Выбрать язык
Книги Ветхого Завета
Книги Нового Завета
с русским текстом1 Филистим-влак Израиль дене кредалыныт. Израильтян-шамыч филистим-влак деч куржыныт, шукышт Гелвуй курыкеш вуйыштым пыштеныт.2 Филистим-влак Саулым да тудын эргыже-влакым поктен каеныт да Ионафаным, Авинадавым, Малхисуам – Саул эрге-влакым – пуштыныт.3 Саул ваштареш кредалмаш талышнен. Пикшызе-влак ӱмбакыже лӱйкаленыт да тудым сусыртеныт.4 Саул шке саргурал нумалшыжлан каласен: «Кердетым лодак гыч лук да мыйым шуралте, уке гын нине пӱчдымӧ-влак*а толыт да мыйым мыскылаш тӱҥалыт». Но саргурал нумалше чот лӱдын да тидым ышташ тоштын огыл. Тунам Саул шке кердыжым шогалтен да ӱмбакыже шуҥгалтын.5 Саул колымым ужмеке, саргурал нумалшат керде ӱмбак шуҥгалтын да колен.6 Тыге Саул, тудын кум эргыже да уло тукымжо пытеныт.7 Кунам лапверыште илыше израильтян-влак чыла еҥын куржмыжо да Саул ден эргыж-влакын колымышт нерген колыныт, нунат шке олаштым коден куржыныт. А филистим-влак толыныт да тушан верланеныт.
8 Эрлашыжым филистим-шамыч пуштмо еҥ-влакым агаш толыныт да Гелвуй курыкеш колышо Саулым да тудын эргыже-влакым муыныт.9 Нуно Саул ӱмбач чыла кудаш налыныт, вуйжым руалыныт да саргуралжым поген налыныт. Тушманым сеҥыме нерген шояк юмышт-влак да шке калыкше ончылно увертараш манын, пӱтынь филистим мланде мучко уверзе-влакым колтеныт.10 Саулын саргуралжым шке юмышт-влакын пӧртышкышт пыштеныт, а вуйжым Дагонын храм пырдыжешыже пудален сакеныт.11 Галаадысе Иависыште илыше-шамыч филистим-влакын Саул дене мом ыштымышт нерген колыныт.12 Тунам тале сарзе-шамыч каеныт, Саул ден эргыж-влакын капыштым налыныт да Иависыш конденыт. Нуно лулегыштым Иависеш тумо йымалан тоеныт да шым кече пӱтым кученыт.
13 Тыге Саул колен. Тудо Господьлан ӱшанле лийын огыл, Тудын шомакшым колыштын огыл. Саул юзо ӱдырамаш деке каҥашым йодаш каен,14 Господьым кычалын огыл. Тидлан Господь тудым пытарен да кугыжанышым Давидлан, Иессей эргылан, пуэн.
*а 10:4 Пӱчдымӧ-влак – необрезанные.
Глава 10