Выбрать язык
Книги Ветхого Завета
Книги Нового Завета
с русским текстом1 Иеровоамын латкандашымше ий вуйлатымыж годым Иудан кугыжажлан Авий шогалын.2 Тудо Иерусалимыште кум ий кугыжаланен. Аважын лӱмжӧ Михаия, тудо Гива гыч Уриилын ӱдыржӧ лийын. Авий ден Иеровоам коклаште сар каен.3 Авий сар дене лектын, тудын нылшӱдӧ тӱжем сарзыже улмаш. Нуно чыланат ойырен налме, эн тале лийыныт. Иеровоам тудын ваштареш кандашшӱдӧ тӱжем еҥ дене лектын, нунат ойырен налме, эн тале сарзе лийыныт.
4 Авий Ефрем курыклаште улшо Цемараим курык вуй ӱмбаке кӱзен шогалын да тушеч ойлен: «Колыштса мыйым, Иеровоам да уло Израиль!5 Израильын Господь Юмыжо Давид да тудын тукымжо дене пудырташ лийдыме [курымаш] ойпидышым*а ыштен да нунылан Израильыште кугыжа кучемвийым курымешлан пуэн. Те тидым огыда пале мо?6 Но Нават эрге Иеровоам, Давидын Соломон эргыжын тарзыже, шке озаж ваштареш шогалын.7 Тудын йыр шотдымо-йӧрдымӧ еҥ-влак погыненыт да Соломонын Ровоам эргыж ваштареш шогалыныт. Ровоамын нунын ваштареш шогаш шотшо лийын огыл, вет тудо эше самырык улмаш.8 Кызыт те Давид тукымлан пуымо Господьын кугыжанышыж ваштареш шоген кертына манын шонеда. Те пеш шукын улыда да тендан шӧртньӧ ӱшкыжда-влак улыт, нуным Иеровоам тендан юмыдам ыштен.9 Но те огыл мо Господьын иерейже-влакым, Аарон эрге-влакым, да левит-шамычым поктен колтенда да моло калык семын шкаланда онаеҥ-влакым шогалтенда? Кӧ ӱшкыж да шым тага дене святитлалташ толеш, тудым те шояк юмыда-шамычын онаеҥыштым ыштеда.10 А мемнан Юмына – Господь. Ме Тудым коден огынал. Мемнан дене Господьлан Аарон эрге иерей-влак служитлат, нунылан левит-шамыч полшат.11 Нуно кажне эрдене да кастене Господьлан йӱлалтен пуымо надырым кондат да тамлыпушым тӱтырат. Нуно ару ӱстембаке рат дене надыр киндым пыштат да кажне кастене шӧртньӧ светильникысе лампаде-влакым чӱктат. Ме Господь Юмынан йӱла радамжым шуктен шогена, а те Тудым коденда.12 Мемнам Юмо вуйлатен шога, а Тудын иерейже-влак, тендан ваштареш кредалаш ӱжын, тӧтыретпучым пуалтат. Израиль эрге-влак, шке ача-кочадан Господь Юмыж дене ида кредал, те огыда сеҥе!»
13 Тиде жапыште Иеровоам, шижде кержалташ манын, нунын ӱмбак шеҥгечынла сарзе-влакым колтен. Тудо шкеже Иуда эрге-шамыч ончылно шоген, а колтымо сарзе-влак шеҥгелнышт лийыныт.14 Иуда эрге-шамыч савырненыт да ужыныт: нунын ӱмбаке ончычат, шеҥгечат толыт. Тунам нуно Господь деч полышым йодын кычкыраш тӱҥалыныт. Иерей-влак тӧтыретпучым пуалтеныт,15 а Иуда эрге-шамыч кычкыралыныт. Кунам нуно кычкыралыныт, Юмо Авий ден Иуда эрге-влакын шинча ончылнышт Иеровоамым да чыла израильтян-влакым кырен шалатен.16 Израильтян-шамыч Иуда эрге-влак деч куржыныт, Юмо нуным Иуда кидыш пуэн.17 Авий ден тудын калыкше израильтян-влакым шуко пытареныт: Израильын чылаже вичшӱдӧ тӱжем эн тале сарзыже колен.
18 Тыге израильтян-влак сеҥалтыныт, а Иуда эрге-шамыч вий-куатым погеныт, вет нуно ача-кочаштын Господь Юмыштлан инаненыт.19 Авий Иеровоамым поктен каен да тудын икмыняр олажым руалтен налын: Вефильым, Иешанам, Ефроным да нунын йыр улшо илем-влакым.20 Авийын кугыжаланымыж годым Иеровоам тетла вийым налын кертын огыл. Господь тудым перен, да Иеровоам колен.21 А Авий вий-куатым поген. Тудо шкаланже латныл ватым налын, тудын коло кок эргыже да латкуд ӱдыржӧ шочыныт.
22 Авийын моло пашаже, тудын мом ыштымыже да ойлымыжо пророк Аддан ойлымашыштыже возымо улыт.
*а 13:5 Пудырташ лийдыме ойпидыш – еврей текстыште ’шинчал ойпидыш’. «Шинчал» ойпидышын курымеш аралалтмыж нерген ойла.
Глава 13