Выбрать язык
Книги Ветхого Завета
Книги Нового Завета
с русским текстом1 Теве могай мланде ужашым израиль эрге-влак Ханаан мландыште налыныт. Нунылан мландым иерей Елеазар, Нав эрге Иисус да израиль тукым-влакын урлыквуйышт*а шеледен пуэныт.2 Господьын Моисей гоч каласымыж семынак, нуно мландым индеш тукым ден [Манассийын] пел тукымжылан шерева почеш пайленыт.3 А кок тукым ден [Манассийын] пел тукымжылан Моисей мландым Иордан вес велне пуэн улмаш. Левит-влаклан тудо мланде ужашым пуэн огыл.4 Вет Иосифын эргыж-влак деч кок тукым лектын – Манассийын да Ефремын. Левит-влаклан илашышт ола-влакым да нунын йыр улшо кӱтымӧ верлам [гына] пуэныт, но мланде ужашым нуно налын огытыл.5 Господьын Моисейлан кӱштымыж семынак, израиль эрге-влак мландым пайленыт.
6 Иуда эрге-влак Иисус деке Галгалыш толыныт. Халев, кенезей Иефоннийын эргыже, тудлан каласен: «Мом Господь Моисейлан, Юмын еҥжылан, Кадес-Варниште мыйын да тыйын шотышто ойлен – тый палет.7 Господьын Моисей тарзыжын Кадес-Варни гыч мландым ончаш колтымыж годым мый нылле ияш лийынам. Мом ужмем мый тудлан шӱм почын ойленам.8 Но мый денем пырля коштшо моло израиль эрге-влак шке каласкалымышт дене калыкым лӱдыктеныт, а мый уло шӱм-чонем дене Господь Юмемлан инаненам.9 Тудо кечын Моисей мыланем товатлен каласен: ”Йолет дене коштмо мланде курымеш тыйын да йочат-влакын лиеш, вет тый уло шӱм-чонет дене Господь Юмемлан инаненат”.10 Господь, каласымыж семынак, мыйын илышем шуен. Господьын Моисейлан ты шомакым ойлымыж деч вара нылле вич ий эртен, тунам Израиль ир мланде мучко коштын. Мый ынде кандашле вич ияш улам,11 но кызытат Моисейын мландым ончаш колтымыж жапысе гаяк виян улам, сарыш лектын кошташ ӱнарем тунарак кодын.12 Пу мыланем тиде курыкан верым, кудын нерген тудо кечын Господь ойлен. Тушто Енак эрге-шамычын илымышт да тусо ола-влакын кугу да чоткыдемдыме улмышт нерген тый тунам колынат. Но Господь пеленем лиеш гын, Тудын каласымыж семынак, мый нуным поктен колтем».13 Халевым, [кенезей] Иефоннийын эргыжым, Иисус суапландарен да тудлан Хевроным пуэн.14 Хеврон таче кече мартеат кенезей Халевын, Иефонний эргын, мланде ужашыжлан шотлалтеш, вет тудо чылажымат Израильын Господь Юмыжын [кӱштымыж почеш] ыштен.15 Хевронын ончычсо лӱмжӧ Кириаф-Арба лийын, Енак эрге-влак коклаште Арба эн тале еҥ лийын улмаш.
Тидын деч вара сар пытен, тыныс илыш тӱҥалын.
*а 14:1 Урлыквуй – глава семейства.
Глава 14