Выбрать язык
Книги Ветхого Завета
Книги Нового Завета
с русским текстом1 Кечывалвел ир мланде тӱрыштӧ верланыше Арад олан хананей кугыжаже, израиль калыкын Афарим корно дене толмыжым пален налмеке, нунын ӱмбаке керылтын да икмыняр еҥым пленыш налын.2 Тунам израиль калык Господьлан сӧрен каласен: «Тиде калыкым мемнан кидыш пуэт гын, ме [нуным шкеныштым] да олаштым, Тыланет надыр шотеш пӧлеклен, пӱтынек пытарена».3 Господь израиль калыкын йодмыжым колын да хананей-влакым нунын кидыш пуэн. Израиль калык хананей-влакым да нунын олаштым, Господьлан надыр шотеш пӧлеклен, пӱтынек пытарен да тиде верым Хорма*а манын лӱмден.
4 Едом мландышке пураш огыл манын, израиль калык Ор курык дечын Йошкар теҥыз велыш каен. Кайымышт годым еҥ-влакын чытышышт пыташ тӱҥалын.5 Нуно адакат Юмо да Моисей ваштареш ӧпкелен ойлаш тӱҥалыныт: «Молан те мемнам Египет гыч луктында? Ир мландыште колашлан мо? Вет тыште киндат, вӱдат уке, а тиде йӧрдымӧ кочкыш шернам темен!»
6 Тунам Господь калык ӱмбак аяр кишке-влакым колтен. Кишке чӱҥгалме дене шуко израиль еҥ колен.7 Калык Моисей деке толын да каласен: «Господь да тыйын ваштареш ӧпкелен ойлен, ме сулыкыш пурен улына. Кумал Господьлан, тек нине кишке-влакым мемнан деч кораҥда». Моисей калык верч [Господьлан] кумалын.8 Господь Моисейлан каласен: «[Той] кишкым ыште да вара вуйыш пижыктен шынде. Тек кишке чӱҥгалман кажне еҥ ты кишке ӱмбак ончалеш – тунам тудо илыше кодеш».9 Моисей той кишкым ыштен да вара вуйыш пижыктен. Иктаж-кӧм кишке чӱҥгалын да тудыжо той кишке ӱмбаке ончалын гын, тыгай еҥ илыше кодын.
10 Израиль эрге-влак корныштым умбакыже шуеныт да Овофеш шогалыныт.11 Вара Овоф гыч каеныт да Моав деч эрвелне улшо ир мландысе Ийе-Аваримеш шогалыныт.12 Тушеч кайымеке, Заред лапвереш шогалыныт,13 вара тышеч каеныт да аморрей чек воктечын йоген кайыше Арнон эҥер вес велысе ир мландеш шогалыныт. Тиде эҥерже Моав ден аморрей-влак коклаште чек лийын.14 Сандене «Господьын сарже-влак» книгаште каласыме:
15 «... Суфысо Вагеб, Арнонын вӱдкоремже-влак,
Шебет-Ар могырыш шуйнышо лапвер тайыл-влак
2 Моав чек деке шуыт».
16 Тушечын нуно Беэр*б таве деке каеныт. Тушто Господь Моисейлан каласен: «Калыкым пого, Мый нунылан вӱдым пуэм».17 Тунам Израиль тиде мурым мурен:
«Вӱд дене тем, таве! Мурыза тудын нерген!
18 Калык кугурак-влак тиде тавым кӱнченыт,
он-влак кучемвий тояшт да пондышт дене тудым кӱнченыт».
Ир мланде гыч нуно Матаннаш каеныт.19 Матанна гыч – Нагалиилыш, Нагалиил гыч – Вамофыш,20 Вамоф гыч Моав мландысе лапверыш каеныт. Тудыжо ир мланде могырыш ончышо Фасга курык воктене лийын.
21 Израиль эрге-влак Сигон деке, аморрей кугыжа деке, шке уверзе-влакым тыгай [тыныс темлымаш] дене колтеныт:22 «Поро лий, шке мландет гоч эртен каяш пу. [Ме корно дене каена,] пасу ден виноград аҥашке огына пуро, тавет-влак гыч вӱдым йӱаш огына тӱҥал. Тыйын мландетым эртымешке, Кугыжан корно дене гына каена».23 Но Сигон израиль калыкым шке мландыж гоч колташ кӧнен огыл. Чыла шке сарзывийжым поген, тудо ваштарешышт ир мландыш лектын да, Яац деке миен шумеке, нунын дене кредалаш пижын.24 Израиль эрге-влак тудым керде дене кырен шалатеныт, мландыжым Арнон эҥер деч Иавок изэҥер дек шумеш – Аммон чек марте – шкаланышт поген налыныт. А аммон-влакын чекышт чоткыдемдыме лийын.25 Аморрей-влакын чыла олаштым – Есевоным да тудын йыр улшо илем-влакым – Израиль сеҥен налын да тушто илаш тӱҥалын.
26 Есевон ола аморрей кугыжа Сигонын лийын. Тудыжо Моавын ончычсо кугыжаж дене кредалын да тудын мландыжым Арнон эҥер марте поген налын.27 Садланак вет мурызо-влак тыге мурат:
«Кайыза Есевоныш!
Тек Сигонын олажым чоҥат, угыч нӧлталыт!
28 Есевон гыч тул лектын,
тулйылме лектын Сигонын олаж гыч!
Тудо Ар-Моавым йӱлалтен,
Арнон воктенысе кӱкшака-влакын озаштым пытарен.
29 Ойго тылат, Моав!
Тый, Хамосын*в калыкше, пытарыме улат!
Тыйын эргыч-влак куржын пытеныт,
ӱдырет-влакым аморрей кугыжа Сигон пленыш налын.
30 Пикш дене ме нуным пытаренна,
Есевон гыч Дивон марте чыла пытен!
Медева воктенысе Нофа марте ме чыла шалатенна!»
31 Тыге израиль калык аморрей мландыште илаш тӱҥалын.32 Моисей икмыняр еҥым Иазер олам ончал толаш колтен. Вара израиль калык [тиде олам,] тудын йыр улшо илем-влакым руалтен налын да тушто илыше аморрей-влакым поктен колтен.
33 Тушечын израиль калык савырнен да Васаныш наҥгайыше корно дене каен. Васан кугыжа Ог, уло сарзывийжым поген, Едрей воктене израиль калык ваштареш кредалаш лектын.34 Господь Моисейлан каласен: «Ит лӱд тудын деч. Мый тудым уло калыкше да мландыжге тыйын кидышкет пуэм. Кузе тый Есевонышто илыше аморрей кугыжа Сигон дене ыштенат, тидын денат тугак ыште».35 Израиль эрге-влак Ог кугыжам, тудын эргыж-влакым, тыгак чыла сарзыжым икте кодде пытареныт да тиде мландыланат оза лийыныт.
*а 21:3 Хорма – ’пытарымаш’ манмым ончыкта.
*б 21:16 «Беэр» еврей йылмыште ’таве’ манмым ончыкта.
*в 21:29 Хамос – моав-влакын юмышт.
Глава 21