Выбрать язык
Книги Ветхого Завета
Книги Нового Завета
с русским текстом1 Господь Моисейлан каласен:2 «Калыкым ӱжын погаш да станым рончаш кӱлмӧ нерген увертараш ший гыч таптыме кок тӧтыретпучым ыште.3 Кок пучшо денат пуалтат гын, уло калык тый декет Юмо дене вашлийме омашыш пурымо вер деке погынышаш,4 а ик пуч дене пуалтат – тый декет Израиль калыкын онжо-влак, тудын тукымвуйжо-влак, погынышаш улыт.5 Кунам пуч-влак тургыж йӱкым луктын пуалтат, тек эрвелне улшо стан-влак тарванат,6 кокымшо гана тургыж йӱкын пуалтат – кечывалвелне улшо стан-влак, [кумшо гана – теҥыз велне улшо стан-влак, нылымше гана – йӱдвелне улшо стан-влак тарванат.] Тургыж йӱкын пуалтымаш тарванен каяш кӱлмым ончыкташ тӱҥалеш.7 А калыкым погынымашке чумыраш кӱлмӧ годым тӧтыретпуч дене тургыж йӱкын огыл, а тыглайын пуалтыман.
8 Тӧтыретпуч дене Ааронын иерей эргыже-влак пуалтышаш улыт. Тиде тыланда курым-курымешлан, тукым гыч тукымыш шуктен шогышашлык закон.9 Кунам шке мландыштыда ӱмбакыда кержалтше тушман ваштареш каеда – тӧтыретпучдам тургыж йӱкын пуалтыза, тунам Господь Юмыда тендан нерген шарналта да тушманда деч утара.10 Тыгак куан кечыда годым, пайрем ден у тылзе годым, йӱлалтен пуымо надыр ден татулык надырдам конден, тӧтыретпучым пуалтыза. Тиде Юмыда ончылно тендан нерген шарныктыш лиеш. Мый Господь, тендан Юмыда, улам».
11 Египет гыч кайымеке, кокымшо ийын кокымшо тылзын колымшо кечынже Юмо дене вашлийме омаш ӱмбач пыл нӧлталтын.12 Израиль калык Синай ир мланде гыч корныш тарванен. Пылын Фаран ир мландеш шогалмешкыже, нуно ик вер гыч вес верыш куснен каеныт.13 Тыге нуно Господьын Моисей гоч кӱштымыж почеш икымше гана корныш тарваненыт.14 Эн ончыч Иуда стан тӱшкан-тӱшкан, шке тистыжым нӧлталын, корныш тарванен. Иуда тукымын вуйлатышыже Наассон, Аминадав эрге, лийын.15 Иссахар тукымын вуйлатышыже Нафанаил, Цуар эрге, лийын.16 Завулон тукымын вуйлатышыже Елиав, Хелон эрге, лийын.
17 Скинийым рончымеке, тудым нумал кайыше Гирсон ден Мерари тукым пӧръеҥ-влак тарванен каеныт.
18 Вара Рувим стан тӱшкан-тӱшкан, шке тистыжым нӧлталын, корныш тарванен. Рувим тукымын вуйлатышыже Елицур, Шедеур эрге, лийын.19 Симеон тукымын вуйлатышыже Шелумиил, Цуришаддай эрге, лийын.20 Гад тукымын вуйлатышыже Елиасаф, Дегуил эрге, лийын.21 Вара, святой арвер-влакым нумалын, Кааф тукым еҥ-влак каеныт. Нунын миен шумыштлан скинийым шогалтеныт улмаш.
22 Нунын почеш, шке тистыжым нӧлталын, Ефрем стан тӱшкан-тӱшкан корныш тарванен каен. Ефрем тукымын вуйлатышыже Елишама, Аммиуд эрге, лийын.23 Манассий тукымын вуйлатышыже Гамалиил, Педацур эрге, лийын.24 Вениамин тукымын вуйлатышыже Авидан, Гидеоний эрге, лийын.25 Чыла стан кокла гыч пытартышлан, шке тистыжым нӧлталын, Дан стан тӱшкан-тӱшкан корныш тарванен. Дан тукымын вуйлатышыже Ахиезер, Аммишаддай эрге, лийын.26 Асир тукымын вуйлатышыже Пагиил, Охран эрге, лийын.27 Неффалим тукымын вуйлатышыже Ахира, Енан эрге, лийын.28 Теве тыгай радам дене израиль эрге-влак тӱшкан-тӱшкан тарванен каеныт.
29 Моисей шке оньыкугызажын, мадиан Рагуилын, Ховав эргыжлан каласен: «Ме Господьын мыланна пуаш сӧрымӧ верышке каена. Айда мемнан дене пырля, ме тылат порым ыштена. Господь израиль калыклан шуко сайым сӧрен».30 Но Ховав тыге вашештен: «Тендан дене ом кай, мый шке элышкем, шочмо верышкем пӧртылам».31 Тунам Моисей каласен: «Мемнам ит кодо. Ир мландыште шогалаш лийме верлам тый сайын палет. Тый мемнан шинчана лият.32 Мемнан дене пырля кает гын, Господьын мыланна пуымо суапшым ме тый денет пайлена».
33 Тыге нуно Господьын курыкшо деч тарванен каеныт да корнышто кум кече лийыныт. Нунылан шогалме верым ончыкташ манын, кум кечынат нунын ончыч Господьын ойпидыш шондыкшо каен.34 Кунам нуно канаш шогалме верыштым коден каеныт, нунын ӱмбалне эре Господьын пылже лийын.35 Кунам святой шондыкым нӧлталыныт да корныш тарваненыт, Моисей тыге ойлен: «Кынел, Господь! Тек Тыйын тушманет-влак шаланен пытат, Тыйым ужмышудымо-влак Тыйын чуриет деч куржыт!»36 А кунам шондык чарнен шогалын, Моисей ойлен: «Господь, тӱжем-тӱжемле израиль калыкет деке пӧртыл!»
Глава 10