҥ-влакын кидышт деч утарен, да Израиль калык теҥыз серыште нунын колышо капыштым ужын.31 Израиль эрге-влак Господьын египтян-влак ӱмбак нӧлталме куатан кидшым ужыныт. Нуно Господь деч лӱдыныт, да калык Господьлан, Тудын Моисей тарзыжлан ӱшанен.
Тунам Моисей да Израильын эргыже-влак Господьым тыге моктен муреныт:
*а14:7 Сарлык орва – колесница.
*б14:8 «Господьын виян кидше йымалне»: тидым «нимо деч лӱдде» манынат кусараш лиеш.
Глава 14