Выбрать язык
Книги Ветхого Завета
Книги Нового Завета
с русским текстом1 Манеш-манешым ит шаркале. Шояк таныклыше лийын, титакан еҥлан ит полшо.2 Калык тӱшка почеш осал пашашке ит ушно. Шуко еҥлан келшаш манын, ӱчашымашан пашам судитлыме годым чын деч ит кораҥ.3 Нужна еҥым нужна улмыжлан кӧра судышто чыныш ит лук.
4 Тушманетын йомшо ӱшкыжшым але осёлжым муат гын, тудым озаж деке конден кодо.5 Тушманетын осёлжым неле нумалтышыжлан кӧра камвочшым ужат гын, тудым тыгак ит кодо, а нумалтышыжым руден, озажлан полшо.
6 Нужна еҥетын ӱчашымашан пашажым чын огыл ит судитле,7 шояк титаклымаш дене ит келше. Титакдыме да чын ыштыше еҥым пушташ ит пу, вет Мый титакан еҥым чыныш ом лук.8 Взяткым ит нал, вет тудо ужшо еҥым сокырым ышта, титакдыме еҥын пашажым чын огылыш луктеш.
9 Йот мланде гыч толшо еҥым ит шыгыремде, [тудым ит пызыре]: те толшо еҥын илышыжым паледа, вет шкежат Египет мландыште йотъеҥ лийында.
10 Куд ий мландетым ӱдӧ да лектышыжым пого,11 а шымше ийын тудым кандаре, ит тӱкӧ. Тек тушто мо шочмым шке калыкетын незерже-влак кочкыт, а кодшыжо янлык-влаклан лиеш. Тыгак ыште виноград аҥат да олив пушеҥге-влакет денат.
12 Куд кече шкендын пашатым ыште, а шымше кечын кане. Ӱшкыжет ден осёлетат каналтышт, ӱдырамаш кулетын эргыже да илаш толшо еҥат шӱлалтышт.13 Мом Мый тыланда ойленам, чыла шуктыза. Моло юмын лӱмыштым ида пелеште, нунын лӱмышт тендан умша гыч лекшашат огытыл.
14 Идалыкыште кум гана Мыйын лӱмеш пайремым эртаре.15 Шергинде пайремым палемде. Кузе Мый тыланет кӱштенам, авив тылзын палемдыме жапыште шым кече шергиндым коч, вет тиде тылзын тый Египет гыч лектынат. Нигӧ Мыйын ончыкем яра кид дене ынже тол.16 Шке пасуштет ӱдымӧ шурнын икымше саскажым погымеке, Угинде пайремым эртаре. Тыгак идалык мучаште, кунам пасуэт гыч чыла поген налат, Саска погымо пайремым палемде.17 Тыйын уло пӧръеҥ тукымет Господь Юмо ончыко идалыкыште кум гана толшаш.
18 [Кунам Мыйым палыдыме калык-влакым тыйын ончычет поктен колтем да илыме веретым кугемдем,] Мыланем надыр вольык вӱрым кондымо годым шушо руаш гыч пыштымым нимомат ит кондо. Мылам кондымо пайрем надырын кояже эр марте ынже код.19 Мланде лектышетын икымше эн сай саскажым Господь Юметын пӧртышкыжӧ кондо.
Казапачам аважын шӧрешыже ит шолто.
20 Тыйым корныштет аралаш да Мыйын [тылат] ямдылыме верышкем конден пурташ манын, Мый ончычет Суксем колтем.21 Тудын ончылно шкендым эскере, мутшым колышт, ит ӱскыртлане – тудо торешланымым чыташ ок тӱҥал, вет чылажымат тудо Мыйын лӱмем дене ышта.22 [Мыйын мутем колышташ, Мый мом ойлем, чылажымат ышташ да Мыйын ойпидышем шукташ тӱҥалыда гын, те чыла тукым кокла гыч Мыйын ойырен налме калыкем лийыда. Вет пӱтынь мланде – Мыйын, а те тушто Мыйын иерей кугыжанышем да святой калыкем лийыда. Теве нине шомакым тый Израиль эрге-влаклан каласе.] Тый тудын мутшым колышташ да Мыйын ойлымем чылажымат шукташ тӱҥалат гын, Мый тыйын тушманетын тушманже лиям, ваштарешет шогалшылан ваштарешыже шогалам.23 Тыйын ончылнет Мыйын Суксем кая да тыйым аморрей, хеттей, ферезей, хананей, [гергесей,] евей да иевусей-влакын илыме мландышкышт наҥгая, да Мый нине калыкым пытарем.24 Тый нунын юмыштлан вуетым ит саве да ит служитле, нунын йӱлашт почеш ит ыште, но юмыштым шалате, кумалме меҥгыштым сӱмырал шу.25 Господь Юмыланда служитлыза, тунам Тудо киндетым, [йошкар аракатым] да вӱдетым суапландара, тендан деч тӱрлӧ черым кораҥда.26 Жап шуде азам ыштыше да азам ыштен кертдыме тыйын мландыштет ок лий. Илышаш кечетым Мый кужум ыштем.
27 Мый тыйын ончычет лӱдмашым колтем. Кеч-могай калык деке миет, кажныжым аптыранымашке пуртем: тый куржшо тушманет-влакын тупыштым веле ужын кодат.28 Тый дечет ончыч Мый лопшаҥгым колтем, нуно тый дечет [аморрей,] евей, [иевусей,] хананей да хеттей-влакым поктен колтат.29 Но мланде пуста ынже лий да тылат зияным кондышо янлык-влак ынышт шукем манын, Мый нуным иканаште ик ийыштак поктен ом колто.30 Тыйын шукеммешкет да тиде мландын озаже лиймешкет, Мый нуным тый дечет изин-изин поктен колташ тӱҥалам.31 Йошкар теҥыз гыч тӱҥалын Филистим теҥыз марте, ир мланде гыч тӱҥалын [кугу Евфрат] эҥер марте Мый тыланет чекым ыштем. Ты мландыште илыше-влакым Мый тыйын кидышкет пуэм, да тый нуным шке дечет поктен колтет.32 [Нунын дене ит варне,] тусо еҥ-влак да нунын юмышт дене ушемым ит ыште.33 Мыйын ончылно тыйым сулыкыш ынышт пурто манын, нуно тыйын мландыштет илышаш огытыл. Нунын юмыштлан служитлаш тӱҥалат гын, тый оптышыш логалат».
Глава 23