Выбрать язык
Книги Ветхого Завета
Книги Нового Завета
с русским текстом1 Элысе калык Иоахазым, Иосийын эргыжым, налын, [шӱрен палемден] да Иерусалимыште ачаж олмеш кугыжалан шогалтен.2 Престолыш шичмыж годым Иоахаз коло кум ияш лийын да Иерусалимыште кум тылзе кугыжаланен. [Аважын лӱмжӧ Амитал, тудо Ловна гыч Иеремийын ӱдыржӧ лийын. Господь ончылно Иоахаз ача-кочаж-влакын чыла осал пашаштым ыштылын. Иерусалимыште ынже кугыжалане манын, фараон Нехао тудым Емаф мландысе Девлафаште шинчыр дене шинчырлен.]3 Египет кугыжа Иерусалимыште Иоахазым престол гыч кораҥден [да Египетыш наҥгаен], а Иуда мландылан шӱдӧ талант шийым да талант шӧртньым тӱлаш палемден.4 Иуда ден Иерусалимын кугыжаштлан тудо Елиакимым, Иоахазын шольыжым, шогалтен да тудлан Иоаким лӱмым пуэн. А Иоахаз изажым Нехао Египетыш наҥгаен, [да тудыжо тушан колен. Фараонлан ший ден шӧртньым пуэныт. Тунам Иуда мландат фараонын кӱштымыж почеш шийым пуаш тӱҥалын. Фараон Нехаолан йозакым пуаш манын, вуйлатыше-влак Иуда мландыште илыше-шамыч деч ший ден шӧртньым йодыныт].
5 Кугыжалан шогалмыж годым Иоаким коло вич ияш лийын да Иерусалимыште латик ий вуйлатен. [Аважын лӱмжӧ Зехора, тудо Рама гыч Нирийын ӱдыржӧ лийын. Ача-кочаж-влак семынак] Иоаким Господь ончылно шуко осал пашам ыштен. [Тудын кугыжаланымыж годым нунын мландышкышт Навуходоносор, Вавилон кугыжа, толын. Иоаким тудын кид йымалныже кум ий лийын, а вара кидше йымач лектын. Господь нунын ӱмбаке халдей-влакым, Сирий ден Моав гыч агыше-шамычым, Аммон ден Самарий эрге-влакым колтен. Но нунышт Господьын пророк тарзыж-влак гоч каласыме шомак почеш чакнен каеныт. Манассийын ыштыме чыла сулыкшылан да Иоакимын титакдыме вӱрым йоктарымыжлан, тудын дене Иерусалимым темымыжлан Иуда ӱмбалне Господьын шыдыже лийын, сандене Тудо Иудам шке чурийже ончыч кораҥдаш шонен. Но пӱтынек тудым ынеж пытаре улмаш.]6 Иоаким ӱмбаке Навуходоносор, Вавилон кугыжа, толын да, тудым Вавилоныш наҥгаяш манын, той шинчыр дене шинчырлен.7 Господьын пӧртысӧ ате-ӱзгарын икмыняр ужашыжым Навуходоносор Вавилоныш наҥгаен да тушто шке храмышкыже*а пыштен.
8 Иоакимын чыла мом ыштымыже, йырнык пашаже, могай титакыш пурымыжо «Израиль ден Иуда кугыжа-влакын курымсерыш книгаштышт» возымо улыт. [Вара Иоаким шке ача-кочаж-влак деке ушнен, тудым нунын пелен Ганозаныште тоеныт.] Олмешыже кугыжалан Иехоний эргыже шогалын.
9 Кугыжалан шогалмыж годым Иехоний латкандаш ияш лийын да Иерусалимыште кум тылзе да лу кече вуйлатен. Господь ончылно тудо шуко осал пашам ыштен.10 Шошым Навуходоносор кугыжа шке еҥже-влакым Иехоний деке колтен да тудым Господьын пӧртысӧ шергакан ате-ӱзгар дене пырля Вавилоныш кондаш кӱштен. А Иуда ден Иерусалимын кугыжажлан тудо Седекийым, Иехонийын родыжым, шогалтен.
