Выбрать язык
Книги Ветхого Завета
Книги Нового Завета
с русским текстом1 Шымше тылзе шуын. Тиде жаплан израильтян-влак шке олалаштышт иленыт. Тунам уло калык ик еҥ семын Иерусалимыш погынен.2 Иисус, Иоседек эрге, тудын иерей иза-шольыжо-влак, тыгак Зоровавель, Салафиил эрге, да тудын иза-шольыжо-влак, Юмын айдеме Моисейын законыштыжо возымо семын йӱлалтен пуымо надырым кондаш манын, Израильын Юмыжлан жертвенникым чоҥеныт.3 Вес калык-влак деч лӱдыныт гынат, нуно жертвенникым тошто верешак чоҥеныт да Господьлан йӱлалтен пуымо надырым – эрдене да кастене кондымо надырым – кондаш тӱҥалыныт.4 Вара йӱла радам почеш, йӱлалтен пуымо надырым кажне кечын мыняр пуаш палемдыме чот дене конден, Омаш пайремым эртареныт.5 Тидын деч вара нуно эре конден шогымо йӱлалтен пуымо надырым, у тылзын кондымо надырым, Господьын моло святой пайремже годым пуымо надырым конденыт, тыгак Господьлан шке кумылын пӧлекым пуэныт.6 Шымше тылзын икымше кечынжак нуно Господьлан йӱлалтен пуымо надырым кондаш тӱҥалыныт. А Господьын храмжылан негызым эше пыштыме огыл улмаш.
7 Кӱм руышо ден плотник-влаклан шийым, а Сидон ден Тир гыч толшо еҥ-шамычлан кочкыш-йӱышым да олив ӱйым пуэденыт – нунышт Персий кугыжа Кирын шомакше почеш Ливан гыч Яффаш кедрым теҥыз дене конденыт.8 Иерусалимыш Юмын пӧрт деке толмо деч вара кокымшо ийын кокымшо тылзынже Салафиил эрге Зоровавель, Иоседек эрге Иисус, нунын иза-шольышт – иерей ден левит-влак – да плен гыч Иерусалимыш пӧртылшӧ чыла моло еҥ пашалан пижыныт. Нуно коло ияш деч кугурак ийготан левит-влакым Господьын пӧртшым чоҥымо пашам эскераш шогалтеныт.9 Иисус, тудын эргыж ден иза-шольыжо-влак, Кадмиил, тудын эргыже-шамыч, Годавий эрге-влак,*а тыгак Хенадад эрге-шамыч шке эргышт дене да нунын моло левит иза-шольышт ик еҥ семын Юмын пӧртыштӧ чоҥымо пашам вуйлаташ шогалыныт.10 Кунам чоҥышо-влак Господьын храмжылан негызым пыштеныт, Израиль кугыжа Давидын кӱштен кодымыж почеш Господьым чапландараш манын, служитлыме вургеман иерей-влакым пуч дене да Асаф эрге левит-шамычым кимвал дене шогалтеныт.11 Господьым моктен да тауштен, нуно алмаш-алмаш мураш тӱҥалыныт: «Тудо поро, Тудын порылыкшо Израиль дек курымеш!» Храмлан негызым пыштымылан Господьым моктен, уло калык кугун йӱкланен.
12 Ончычсо храмым ужшо шоҥгырак иерей, левит, урлыквуй кокла гыч шукышт, тиде храмлан пыштыме негызым ужын, кугу йӱкын шортыныт. Но шуко еҥ кугу йӱкын куанен йывыртен.13 Калыкын гӱжлымыжлан кӧра куанен кычкырымым шортмо йӱк деч ойыраш йӧсӧ лийын, да тиде йӱк-йӱан пеш умбаке шоктен.
*а 3:9 «Годавий эрге-влак»: еврей текстын вес вариантше почеш «Иуда эрге-влак».
Глава 3