Выбрать язык
Книги Ветхого Завета
Книги Нового Завета
с русским текстом1 Господь Ааронлан каласен: «Святой верыште иктаж-мом кӱлеш семын огыл ыштымылан тый, тыйын эргыч-влак да уло тукымет мутым кучаш тӱҥалыда, а иерей сомылым кӱлеш семын шуктыдымылан тый да эргыч-влак титакан лийыда.2 Левий тукым иза-шольыч-влакым, шке ачатын тукымжым, шке декет нал: тек нуно пеленет лийыт, ойпидыш скиний ончылно служитлымыда годым тыланет да эргыч-влаклан полшен шогаш тӱҥалыт.3 Тек нуно тыланет полшат да скиний пелен пашам шуктат, но святой верысе арвер ден жертвенник деке огыт лишем. Уке гын нуно колат, нунын дене пырля теат коледа.4 Тек нуно тый денет лийыт да Юмо дене вашлийме омаш пелен шке сомылыштым шуктен шогат. Но нигӧ вес еҥ тендан деке ынже лишем.5 Святой верыште да жертвенник пелен ыштышаш пашам те шуктен шогышаш улыда – тунам Мыйын шыдем Израиль калык ӱмбак тетла ок ылыж.
6 Израиль калык кокла гыч левит-влакым, тендан иза-шольыдам, Мый Шкаланем налынам да нуным, Юмо дене вашлийме омаш пелен полшен шогышт манын, тыланда пӧлек семын пуэнам.7 А жертвенник дене кылдалтше да пӱрдыш шеҥгелне шуктышаш иерей сомылым тый да тыйын эргыч-влак гына ыштышаш улыда. Иерей пашам Мый тыланда пӧлек семын пуэм. Моло вес еҥ тышке лишемеш гын, тудо пуштмо лиеш».
8 Господь Ааронлан эше каласен: «Мылам кондымо чыла надырым эскерен шогаш Мый тыланет ӱшанем. Израиль эрге-влакын мо кондымышт деч палемдыме ужашым Мый тыланет да тыйын эргыч-влаклан пуэм. Закон почеш тудо курым-курымешлан тендан лиеш.9 Поснак святой надыр кокла гыч мом огыт йӱлалте, тыланет лиеш. Мыланем пуымо поснак святой надыр гыч ужаш – тиде кинде надыр, сулык верч але титак верч кондымо надыр лийже – тылат да тыйын эргыч-влаклан лиеш.10 Тидым святой верыште кочса. Уло пӧръеҥ тукымет, [тый да эргыч-влак,] тудым кочкын кертыда. Тек тудо тыланет святой лиеш.11 Израиль калыкын нӧлтал пуымо чыла надырже тыйын лиеш. Мый тудым тыланет, эрге ден ӱдырет-влаклан пуэм. Закон почеш тудо курым-курымешлан тендан лиеш. Тыйын пӧртыштет илыше кажне ару еҥ тудым кочкын кертеш.
12 Тыгак калыкын Господьлан у лектыш гыч кондымо эн сай олив ӱйым, йошкар аракам да киндым Мый тылат пуэм.13 Господьлан кондымо чыла у саска тыйын лиеш. Тыйын пӧртыштет илыше кажне ару еҥ тудым кочкын кертеш.14 Израильыште мом Господьлан пӧртылташ лийде пуат, чыла тыйын лиеш.15 Айдемын да вольыкын икымше шочшышт, кудыштым Господьлан кондат – тыйын лийыт. Но тыгодым айдемын да ару огыл вольыкын икымше шочшышт мӧҥгеш тӱлен налме лийшаш улыт.16 Тек нуным ик тылзаш лиймекышт сулен налыт. Тӱлен налме ак – вич сикль ший, тудым святой сикль дене шотлыман, ик сикльыштыже – коло гера.17 А икымше шочшо ӱшкыжым, тагам але казатагам тӱлен налаш ок лий: нуно святой улыт. Вӱрышт дене жертвенникым шыжыкте, а кояштым Господьлан келшыше тамлыпушан надыр шотеш йӱлалтен тӱргыктӧ.18 Нунын шылышт, нӧлтал пуымо оҥ ден пурла эрде семынак, тыйын лийыт.19 Чыла, мом израиль калык Господьлан святой пӧлек шотеш конда – тидым Мый тыланет да эрге ден ӱдырет-влаклан закон почеш курым-курымешлан пуэм. Тиде пудырташ лийдыме курымаш ойпидыш,*а тудым Господь тый денет да тыйын тукымет дене ыштен».
20 Господь Ааронлан каласен: «Израиль эрге-влак коклаште тыйын мланде ужашет ок лий, нунын дене пырля тыйын пает ок лий. Израиль эрге-влак коклаште тыйын ужашет да пает Мый лиям.21 Левий эрге-влакын Юмо дене вашлийме омаш пелен сомылым шуктымыштлан Мый нунылан мланде пай олмеш Израильыште погымо чыла луымшо ужашым пуэм.22 Моло израиль эрге-влак Юмо дене вашлийме омаш дек тетла ынышт лишем. Кӧ лишемеш – тудо титакан лиеш да кола.23 Юмо дене вашлийме омаш пелен сомылым лач левит-влак гына шуктышаш улыт. Тушто иктаж-мом йоҥылыш ыштымыштлан мутым нуно кучаш тӱҥалыт. Тиде тыланда тукым гыч тукымыш, курым-курымеш шуктен шогышаш закон. Но израиль калык коклаште левит-влакын мланде пайышт ок лий.24 Левит-влаклан пай олмеш Мый израиль эрге-влакын Господьлан надыр пӧлек шотеш кондымо луымшо ужашыштым пуэм. Теве молан Мый каласышым: ”Израиль эрге-влак коклаште нунын пайышт огеш лий”».
25 Господь Моисейлан каласен:26 «Левит-влаклан ойло: кунам те израиль калык деч луымшо ужашым налыда – тудым Мый тыланда мланде пай олмеш пуэнам – тиде луымшо ужаш гыч эше тудын луымшо ужашыжым Господьлан пӧлек семын ойырыза.27 Тиде кондымыда идым гыч пырчым але темден лукмо вер гыч виноград вӱдым Господьлан пӧлеклыме семын шотлалташ тӱҥалеш.28 Тыге теат Израиль калык деч налме чыла луымшо ужаш гыч Господьлан пӧлекым ыштеда. Господьлан кондымо тиде пӧлекым иерей Ааронлан пуыза.29 Тыланда кондымо чыла пӧлек гыч Господьлан ужашым ойырыза – чыла святитлыме гыч эн сайжым Мыланем пуыза.30 Левит-влаклан каласе: ”Тиде сай ужашым ойырымеке, молыжо идым гыч але темден лукмо вер гыч кондымо семын тыланда кодеш.31 Тиде тыланда Юмо дене вашлийме омаш пелен шуктен шогымо сомылланда пашадар лиеш. Тудым те, [эргыда-влак да] мӧҥгысӧ-влакда кеч-могай верыште кочкын кертыда.32 Луымшо ужаш гыч эн сай ужашым кондеда гын, тыге ыштымылан титакан огыда лий. Тунам те израиль калыкын кондымо надыржым огыда шакшыле да ода коло”».
*а 18:19 Пудырташ лийдыме ойпидыш – еврей текстыште ’шинчал ойпидыш’. «Шинчал» ойпидышын курымеш аралалтмыж нерген ойла.
Глава 18