Выбрать язык
Книги Ветхого Завета
Книги Нового Завета
с русским текстом1 Господь Моисейлан каласен:2 «Уло Израиль калыклан ойло: святой лийза, вет Мый, тендан Господь Юмыда, святой улам.
3 Кажныже шке ача-аважым жаплыже, Мыйын шуматкече-влакем шуктен шогыжо. Мый Господь, тендан Юмыда, улам.
4 Шояк юмо-влак почеш ида кай, шкаланда велыме юмо-влакым ида ыште. Мый Господь, тендан Юмыда, улам.
5 Кунам Господьлан татулык надырым кондеда, поро кумылым сулен налаш манын, тидым кӱлеш семын ыштыза.6 Надырым кондымо кечын да эрлашыжым кочкаш лиеш, а кумшо кечылан мо кодшыжым тулеш йӱлатыман.7 Надыр шылым кумшо кечын кочкыт гын, тыгай шыл ару огыл – тудо Господьлан йӧрдымӧ лийын.8 Кӧ тудым кочкеш – сулыкыш пура, вет тудо Господьлан пуымо святой надырым шакшыла. Тыгай еҥ шке калыкше кокла гыч кораҥдыме лиеш.
9 Кунам шке мландыштыда шурным тӱредаш тӱҥалыда, пасу тӱр марте ида тӱред, тӱредме деч мо кодшымат ида пого.10 Виноград аҥа гыч саскам икте кодде ида пого, йогышо саскамат ида нал. Тудым йорлылан да йотъеҥлан кодыза. Мый Господь, тендан Юмыда, улам.
11 Ида шолышт, ида шойышт, икте-весыдам ида ондалкале.12 Мыйын лӱмем дене шояклен ида товатле, тидын дене шке Юмыдан лӱмжым ида шӱктаре. Мый Господь [Юмыда] улам.
13 Лишылъеҥетым ит шыгыремдыл, тудым ит аге. Тарлыме еҥлан пашадарым эр марте тӱлыде ит кодо.
14 Соҥгырам ит игылт, сокыр ончылан, шӱртньыжӧ манын, нимомат ит опто. Шке [Господь] Юмет деч лӱд. Мый Господь [Юмыда] улам.
15 Чын огыл ит судитле. Судышто йорло еҥлан нужна улмыжлан кӧра ит полшо, кугу тӧра ончылнат сайын кояш ит тӧчӧ. Кажныжым чын судитле.16 Калык коклаште манеш-манешым шаркален ит кошт, шояк титаклымаш дене лишылъеҥетын илышыжым ит пытаре. Мый Господь [Юмет] улам.
17 Шӱмыштет лишылъеҥет деке ужмышудымашым ит кучо. Тудо йоҥылыш пашам ыштен гын, тидын нерген луктын ойло – тунам тый тудын сулыкшылан мутым от кучо.18 Шке калыкет гыч нигӧлан ӱчым ит шукто, нунылан шыдым ит кучо. Лишылъеҥетым шкендым йӧратыме семынак йӧрате. Мый Господь [Юмыда] улам.
19 Мыйын пунчал-влакем шуктен шогыза. Кок тӱрлӧ вольыкым ида тӱжаҥдаре, ик пасуэш кок тӱрлӧ нӧшмым ида ӱдӧ, кок тӱрлӧ шӱртӧ – меж да йытын – дене куымо вургемым ида чий.
20 Кӧ вес пӧръеҥлан сӧрымӧ кул ӱдырамаш дене мала, но тудыжым эше, тӱлен налын, эрыкыш колтен огытыл – нуным когыньыштымат мут кучаш шогалтыман. Но пуштман огыл, вет тиде ӱдырамаш эрыкан огыл.21 Тек пӧръеҥже Юмо дене вашлийме омашыш пурымо вер деке Господьлан шке титакше верч надыр шотеш тагам конда.22 Титак верч надыр тагам конден, пӧръеҥын сулыкшо верч иерей тудын дене Господь ончылно касарыме йӱлам шукта. Тунам пӧръеҥын сулыкшо кудалтыме лиеш.
23 Кунам те [Господь Юмын пуышаш] мландышкыже миеда да саскам пуышо пушеҥге-влакым шындеда, нунын саскашт тыланда кум ий пӱчдымӧ, ару огыл лийшаш улыт. Нуным кум ий кочкаш ок лий.24 Нылымше ийын куанен пайремлыме годым уло саскам Господьлан святой надыр семын пуыза.25 А визымше ийын саскам кочкын кертыда. Тыге лектышда эре улан лиеш. Мый Господь, тендан Юмыда, улам.
26 Шылым вӱрге ида коч. Ида мужед, ида юзылане.27 Ӱпдам вуйвичкыж тураште ида тӱред, пондаш мучашдамат тӱредын ида локтыл,28 колышо-влаклан кӧра капдам ида коркале, ӱмбаланда шуркален ида возкале.*а Мый Господь [Юмыда] улам.
29 Ӱдыретлан яжарланаш пуэн, тудым ит шӱктаре.*б Уке гын уло мландыда яжарланаш тӱҥалеш да йырнык дене темеш.
30 Мыйын шуматкече-влакем шуктен шогыза, Мыйын святой верем пагалыза. Мый Господь улам.
31 Колышын чонжым ӱжын лукшо-влак деке ида кай, юзо-влак декат ида кошт, нунын дене шкендам ида амырте. Мый Господь, тендан Юмыда, улам.
32 Чал вуян ончылно шогал, шоҥгыеҥым пагале. Шке [Господь] Юмет деч лӱд. Мый тендан Господь [Юмыда] улам.
33 Кунам тендан мландыштыда йотъеҥ илаш тӱҥалеш, тудым ида шыгыремдыл.34 Тендан дене илыше тыгай еҥым шкендан семынак ончыза. Тудым шкендам йӧратыме семын йӧратыза, вет теат Египет мландыште йотъеҥ лийында. Мый Господь, тендан Юмыда, улам.
35 Судитлыме годым да кужытым, нелытым, йоҥгытым висыме годым ида ондалкале.36 Тек тендан виса ден кирда, ефа ден гинда чын ончыктышо лийыт. Мый тендам Египет мланде гыч лукшо Господь Юмыда улам.37 Мыйын чыла пунчал ден законем шуктен шогыза, нунын почеш илыза. Мый Господь, [тендан Юмыда,] улам».
*а 19:27-28 Тыште Ханаан калык-влакын йӱлашт нерген ойлалтеш, нуно колышо-влак шотышто ойганымыштым тыге ончыктеныт.
*б 19:29 Мланде сай лектышым пуыжо манын, Ханаан калык-влакын шке юмышт-влаклан кумалме йӱлашт почеш ача-влак шке ӱдырыштым яжарланаш пуэн кертыныт. Израиль калыклан Господь тидым ышташ чарен.
Глава 19