Выбрать язык
Книги Ветхого Завета
Книги Нового Завета
с русским текстом1 Авенирын Хевронышто колымыж нерген пален налмеке, Саул эрге [Иевосфейын] кумылжо волен, уло Израильым лӱдмаш авалтен.2 Саул эрге [Иевосфейын] походыш коштшо сарзыже-влакым кок еҥ вуйлатен: иктыжын лӱмжӧ Ваана, весыжын – Рехав. Нуно коктынат Бероф гыч Вениамин тукым Реммонын эргыже лийыныт. Бероф Вениаминын олажлан шотлалтын.3 Тушто илыше-шамыч шке жапыштыже Гиффаимыш куржыныт да таче мартеат илаш толшо еҥ семын туштак илат.
4 Саул эрге Ионафанын окшак эргыже лийын. Кунам Саул ден Ионафанын колымышт нерген увер Изреель гыч толын, йоча вич ияш улмаш. Икшывым ончышо ӱдырамаш, Ионафанын эргыжым налын, тушеч куржын. Пеш чот вашкымыжлан кӧра кидше гыч йоча мучыштен камвозын. Тидын деч вара тудо окшак лийын. Йочан лӱмжӧ Мемфивосфей улмаш.
5 Рехав ден Ваана, Бероф гыч Реммонын эргыже-влак, Иевосфейын пӧртшӧ дек кечывал шокшо годым толыныт. Тиде жапыште Иевосфей кечываллан канаш возын улмаш.6 [Орол ӱдырамашымат, кудыжо омса воктене шыдаҥым эрыктен шинчен, омо пызыралын.] Рехав ден Ваана шольыжо, пуйто шыдаҥым налаш манын, пӧртыш пуреныт. Нуно Иевосфейым мӱшкыржӧ гыч шуралтеныт да куржыныт.7 Пӧртыш пурымышт годым Иевосфей малыме пӧлемыштыже вакшыште киен улмаш. Тудым шуралтен пуштмеке, вуйжым руалыныт, пеленышт налыныт да йӱдвошт тӧрвер корно дене ошкылыныт.
8 Нуно Иевосфейын вуйжым Давид деке Хевроныш конденыт да кугыжалан каласеныт: «Теве тыйым пушташ шонышо Саул тушманетын Иевосфей эргыжын вуйжо. Таче Господь Саул [тушманет] ден тудын тукымжылан мыйын кугыжа озам верч ӱчым шуктен».9 Иза-шольо Рехав ден Вааналан, Бероф гыч Реммонын эргыж-влаклан, Давид вашештен: «Мыйым чыла орлык деч утарыше Господь дене товатлем:10 кӧ мылам Саул ден Ионафанын колымышт нерген каласен, кӧ куан уверым конденам шонен – тиде еҥым кученам да Секелагыште пуштынам. Теве тыгай пӧлекым мый тудлан уверым кондымыжлан пуэнам!11 А кызыт, кунам те, йӧрдымӧ еҥ-влак, титакдыме айдемым шке пӧртыштыжӧ, шке вакшыштыже пуштында – йоктарыме вӱрлан мутым кучеда: мый тендам мландымбач пытарем».12 Давид шке еҥже-влаклан нуным пушташ кӱштен. Нуным пуштмеке, кид ден йолыштым руалыныт, капыштым Хевронысо пӱя воктене сакеныт. А Иевосфейын вуйжым налыныт да Хевронышто Авенирын шӱгарешыже тоеныт.
Глава 4