Выбрать язык
Книги Ветхого Завета
Книги Нового Завета
с русским текстом1 Господь Моисейлан каласен:
2 «Израиль эрге-влаклан ойло: тек нуно Мыланем пӧлекым кондат. Кажне еҥ деч, кӧн кумылжо уло, Мыланем пӧлекым погыза.3 Теве тыгай пӧлекым нунын деч налшаш улыда: шӧртньым, шийым, тойым,4 тыгак шемалге-канде, шемалге-йошкар, йошкар тӱсан межым, чапле йытын шӱртым, каза пуным,5 йошкар тӱсан тага коваштым, чапле вичкыж коваштым, акаций пушеҥгым,6 лампылан олив ӱйым, елейлан да тамлыпушым лукшо тӱтыртышлан*б аромат-влакым,7 ефод*в ден оҥсакышыш пижыкташ ониксым да моло шергакан кӱм.
8 Тек нуно Мыланем святой верым ыштат, да Мый нунын коклаште илаш тӱҥалам.9 Скинийым, тушто лийшаш ате-ӱзгарым – чылажымат Мыйын ончыктымем семын ыштыза.
10 Ойпидыш шондыкым акаций дене ыштыза: кутышыжо – кок кынергутат пеле, лопкытшо ден кӱкшытшӧ – ик кынергутат пеле.11 Тудым кӧргӧ гычат, тӱжвал гычат яндар шӧртньӧ дене комыжло, кӱшыл тӱржӧ йыр шӧртньӧ дене ыштыме [пунымо] ваям*г колто.12 Ныл шӧртньӧ колчам велен ыште да шондыкын ныл ӱлыл лукышкыжо пижыкте: кок колча – ик велым, кок колча – вес велым.13 Акаций дене кок варам ыште, нуным [яндар] шӧртньӧ дене комыжло.14 Шондыкым нумалаш манын, нуным тудын кок могырыштыжо улшо колчалашке чыке.15 Вара-влак эре колчаште лийшаш улыт, нуным тушеч лукман огыл.16 Шондыкыш Мыйын возымо ойпидышем пыште, тудыжым Мый тыланет пуэм.
17 Шондык комдышым*д яндар шӧртньӧ дене ыште, тудын кутышыжо кок кынергутат пеле, лопкытшо ик кынергутат пеле лийже.18 Шӧртньӧ дене кок херувимым ыште. Нуным таптен ыште да комдышын кок мучашкыже вераҥде:19 ик херувимым ик мучашеш, вес херувимым вес мучашеш комдыш деч нӧлталалт шогышым ыште. Тек нуно комдышын кок мучаштыже лийыт.20 Тек херувим-влак, кӱш нӧлталме шулдырышт дене комдышым петырен, икте-весышт ваштареш шогат, чурийышт комдыш ӱмбаке онча.21 Шондыкым комдыш дене петыре. Шондыкыш Мыйын возымо ойпидышем пыште, тудыжым Мый тыланет пуэм.22 Тый денет вашлийме годым Мый тушто, ойпидыш шондык комдыш ӱмбалне улшо кок херувим коклаште, лиям да тылат тушечын ойлаш тӱҥалам. Израиль эрге-влаклан чыла кӱштымем Мый тыйын гоч ойлаш тӱҥалам.
23 Акаций дене ӱстелым ыште: кутышыжо кок кынергут, лопкытшо ик кынергут, кӱкшытшӧ ик кынергутат пеле лийже.24 Тудым яндар шӧртньӧ дене комыжло, а йырже шӧртньӧ дене [пунымо] ваям колто.25 Ӱстел йыр тыгак пырдыж семын сово лопкытан тӱрым ыште да тушто шӧртньӧ ваям колто.26 Ӱстеллан ныл шӧртньӧ колчам ыште, нуныжым ӱстелын ныл лукешыже, йол тураште пижыкте.27 Ӱстелым нумалаш манын, колча-влак ӱстел тӱр йымалне лийшаш улыт, тушко вара-влак чыкыме лийыт.28 Нине кок варам акаций дене ыште да [яндар] шӧртньӧ дене комыжло – нунын дене ӱстелым нумал кошташ тӱҥалыт.29 Ӱстеллан кӱмыж ден ате-влакым, тыгак йошкар арака надырым йоктараш кувшин ден корка-влакым яндар шӧртньӧ дене ыште.30 Мыйын чурием ончылно лийшаш надыр киндым ӱстембаке эреак пыштен шого.
31 Яндар шӧртньӧ дене светильникым ыште, тудо пӱтынек таптен ыштыме лийже. Светильникын вургыжо, укшлаже, пеледышкоркаже – пеледышйол ден пеледыш лышташыжге – чылажат ик тичмаш лийже.32 Светильникын куд укшыжо лийшаш: кум укш – ик вел гыч да кум укш – вес вел гыч.33 Кажне укшышто миндаль пеледышым ушештарыше кум пеледышкорка – пеледыш лышташ да пеледышйол дене пырля – лийшаш. Светильник гыч лекше чыла куд укшыштат тыгак лийшаш.34 Тудын вургыштыжат миндаль пеледышла койшо ныл пеледышкорка – пеледыш лышташ да пеледышйол дене пырля – лийшаш.35 Светильник вурго гыч лекше икымше мужыр укш йымалне пеледышйол лийшаш, кокымшо мужыр ден кумшо мужыр йымалнат пеледышйол лийшаш. Тудын чыла куд укшыжо йымалнат тыгак лийшаш. [Светильник вургышто миндаль пеледышла койшо ныл пеледышкорка лийже.]36 Светильникын пеледышкоркаж ден укшыжо-влак тудын вургыж гыч лектын шогышаш улыт. Тудо тӱрыснек ик яндар шӧртньӧ моклака гыч таптен ыштыме лийже.37 Тыгак шым лампадым ыште да, светильник ончылнысо кумдыкым волгалтараш манын, нуным светильникыш вераҥде.38 Светильник пелен кучылташлан яндар шӧртньӧ дене шипши-влакым*е да тулшол ате-влакым ыште.39 Светильник да тудын пелен кучылтшаш ӱзгар-влакым ик талант*ж яндар шӧртньӧ дене ыштыман.40 Ончо, чылажымат тыланет курыкышто ончыктымо гайымак ыште.
*а 25 Скиний – Синай ир мландыште коштмышт годым еврей-влакын пеленышт нумал коштмо святой кугу омашышт.
*б 25:6 Тӱтыртыш – смесь для каждения.
*в 25:7 Ефод – архиерейын чийыме вургемжын ик ужашыже, тудо ончылсакышла коеш.
*г 25:11 Вая – кайма.
*д 25:17 Шондык комдыш – тидым «эрналтме вер» манынат кусараш лиеш.
*е 25:38 Шипши – щипцы.
*ж 25:39 Талант – нелыт виса, 35 кг наре.
Глава 25