Выбрать язык
Книги Ветхого Завета
Книги Нового Завета
с русским текстом1 Тыланда таче пуымо чыла кӱштымашем шуктен шогыза. Тунам те илаш да шукемаш тӱҥалыда, Господь [Юмын] кугезе кочада-влаклан товатлен сӧрымӧ [сай] мландышкыже каен, тудым сеҥен налыда.2 Кузе Господь Юмыда тендам нылле ий ир мланде мучко вӱден коштыктен, шарнен шогыза. Шӱмыштыда мо улмым палаш да Тудын кӱштымыжым шукташ тӱҥалыда але уке – тидым рашемдаш манын, Тудо тендам тыге ӱҥышемден да терген.3 Господь тендам ӱҥышемден, шужыктен, тыланда манным пукшен – тудыжым теат, кугезыда-влакат пален огыдал. Айдеме кинде дене гына огыл, а Господьын умшаж гыч лекше кажне шомак дене ила манмым ончыкташ Господь тидым тыланда ыштен.4 Нине нылле ий жапыште тендан вургемда тоштемын-лыжгаен огыл, йолдат пуалын огыл.5 Пален шогыза: Господь, тендан Юмыда, эргыжым туныктен шогышо ача семын тендам туныкта.6 Тыгеракын, Господь Юмыдан кӱштымашыже-влакым шуктен шогыза, Тудын корныж дене коштса да Тудын деч лӱдын илыза.
7 Господь Юмыда тендам сай мландыш пурта. Тушто эҥер-влак улыт, лапвер ден курыкла гыч памаш ден вӱдшинча-влак йоген лектыт.8 Тиде мландыште шыдаҥ ден шож, виноград, смоква, гранат, олив пушеҥге-влак да мӱй улыт.9 Тушто кинде шуко, тендан чылажат ситышын лиеш. Тусо кӱлаште кӱртньӧ уло, курыкла гыч тойым лукташ лиеш.10 Шер теммеш кочмыда годым Господь Юмыдам поро мландым пуымыжлан чапландарыза.11 Шекланыза, Господь Юмыдам ида мондо – мыйын таче тыланда пуымо Тудын кӱштымашыже, уставше да пунчалже-влакым шуктен шогыза.
12 Кунам те теммеш кочкаш, сай пӧрт-влакым чоҥен, тушто илаш тӱҥалыда,13 кунам шолдыра ден тыгыде вольыкда, ший ден шӧртньыда шуко лийыт – чылажат шуко лиеш –14 шекланыза, кугешнаш ида тӱҥал да Египет гыч, кул лийме вер гыч, тендам лукшо Господь Юмыдам ида мондо.15 Тудо тендам кугу да шучко, аяр кишке да скорпион улман, вӱддымӧ кукшо мланде гоч наҥгаен. Господь тыланда чоткыдо курыкоҥ гыч вӱд [памашым] луктын,16 ир мландыште манным пукшен – тудыжым [теат,] ача-кочада-влакат нигунам ужын огыдал. Тыланда варажым сайым ышташ манын, Тудо тендам тыге ӱҥышемден да терген.17 Шке семында ида шоно: ”Чыла тиде поянлыкым мый шке кидем дене, шке вием дене ыштен налынам”.
18 Шарныза Господьым, шке Юмыдам. Вет чыла тиде поянлыкым ыштен налаш тыланда вийым Тудо пуэн – кугезе кочада-влаклан товатлыме ойпидышыжым Тудо таче кечынат шуктен шога.19 Но иктаж-кунам Господь Юмыдам мондеда да вес юмо-влак почеш каеда, нунылан кумалаш да служитлаш тӱҥалыда гын, мый таче тыланда [кава да мланде дене] таныклем – те кернак пытеда.20 Кузе Господь тендан ончычда вес калык-влакым пытарен кая, тугак теат, шке Господь Юмыдам огыда колышт гын, пытарыме лийыда.
Глава 8