Выбрать язык
Книги Ветхого Завета
Книги Нового Завета
с русским текстом1 Моисей уло израиль калыкым поген да нунылан каласен: «Колышт, Израиль, мый таче тыланда пунчал ден закон-влакым увертарем. Нуным тунемза да шуктен шогыза.2 Господь, мемнан Юмына, Хорив курык ӱмбалне мемнан дене ойпидышым ыштен.3 Господь тиде ойпидышым ача-кочана дене веле огыл, а чыланна денат ыштен, кӧмыт таче тыште илыше улына.4 Господь тендан дене курыкышто тул лоҥга гыч шинчаваш кутырен.5 Те тул деч лӱдында да курыкыш кӱзен огыдал, садлан мый, Господьын шомакшым тыланда увертараш манын, тендан ден Господь коклаште шогенам. Тунам Тудо каласен:
6 ”Мый Господь, тыйын Юмет, улам. Мый тыйым Египет мланде гыч, кул лийме вер гыч, луктынам.
7 Мый дечем моло вес юмет ынже лий.
8 Шкаланет шояк юмым ит ыште: мо кӱшнӧ каваште, мо ӱлнӧ мландыште, мо мланде деч ӱлнӧ вӱдыштӧ уло – нунын тӱсан нимогай полганым ит ыште.9 Нунылан ит кумал, ит служитле. Вет Мый Господь, тыйын Юмет, улам. Вес юмылан кумалмым Мый чыташ ом тӱҥал. Мыйым ужмышудымо-влакын йочаштлан ачаштын титакышт верч кумшо да нылымше тукым марте мутым кучыктем.10 А Мыйым йӧратыше да Мыйын кӱштымем шуктышо-влаклан тӱжемше тукымышт марте порылыкым ыштем.
11 Господьын, тыйын Юметын, лӱмжым арам ит пелеште. Вет Тудын лӱмжым арам пелештыше еҥым Господь мут кучыктыде ок кодо.
12 Шуматкечым шуктен шого, тудым святой кечылан шотло. Тыге тыланет Господь Юмет кӱштен.13 Куд кече пашам ыште, тӱрлӧ сомылетым шукто,14 а шымше кече, шуматкече, Господь Юметлан лийже. [Тиде кечын] тый шкежат, эргыч ден ӱдыретат, пӧръеҥ ден ӱдырамаш кулетат, ӱшкыж ден осёлетат, нимогай вольыкетат, тыйын олаштет илыше йотъеҥат нимогай пашам ида ыште. Тек пӧръеҥ ден ӱдырамаш кулетат, [осёлетат] тыйын семынак канат.15 Шарне, Египет мландыште тый шкежат кул лийынат. Господь, тыйын Юмет, тушеч тыйым нӧлталме виян кидше дене луктын. Садлан Господь, тыйын Юмет, шуматкечым [святой кечылан шотлаш да] шуктен шогаш кӱштен.
16 Шке ачат ден аватым пагале – тыге тылат Господь Юмет кӱштен. Тунам ӱмырет кужу лиеш да Господь Юметын пуышаш мландыштыже сайын илет.
17 Ит пушт.
18 Ит яжарлане.
19 Ит шолышт.
20 Лишылъеҥет ӱмбаке шойыштын ит таныкле.
21 Лишылъеҥетын ватыжлан ит сутлане. Тудын пӧртшылан, пасужлан, пӧръеҥ але ӱдырамаш кулжылан, ӱшкыжшылан, осёлжылан, [нимогай вольыкшылан] – нимоланат, мо тудын уло, ит сутлане”.
22 Нине шомакым Господь погынышо уло калыклан курыкышто тул, пыл, пычкемыш [да тӱтан] лоҥга гыч кугу йӱкын ойлен. Нине шомакыш Тудо нимом ешарен огыл. Нуным Тудо кок кӱоҥаш возен да мыланем пуэн.
23 Кунам те пычкемыш гыч йӱкым колында, а курык тул дене йӱлен, мый декем тендан чыла тукымвуй ден кугуракда толыныт24 да каласеныт: ”Господь, мемнан Юмына, мыланна шке чапшым да кугу улмыжым ончыктыш. Ме Тудын йӱкшым тул лоҥга гыч колна. Таче ме ужна: Юмо айдеме дене кутыра, да тудыжо илыше чонан кодеш.25 Но молан шке илышланна лӱдыкшым ышташ? Тиде кугу тул мемнам пытара! Господь Юмынан йӱкшым эше ик гана колына гын, ме колена.26 Уло мо тугай еҥ, кӧ илыше Юмын тул лоҥга гыч ойлышо йӱкшым мемнан семынак колын да илыше чонан кодын?27 Тый кай да колышт – мом [тылат] Господь, мемнан Юмына, каласа. Мом тылат Господь Юмына каласа, тый тидым вара мыланна чыла ойлет. А ме колышташ да чыла шукташ тӱҥалына”.
28 Тыге ойлымыдам Господь колын да мылам каласен: ”Калыкын тылат мом ойлымыжым Мый кольым. Нуно чын кутырат.29 О, нуно уло шӱмышт дене Мый дечем лӱдын илышт да Мыйын чыла кӱштымашем шуктен шогышт ыле! Тунам нуныланат, нунын тукымыштланат курым-курымеш сай лиеш ыле!30 Кай, каласе нунылан, тек шке омашышкышт пӧртылыт.31 А тый Мый денем код. Мый тылат чыла кӱштымашым, пунчалым да законым каласем. Тый нуным калыклан туныктышаш улат. Тек нуно чыла тидым Мыйын пуымо мландыште шуктен шогаш тӱҥалыт”.
32 Шекланыза, Господь Юмыдан каласымыжым шуктен шогыза, тидын дечын пурлашкат, шолашкат ида кораҥ.33 Господь Юмыдан кӱштымӧ корныж дене коштса. Тунам те илаш тӱҥалыда, тендан дене чыла сай лиеш, да тыланда пуымо мландыште кужун иледа.
Глава 5