Выбрать язык
Книги Ветхого Завета
Книги Нового Завета
с русским текстом1 Иордан деч теҥыз велныла илыше чыла аморрей кугыжа ден теҥыз воктене илыше чыла ханаан кугыжа-влак пален налыныт: израиль эрге-влаклан эҥерым вончашышт Господь [Юмо] Иорданым кукшо верыш савырен. Нунын шӱмыштым лӱдмаш авалтен, [ӧрткымышт дене] израильтян-влак ваштареш шогаш тоштын огытыл.
2 Тудо жапыште Господь Иисуслан каласен: «Кӱ гыч кӱзӧ-влакым ыште да израиль эрге-влак дене пӱчмӧ йӱлам угыч эртаре».3 Иисус кӱ кӱзӧ-влакым ыштен да ”Пӱчмӧ кӱкшака” манын лӱмдымӧ верыште израиль эрге-влак дене пӱчмӧ йӱлам эртарен.4 [Корнышто шочшо*а чыла израиль эргым Иисус пӱчкын. Нунын дене] пӱчмӧ йӱлам Иисус теве молан эртарен: Египет гыч лекше уло пӧръеҥ тукым – кредал кертше чыла пӧръеҥ – кайымыж годым ир мландыште колен.5 Египет гыч лекше уло израиль калык пӱчмӧ лийын, а лекме деч вара ир мландыште коштмо годым шочшо-влак пӱчмӧ лийын огытыл.6 Израильтян-влак ир мланде мучко нылле [кок] ий коштыныт, [садлан шукышт пӱчмӧ лийын огытыл]. Египет гыч лекше чыла пӧръеҥ, кудо кредалаш йӧрышӧ лийын, тиде жапыште колен пытен. Нуно Господьым колыштын огытыл, сандене Тудо нунылан товатлен ойлен: ”Шӧр да мӱй йогыман мландым те огыда уж, кеч тудым Мый тыланда пуаш ача-кочаланда товатлен сӧренам”.7 Колышо-влак олмеш Господь нунын эргыштым куштен. А нунышт пӱчмӧ йӱлам эртен огытыл улмаш, санденак Иисус нуным пӱчкын. Вет корнышто лийме годым [шочшо-влакым] пӱчкын огытыл улмаш.8 Кунам уло калык пӱчмӧ лийын, тудо пареммешкыже шке станыштыжак лийын.9 Тунам Господь Иисуслан каласен: «Таче Мый тендан деч Египетысе намысым кораҥденам». Санденак тиде вер тачысе кече мартеат Галгал*б маналтеш.
10 Израиль эрге-влак Галгалыште стан дене шогеныт да тиде тылзын латнылымше кечынже кастене Иерихон тӧрверыште Кугечым пайремленыт.11 Кугечын вес кечынже нуно тиде мландын саскажым – шергинде ден пуштылмо пырчым – кочкыныт.12 Тусо мландын саскажым кочкаш тӱҥалме деч вара вес кечынже манна йогымыжым чарнен. Тидын деч вара израильтян-влакын маннышт лийын огыл, тиде ийын нуно Ханаан мландын саскажым кочкыныт.
13 Иерихон воктене лиймыж годым Иисус ончалын да ужын: ончылныжо пӧръеҥ шога, кидыштыже – керде. Иисус тудын деке лишемын да йодын: «Тый мемнан кокла гыч але тушманна улат?»14 Тудо вашештен: «Уке, мый Господьын сарзывийжын вуйлатышыже улам, кызыт мый [тышке] толынам». Иисус тудын ончылно мландыш кумык возын, тудлан вуйжым савен: «Мыйын озам шке тарзыжлан мом ойлынеже?»15 Господьын сарзывийжын вуйлатышыже Иисуслан каласен: «Йолчиемет кудаш, вет тыйын шогымо верет святой». Иисус тыгак ыштен.
16 Иерихон олан капкаже-влак сайын тӱкылымӧ лийыныт, вет тушто илыше-влак израильтян-шамыч деч лӱдыныт. Нигӧ [тушеч] лектын огыл, нигӧ пурен огыл.
*а 5:4 Грек текстыште тыште эше ешарыме: «да Египет гыч лекше-влак кокла гыч эше пӱчдымӧ».
*б 5:9 «Галгал» шомак ’пӧрдыктен кораҥдаш’ мут дене ик семынрак йоҥга.
Глава 5