11 Кугыжалан шогалмыж годым Седекий коло ик ияш лийын да Иерусалимыште латик ий вуйлатен.12 Седекий шке Господь Юмыж ончылно шуко осал пашам ыштен, Господьын шомакшым ойлышо пророк Иеремий ончылно ӱҥышемын огыл, тудым колыштын огыл.13 Седекий Навуходоносор кугыжа ваштареш шогалын, кеч тудыжо Юмын лӱм дене Седекийым ӱшанле лияш товатлыктен улмаш. Пеш чот ӱскырт да вустык лиймыжлан кӧра Седекий Господь деке, Израильын Юмыж деке, савырнен огыл.14 Тыгак иерей-влакын чыла вуйлатышышт да калыкат, моло калыкын йырнык йӱлаштым шуктен, шуко сулыкым ыштеныт да Иерусалимыште Господьын святитлыме пӧртшым шакшыленыт.
15 Господь, ача-кочаштын Юмыжо, шке калыкшым да шке илыме вержым чаманен, угыч да угыч колтымо еҥже-влак гоч нунылан ойлен.16 Но нуно Юмын колтымо еҥже-шамычым игылтыныт, Тудын шомакшым кӱлдымыш луктыныт, пророкшо-влакым мыскыленыт. Тунам Господьын шыдыже шке калыкше ӱмбак ылыжын, ындыжым нуно утаралт кертын огытыл.17 Господь нунын ӱмбак Халдей кугыжам колтен, да тудыжо нунын самырык пӧръеҥыштым храмыште керде дене пытарен. Тудо [Седекийымат,] рвезымат, ӱдырымат, шоҥгыеҥымат, начарымат чаманен огыл – Юмо чылаштым тудын кидышке пуэн.18 Юмын пӧртысӧ чыла ате-ӱзгарым – изижымат, кугужымат – тыгак Господьын пӧртысӧ чыла поянлыкым, кугыжа ден онжо-влакын поянлыкыштым тудо Вавилоныш наҥгаен.19 Юмын пӧртым йӱлалтеныт, Иерусалим пырдыжым шалатеныт. Оласе чыла полатым йӱлалтеныт, мо шергакан лийын – чыла пытареныт.20 Керде деч утлен кодшо-шамычым чылаштым Навуходоносор Вавилоныш наҥгаен. Персий кугыжанышын вийым налмешкыже, нуно тушто тудын да эргыж-влакын кулышт лийыныт.21 А мланде, Господьын Иеремий гоч каласыме шомакше шукталтше манын, тиде жапыште шуматкече канышыжым канен.*б Шымле ий эртымешке, тудо яра кийымыж годым шуматкече канышым канен.
22 Персий кугыжа Кирын икымше ий вуйлатымыж годым Господьын Иеремий гоч каласыме шомакше шукталтын. Господь Персий кугыжа Кирын шӱм-чонышкыжо кумылым пыштен, да тудыжо пӱтынь кугыжаныш мучко тыгай кӱштымашым увертараш да возен шындаш кӱштен:23 «Тыге Кир, Персий кугыжа, ойла: Господь, кавасе Юмо, мылам мландымбалысе чыла кугыжанышым пуэн да Шкаланже пӧртым Иерусалимыште, Иуда мландыште чоҥаш кӱштен. Кӧ тендан коклаште Тудын калыкше гыч – тек пеленже Господь Юмыжо лиеш, да тек тудо тушко кая».
*а 36:7 Тидым «шке полатышкыже» манынат кусараш лиеш.
*б 36:21 Ончо: Левит 25-ше глава. Юмын кӱштымыж почеш мландым кажне шымше ийын курал-ӱдышаш огытыл.
Глава 36