Выбрать язык
Книги Ветхого Завета
Книги Нового Завета
с русским текстом1 Артаксерксын колымшо ий кугыжаланымыж годым, нисан тылзыште, кугыжалан йошкар аракам кондышт. Мый тудым нальым да кугыжалан пуышым. Тидын деч ончыч мый тудын ончылно нигунам шӱлыкан лийын омыл.2 Кугыжа йодо: «Молан чуриет шӱлыкан? Тый черле отыл? Уке? Тугеже, шӱмыштет ойго?» Мый чот лӱдын колтышым3 да кугыжалан вашештышым: «Тек кугыжа курымеш ила! Кузе мыйын чурием шӱлыкан ок лий, вет ача-кочам тойымо олам шалатыме, капкаже-влакым йӱлалтыме».
4 Тунам кугыжа мане: «Мом мый дечем йоднет?» Мый кавасе Юмылан кумальым5 да кугыжалан каласышым: «Кугыжалан тиде келша да шке тарзет деке поро кумылан улат гын, мыйым Иуда мландыш, ача-кочам тойымо олашке колто. Мый тудым угыч нӧлталам».6 Кугыжа – воктеныже тунам ватыже шинча ыле – мый дечем йодо: «Кунар жап корнышто лият? Кунам пӧртылат?» Кугыжа мыйым колташ келшыш, да мый тушто мыняр жап лийшашем каласышым.
7 Мый маньым: «Кугыжан кумылжо уло гын, мылам эҥер вес вел*а кундемласе тӧра-влаклан серышым пуэн колтыжо. Тунам нуно мыйым шке кундемышт гоч Иуда мландыш колтат.8 Тыгак, Юмын пӧрт пелен улшо карманын капкажлан, оласе пырдыжлан да мыйын илышаш пӧртлан чодырам пуыжо манын, кугыжан чодыра оролжо Асафлан серышым колташ йодам». Мыйын ӱмбалнем Юмын поро кидше лийын, да кугыжа чыла тидым мыланем пуэн.
9 Мый эҥер вес велысе кундем-влакын тӧрашт деке миенам да кугыжан серышыже-влакым пуэнам. Кугыжа пеленем эше сарзывуй ден имнешке-влакым колтен ыле.10 Тидын нерген Хорон ола гыч улшо Санаваллат да аммон тӧра Товий колыныт да Израиль калыклан полшаш толмылан чот сыреныт.
11 Мый Иерусалимыш толынам. Тушто кум кече лиймеке,12 пеленем улшо икмыняр еҥ дене йӱдым ола пырдыжым ончаш лектынна. Мом Юмо шӱмышкем Иерусалимлан ышташ пыштен, мый нигӧланат ойлен омыл. Мый осёлым кушкыж каенам, а моло-влак йолын ошкылыныт.13 Йӱдым мый Лапвер капка гоч Дракон памаш ден Терыс капка деке кайышым, Иерусалимын шалатыме пырдыжшым, йӱлалтыме капкаже-влакым ончен лектым.14 Мый Памаш капка ден Кугыжан пӱя деке лишемым, но тушто осёлым кушкыж каяшлан корно аҥысыр лийын.15 Йӱд пычкемыштак мый, пырдыжым ончен, лапвер дене кӱзышым. Вара адакат, Лапвер капка гоч эртен, мӧҥгеш олашке пӧртыльым.
16 Куш мый коштынам, мом ыштенам – тӧра-влак пален огытыл: иудей-влакланат, иерей-влакланат, лӱмлӧ еҥ-шамычланат, тӧра-влакланат, тиде пашам ыштышаш моло еҥланат тымарте нимом раш ойлен омыл.17 Вара мый нунылан каласышым: «Те ужыда, могай азапыш ме логалынна: Иерусалимым шалатыме, капкаже-влакым йӱлалтыме. Айста Иерусалимым угыч чоҥена, тиде намысым шке ӱмбачна кораҥдена».18 Вара мый ӱмбалнем Юмын поро кидше улмым, тыгак кугыжан мылам ойлымо мутшым каласышым. «Чоҥаш тӱҥалына», – маньыч нуно да тиде суап пашалан ямдылалташ тӱҥальыч.
19 Но тидын нерген колмеке, Хорон гыч Санаваллат, аммон тӧра Товий да араб Гешем мемнам воштылыч да тыге игылт каласышт: «Мом те ыштеда? Кугыжа ваштареш пудыранчыкым нӧлталаш огыда шоно дыр?»20 Мый нунылан вашештышым: «Кавасе Юмо мыланна йӧным ышта, а ме, Тудын тарзыже-влак, чоҥымо пашам тӱҥалына. А Иерусалим тендан огыл, тыште лияш кертыжда уке, тыште тендан нерген нимогай шарнымашат уке!»
*а 2:7 Эҥер вес вел – Евфрат эҥер деч касвел могыр.
Глава 2