Выбрать язык
Книги Ветхого Завета
Книги Нового Завета
с русским текстом1 Кугыжаланаш тӱҥалмыж годым Амасий коло вич ияш лийын да Иерусалимыште коло индеш ий вуйлатен. Аважын лӱмжӧ Иегоаддань, тудо Иерусалим гыч лийын.2 Амасий Господьлан келшыше пашам ыштен, но уло шӱм-чон дене огыл.3 Кунам кидыштыже кугыжаныш кучемвий пеҥгыдемын, тудо кугыжа ачажым пытарыше тарзыже-влакым пуштын,4 но нунын йочаштым пытарен огыл. Вет законышто, Моисейын книгаштыже, тыге возымо лийын, Господь тыге кӱштен каласен: «Йоча-влакын титакыштлан ача-шамычым пуштман огыл. Тыгак йоча-влакат ачашт верч пытарыме лийшаш огытыл. Кажне еҥ шке ыштыме сулыкшылан гына пуштмо лийшаш».
5 Амасий Иуда мландысе уло калыкым поген. Тудо Иуда ден Вениамин тукым еҥ-влакым шке урлыкышт дене тӱжемвуй ден шӱдывуй-шамычын кид йымакышт шогалтен. Коло ияш деч кугурак ийготан-влакым шотлен луктыныт – Амасийын сарзылан йӧрышӧ, умдо ден авыртышым нумалше кумшӱдӧ тӱжем ойырен налме еҥже лийын.6 Эше тудо шӱдӧ талант шийлан израильтян кокла гыч шӱдӧ тӱжем тале сарзым тарлен.7 Но тудын дек Юмын айдемыже толын да каласен: «Кугыжа! Тек израиль сарзывий тый денет пырля огеш кай, вет израильтян-шамыч пелен, Ефрем эрге-влак пелен, Господь ок лий.8 Тый нунын деч посна кай да лӱдде кредал! Уке гын, Юмо тыйым тушман кидыш пуа. Вет Юмын полшашат, пытарашат вийже уло».9 Амасий Юмын айдеме деч йодын: «А израиль сарзе-влаклан тӱлымӧ шӱдӧ талант дене мом ышташ?» Юмын айдеме вашештен: «Господь тыланет тидын деч шукырак пуэн кертеш».10 Тунам Ефрем мланде гыч толшо сарзе-влакым Амасий посна ойырен да мӧҥгышкышт колтен. Нуныжо Иуда калыклан пеш чот сыреныт да мӧҥгышкышт кугу шыде дене каеныт.
11 А Амасий чолгаҥын да шке калыкшым Шинчалан лапверыш наҥгаен, тушто нуно лу тӱжем Сеир сарзым кырен шалатеныт.12 Иуда калык тыгак лу тӱжем еҥым пленыш налын. Нине еҥ-влакым кӱ курык вуйыш наҥгаеныт да тушечын ӱлык кудалтеныт – нунышт чыланат пытеныт.13 Тиде жапыште мӧҥгеш колтымо сарзе-влак, кӧмытым Амасий пеленже кредалаш наҥгаен огыл, Иудан олалашкыже Самарий гыч Беф-Орон марте керылт пуреныт. Тушто нуно кум тӱжем еҥым пытареныт да шуко погым руалтен налыныт.
14 Идумей-влакым сеҥен толмеке, Амасий пеленже Сеирыште илыше-шамычын юмыштым конден да нуным шкеж дене шогалтен. Тудо нунылан вуйжым савен да тамлыпушым тӱтырен.15 Господь Амасийлан шыдешкен да тудын дек пророкым колтен. Пророк каласен: «Молан тый тиде калыкын юмыжо-влак деч каҥашым йодат? Нуно шке калыкыштым тыйын кидет деч утарен кертын огытыл!»16 Мучаш марте колыштде, кугыжа пелештен: «Мо, тыйым кугыжан каҥашпуышыжлан шогалтеныт мо? Шып лий! Уке гын, тыйым пуштыт!» Пророк каласен: «Мый палем: тыге ыштыметлан да каҥашем колыштдыметлан Юмо тыйым пытараш шонен пыштен». Вара шып лийын.
17 Шке еҥже-влак дене каҥашымеке, Иуда кугыжа Амасий Израиль кугыжа Иоас дек, Ииуйын Иоахаз эргыжын эргыж дек, тыге каласаш колтен: «Лек кредалаш, икте-весынам шинчаваш ужына!»18 А тудыжо Иуда кугыжа Амасийлан тыге вашешташ кӱштен: «Ливан курыкысо коршаҥге Ливан кедр дек тыге ойлаш колтен: ”Шке ӱдыретым мыйын эргымлан марлан пу”. Но Ливанысе ир янлык-влак тушеч эртен каеныт да тиде коршаҥгым тошкеныт.19 Тый шкаланет ойлет: ”Мый идумей-влакым кырен шалатенам!” да ынде чот кугешнаш тӱҥалынат. Шинче мӧҥгыштет, молан тылат вуетлан кычалаш? Тый пытет, тый денет пырля – Иуда».20 Но Амасий тудым колыштын огыл, вет тыште Юмын кидше лийын: идумей юмо-влак деч каҥашым йодаш тӱҥалмыштлан Юмо нуным Иоас кидыш пуаш шонен.21 Израиль кугыжа Иоас тудын ваштареш толын. Тудо Амасий дене, Иуда кугыжа дене, Иуда мландысе Вефсамисыште кредалаш тӱҥалын.22 Израильтян-влак Иуда калыкым кырен шалатеныт, да нунышт шке омашышкышт куржын пытеныт.23 Иуда кугыжа Амасийым, Иоахазын Иоас эргыжын эргыжым, Израиль кугыжа Иоас Вефсамисыште пленыш налын да Иерусалимыш конден. Тушто Иоас ола пырдыжым Ефрем капка деч Лукысо капка марте нылшӱдӧ кынергут кутышын шалатен.24 Тудо Юмын пӧртыштӧ Овед-Едом кидыште улшо чыла шӧртньӧ ден шийым, ате-ӱзгарым, кугыжан пӧртысӧ поянлыкым, тыгак заложник-влакым налын да мӧҥгеш Самарийыш пӧртылын.
25 Иуда кугыжа Амасий, Иоас эрге, Израиль кугыжа Иоасын, Иоахаз эргын, колымыж деч вара латвич ий илен.26 Амасийын моло пашаже, тӱҥалтыш гыч мучаш марте, «Иуда ден Израиль кугыжа-влакын курымсерыш книгаштышт» возымо улыт.
27 Амасийын Господь деч кораҥмекше, Иерусалимыште тудын ваштареш заговорым ыштеныт, да тудо Лахисыш куржын. Почешыже еҥ-влакым колтеныт, да нунышт тушто Амасийым пуштыныт.28 Капшым имне дене конденыт да Иудан олаштыже ача-кочаж-влак пелен тоеныт.
Глава 25