Выбрать язык
Книги Ветхого Завета
Книги Нового Завета
с русским текстом1 Тунам уло калык йӱк-йӱаным нӧлталын да тиде йӱдым шортын эртарен.2 Израиль эрге-влак Моисей ден Аарон ваштареш ӧпкелен ойленыт: «Египетыште але тиде ир мландыште колена ыле гын, сайрак лиеш ыле!3 Молан Господь мемнам тиде мландыш наҥгая? Тушто ме керде деч колена, ватына ден йочана-влак тушман кидыш логалыт! Египетыш мӧҥгеш пӧртылына гын, мыланна сайрак лиеш огыл мо?»4 Еҥ-влак икте-весыштлан ойленыт: «Шкаланна вуйлатышым шогалтена да Египетыш пӧртылына!»
5 Моисей ден Аарон погынышо уло израиль калык шинча ончылно кумык возыныт.6 Мландым ончаш миен коштшо Нав эрге Иисус ден Иефонний эрге Халев вургемыштым кушкедыныт7 да уло калыклан каласеныт: «Мемнан ончен коштмо мландына пеш чот, пеш чот сай.8 Господь мемнан деке поро кумылан гын, Тудо мемнам шӧр ден мӱй йогыман ты мландыш пурта да тудым мыланна пуа.9 Господь ваштареш гына ида шогал. Ты мландысе калык деч ида лӱд, ме нуным сеҥена. Нунын аралтышышт уке, а мемнан дене – Господь. Ида лӱд нунын деч».
10 Но уло калык Иисус ден Халевым кӱм кышкен пушташ ойлен. Тунам Господьын чапше Юмо дене вашлийме омашыште [пыл семын] чылаштлан кончен.11 Господь Моисейлан каласен: «Эше мыняр жап тиде калык Мыйым шотлыде илаш тӱҥалеш? Тынар палдарыше палым ончыктымем ӱмбач тудо Мылам эше мыняр жап ӱшанаш ок тӱҥал?12 Шучко черым колтен, Мый нуным чылаштым пытарем. А тый дечет [да тыйын ачатын тукымжо деч] вес калыкым ыштем, тиде калык деч тудо шукырак да виянрак лиеш».
13 Тунам Моисей Господьлан каласен: «Тидын нерген египтян-влак колыт. Вет нунын деч Тый тиде калыкым шке виет дене луктынат.14 Тидын нерген нуно тыште илыше калык-влаклан каласат. Нунышт колыныт: Тый, Господь, тиде калык дене пырля улат да тудлан шке ӱжакатым*а ужаш пуэнат. Тыйын пылет тиде калык ӱмбалне шога, нунын ончыч Тый кечывалым пыл меҥге семын, а йӱдым тул меҥге семын кает – тидым нуно палат.15 Тиде калыкым Тый икте кодде пытарет гын, Тыйын нергенет колшо калык-влак тыге каласат:16 ”Господь тиде калыкым товатлен сӧрымӧ мландышкыже пуртен кертын огыл, садлан тудым ир мландыште пытарен”.17 Тыгеже, тек Господьын куатше ончыктымо лиеш! Вет Тый Шке каласенат:18 ”Господь кужун чытыше, чот чаманыше [да чынле]. Тудо – закондымылыкым, осал ыштымым [да сулыкым] кудалтыше. Но титакан-влакым мут кучыктыде ок кодо: ачаштын сулыкыштлан Тудо нунын йочаштым кумшо да нылымше тукым марте мут кучаш шогалта”.19 Кузе Тый тиде калыкым Египет гыч кайымыж деч тачысе кече марте серлаген шогенат, тыгак кызытат шке порылыкетлан кӧра тиде калыкын сулыкшым кудалте».
