Выбрать язык
Книги Ветхого Завета
Книги Нового Завета
с русским текстом1 Судья-влакын вуйлатымышт годым Израиль мландышке шужымаш толын. Иуда мландысе Вифлеем ола гыч ик еҥ шке ватыже да кок эргыж дене пырля Моав мландышке илаш каен.2 Тиде еҥын лӱмжӧ Елимелех, ватыжын – Ноеминь, а кок эргыштын лӱмышт Махлон да Хилеон лийын. Нуно Ефрафа гыч – Иуда мландысе Вифлеем ола гыч – лийыныт. Моав мландыш толмеке, тушан илаш кодыныт.
3 Икмыняр жап эртымеке, Ноеминьын Елимелех марийже колен, да тудо кок эргыж дене кодын.4 Нуно шкаланышт ватым моав калык гыч налыныт. Иктыжын лӱмжӧ Орфа лийын, весыжын – Руфь. Нуно тушто лу ий наре иленыт.5 Но вара Ноеминьын Махлон ден Хилеон эргыже-влакат коленыт. Тыге тиде ӱдырамаш марийже да кок эргыж деч посна кодын.
6 Моав мландыште илымыж годым Ноеминь колын: Юмо шке калыкшылан полыш кидшым шуялтен – нунылан киндым пуэн. Ноеминь кок шешкыж дене пырля шочмо мландышкыже каяш лектын.7 Илыме вержым коден, тудо шешкыж-влак дене корныш тарванен. Иуда мландыш пӧртылмӧ корнышто8 Ноеминь нунылан каласен: «Пӧртылза шке авадан суртышкыжо. Кузе те колышо марийланда да мыланем порым ыштен улыда, тек Господь тыландат порым ышта!9 Тек Господь когыньландат вес марийын суртыштыжо пиалан илышым муаш полша!» Ноеминь нуным шупшалын, но шешкыже-влак кугу йӱкын шорташ тӱҥалыныт10 да каласеныт: «Уке, ме тый денет пырля тыйын калыкет дек каена».11 Ноеминь вашештен: «Ӱдырем-влак, мӧҥгеш пӧртылза. Молан тыланда мый денем каяш? Мый тыланда марийда лийшаш вес эрге-влакым шочыктен кертам мо?*а12 Ӱдырем-влак, мӧҥгышкыда пӧртылза. Марлан лекташ мый ынде шоҥго улам. Мыйын эше ӱшан уло манын шонен, таче йӱдымак пӧръеҥ дене пырля лиям да вара эрге-влакым ыштем ыле гынат,13 тыланда нунын кушкын шумыштым вучыман мо? Тыланда марлан лекде илыман мо? Уке, ӱдырем-влак! Господь шке кидшым мыйын ваштарешем нӧлталын. Мый тендан верч пеш ойганем».
14 Нуно адакат кугу йӱкын шорташ тӱҥалыныт. Орфа авалийшыжым чеверласен шупшалын [да шке калыкше деке пӧртылын], а Руфь тудын денак кодын.15 [Ноеминь Руфьлан] каласен: «Теве мариетын изажын ватыже шке калыкше да шке юмыжо-влак деке кая, кай тыят тудын дене пырля».16 Но Руфь вашештен: «Тыйым коден, мӧҥгеш пӧртылаш мыйым ит ӧкымлӧ. Кушко тый, мыят тушкак каем. Кушто тый, туштак мыят илаш тӱҥалам. Тыйын калыкет мыйын калыкем лиеш, тыйын Юмет мыйын Юмем лиеш.17 Кушан тый колет – тушанак мыят колем, тушан тек мыйымат тоят. Мыйым тый дечет колымаш гына ойырен кертеш. Вес семын лиеш гын, тек Господь мыйым мут кучаш шогалта».18 Шешкыжын пырля каяш пеҥгыдын шонен пыштымыжым ужын, Ноеминь сӧрвалымыжым чарнен.
19 Нуно коктын Вифлеем марте ошкылыныт. Вифлеемыш толын шумекышт, уло олаште йӱк-йӱан нӧлталалтын. Ӱдырамаш-влак ӧрын йодыштыныт: «Тиде Ноеминь мо?»20 Тудыжо нунылан каласен: «Те мыйым Ноеминь огыл, а Мара манын лӱмдыза,*б вет Чылакучышо мылам кочо пӱрымашым колтен.21 Тышеч кайыме годым мыйын чыла лийын, а мӧҥгеш Господь яра кид дене пӧртылтен. Молан мыйым Ноеминь манын лӱмдеда? Господь мыйын ваштареш шогалын, Чылакучышо мылам орлыкым колтен».
22 Тыге Ноеминь, тудын дене пырля моав Руфь шешкыже шож тӱредаш тӱҥалме пагытыште Моав мланде гыч Вифлеемыш толыныт.
*а 1:11 Шке йӱлашт почеш еврей-влак колышо иза-шольыштын ватыштым марлан налыныт (Зак.уш 25:5).
*б 1:20 Ноеминь – еврейла ’пиалан’ лиеш. Мара – еврейла ’кочо’ лиеш.
Глава 1