Выбрать язык
Книги Ветхого Завета
Книги Нового Завета
с русским текстом1 Соломон Господьын лӱмжылан пӧртым да шкаланже кугыжан пӧртым чоҥаш кӱштымашым пуэн.2 Тудо шымле тӱжем еҥым нумалаш, кандашле тӱжемым курыкышто кӱм руаш да нуным вуйлаташ кум тӱжемат кудшӱдӧ еҥым шогалтен.
3 Соломон Хирам дек, Тир кугыжа дек, тыге каласаш колтен: «Ондак тый мыйын Давид ачамлан илашыже пӧртым чоҥашлан кедр пырня-влакым колтен шогенат.4 Кызыт мый Господь Юмемын лӱмжылан пӧртым чоҥем да тудым Господьлан святитлем. Тудын ончылно тамлыпушан тӱтыртышым йӱлалташ, надыр киндым кондаш, тыгак эрдене да кастене, шуматкече еда, у тылзын да Господь Юмынан пайрем кечылаштыже йӱлалтен пуымо надырым кондаш тӱҥалыт. Вет Израильлан курым-курымеш тыге ыштен шогаш кӱштымӧ.5 Мыйын чоҥышаш пӧртем пеш кугу лийшаш, вет мемнан Юмына чыла моло юмо деч кугу.6 Но кӧ Тудлан пӧртым чоҥен кертеш, кунам кава, эн кӱшыл кава-влак Тудым шыҥдарен огыт керт? Тудлан пӧртым чоҥаш кӧ улам? Мый Тудлан лач надыр ден тӱтыртышым йӱлалтыме верым чоҥен кертам.7 Сандене мый декем шӧртньӧ, ший, той да кӱртньӧ дене, тыгак шемалге-йошкар, йошкар да шемалге-канде шӱртӧ дене пашам устан ыштыше да эше пӱчкеден моштышо еҥым колто. Тудо Иуда мландыште да Иерусалимыште улшо мастар еҥем-влак деке ушна, нуным ты пашаш эше Давид ачамак шогалтен.8 Тыгак мылам Ливан гыч кедрым, кипарисым да йошкар пушеҥгым колто, вет мый палем: тыйын еҥет-влак ливан пушеҥгым руэн моштат. Мыйын еҥем-влак тыйын еҥет-шамыч дене пырля ышташ тӱҥалыт.9 Мыйын чоҥымо пӧртем кугу да ӧрыктарыше лийшаш, сандене шуко пушеҥгым ямдылаш кӱлеш.10 Пушеҥгым руышо еҥет-влаклан мый кочкашышт коло тӱжем кор шыдаҥым, коло тӱжем кор шожым, коло тӱжем бат йошкар аракам да коло тӱжем бат олив ӱйым пуэм».
11 Хирам, Тир кугыжа, Соломонлан колтымо серышыштыже тыгай вашмутым пуэн: «Шке калыкшым йӧратымыжлан кӧра Господь тыйым нунын кугыжаштлан шогалтен».12 Умбакыже тыге возен: «Кавам да мландым ыштыше Израильын Господь Юмыжо чапландарыме лийже! Давид кугыжалан Тудо ушан-шотан, мунло эргым пӧлеклен, тудыжо Господьлан пӧртым да шкаланже кугыжан пӧртым чоҥа.13 Мый тый декет ушан-шотан да тунемше еҥым, Хирам-Авийым, колтем.14 Тудын аваже Дан тукым гыч, а ачаже – Тир гыч. Тудо шӧртньӧ да ший, той да кӱртньӧ, кӱ да пу дене, тыгак шемалге-йошкар, йошкар, шемалге-канде меж шӱртӧ да чапле йытын шӱртӧ дене пашам устан ышта, пӱчкеден мошта, кеч-могай пуымо пашам мастарын шукта. Тудо тыйын мастарет-влак дене да Давид озамын, тыйын ачатын, мастар еҥже-влак дене пырля тыршаш тӱҥалеш.15 Тек мыйын озам ойлымыж семынак мыланна, шке тарзыже-влаклан, шыдаҥ ден шожым, олив ӱй ден йошкар аракам колтен шога.16 А ме тылат Ливаныште пушеҥгым кунар кӱлеш руэна да теҥыз дене Яффаш шоло дене намиена, а тый нуным тушечын Иерусалимыш наҥгает».
17 Соломон Израиль мландышке илаш толшо чыла йотъеҥым шотлен луктын, тудын деч ончыч тыгай шотлымашым Давид ачаже ыштен улмаш. Нине еҥ-влакын чотышт шӱдӧ витле кум тӱжемат кудшӱдӧ лийын.18 Нунын кокла гыч тудо шымле тӱжем еҥым нумалаш, кандашле тӱжемым курыклаште кӱм руаш палемден, а кум тӱжемат кудшӱдӧ еҥым пашам вуйлаташ шогалтен – нуно еҥ-влакым пашам ыштыктышаш улыт улмаш.
Глава 2