20 Тунам Господь [Моисейлан] каласен: «Тыйын йодмет почеш Мый нунын титакыштым кудалтем.21 Но шке илышем дене да уло мландым темыше чапем дене Мый товатлем:22 кӧ Египетыште да ир мландыште ончыктымо Мыйын чапем ден палдарыше пале-влакем ужын, но Мыйын чытымашем лу гана терген да Мыйын йӱкем колыштын огыл –23 нунын кокла гыч нигӧат ача-кочаштлан товатлен сӧрымӧ мландем ок уж. [Тыште Мый денем улшо, сай ден осалым ойыркален моштыдымо йочаштлан веле мландым пуэм – нуно эше изи улыт, нимом огыт умыло.] А Мыйым шотлыдымо-влак нигӧат тиде мландым огыт уж.24 Но Мыйын Халев тарзем вес тӱрлӧ шӱлышан: тудо Мыйым уло шӱм-чон дене колыштеш. Сандене Мый тудым ужын коштмо мландышкыже пуртем, тудын тукымжо тиде мландын озаже лиеш.25 Тиде лапверыште амалик ден хананей-влак илат. Эрла савырныза да Йошкар теҥыз дек наҥгайыше корно дене ир мландыш кайыза».
26 Господь Моисей ден Ааронлан каласен:27 «Мыняр жап эше тиде осал калык Мыйын ӱмбакем ӧпке мутым ойлаш тӱҥалеш? Вет Мый Израиль эрге-влакын ӧпкелен ойлымыштым колам.28 Каласе нунылан: Господь тыге ойла: ”Шке илышем дене товатлем – мом те Мыланем йӱкын ойленда, тидымак Мый тыланда ыштем.29 Те, калыкым шотлен лукмо чотыш пурышо, коло ияш деч кугурак ийготан-влак, тиде ир мландыште коледа. Те Мыйын ваштареш ӧпкелен ойленда.30 Сӧрымӧ мландышкем тендам илаш пурташ Мый кидем нӧлталын товатленам гынат, тендан кокла гыч тушко нигӧ ок пуро. Лач Халев, Иефонний эрге, да Иисус, Нав эрге, тиде мландыш пурат.31 Те ”йочана-влак тушман кидыш логалыт” манын ойленда ыле. А теве нуным Мый тиде мландыш пуртем. Нуно тендан кӱлдымыш лукмо тиде мландын могай улмыжым пален налыт.32 А те тиде ир мландыште коледа.33 Тендан шочшыда-влак ир мланде мучко нылле ий кусныл кошташ тӱҥалыт. Тыге нуно Мыланем ӱшанле огыл улмыда верч орланаш тӱҥалыт. Икте кодде колен пытымешкыда тиде шуйна.34 Нылле кече те тиде мландым ончен коштын улыда. Тиде чот почеш те нылле ий сулыкда верч орланаш тӱҥалыда: ик кечылан – ик ий. Тунам те Мыйын кугу шыдем пален налыда.35 Тидым Мый, Господь, ойлем да Мыйын ваштареш шогалше тиде осал калык дене тыгак ыштем. Нуно чыланат тиде ир мландыште шке мучашыштым муыт, нуно тышан пытат».
36 Мландым ончаш Моисейын колтымо еҥже-влак, пӧртылмекышт ты мланде нерген удам ойлышо да тыге уло израиль калыкым Моисей ваштареш ӧпкелен ойлаш таратыше-влак,37 тиде мланде нерген уда шомакым шаркалыше еҥ-влак Господь ончылно коленыт – Тудо нуным пытарен.38 Мландым ончаш мийыше-влак кокла гыч лач Иисус, Нав эрге, да Халев, Иефонний эрге, илыше кодыныт.
39 Чыла тиде мутым Моисей израиль калыклан каласен, да калык пеш чот ойгаҥын.40 Вес кечын эрдене эрак еҥ-влак курыкан кундемыш каяш тарваненыт. Нуно ойленыт: «Ме сулыкыш пуренна. Но кызыт Господьын ойлымо вершӧрышкыжӧ каена».41 Моисей каласен: «Молан те Господьын кӱштымыжым огыда колышт? Тендам сеҥымаш ок вучо.42 Ида кошт тушко – Господь тендан дене огыл, тушман тендам кырен шалата.43 Тушто амалик ден хананей-влак улыт, те керде деч коледа. Вет те Господь деч кораҥында, Тудо тендан дене пырля огеш лий».
44 Но калык садак ӱскыртланен курыкыш кӱзен, а Моисей ден Господьын ойпидыш шондыкшо станыштак кодыныт.45 Курыклаште илыше амалик ден хананей-влак, ӱлык волен, израиль эрге-шамычым кырен шалатеныт да Хорма марте пытарен каеныт. [Варажым нуно мӧҥгеш станыш пӧртылыныт.]
*а 14:14 Ӱжака – образ, облик, силуэт.
Глава 14