Библия
Выбрать язык
Книги Ветхого Завета
Книги Нового Завета
с русским текстом
ИОВЫН КНИГАЖЕ
40 Глава
1 Юмо Иов деч йодеш: «Тый Мый гаемак куатан улат мо?» 10 «Шоналте бегемот нерген». 20 «Левиафаным тыпландарен кертат мо?»1 Тунам Господь Иовлан тӱтан кокла гыч вашештен:
2 «Пӧръеҥ семын кыдалышкет ӱштым ӱштал:
Мый йодышташ тӱҥалам,
а тый Мылам вашеште.
3 Тый Мыйын судем шӧрынет,
шкендым чыныш лукташ манын, Мыйым титаклынет?
4 Ала тыйын куатет Юмын гай
да йӱкет Тудын семын кӱдырчӧ гай йоҥга?
5 Тугеже шкендым кугулык да чап дене сӧрастаре,
кӱдыратлык да сӧраллык дене вӱдылалт.
6 Йоктаре шке кугу шыдетым:
ончал кугешныше-влак ӱмбак да нуным ӱҥышемде,
7 шеклане тырга еҥ-шамычым да нуным ӱлыкшемде,
осал еҥ-влакым верешыштак тошкал –
8 нуным чылаштым мландыш тойо,
пычкемыш дене чурийыштым левед.
9 Тунам Мый тыйым мокталтем:
шке кидет тыйым утарен кертеш.
10 Теве ончал бегемотым:
*а тыйым ыштыме семынак Мый тудым ыштенам,
кочкеш тудо ӱшкыж семын шудым.
11 Вийже тудын эрдыштыже,
куатше тудын мӱшкыр чогашылыштыже,
12 почшо тудын пуйто пеҥгыде кедр,
эрдыштыже шӧн-влак пуналтыныт,
13 лужо тудын той пуч гай,
кӱртньӧ вара гай йолжо.
14 Тудо – Юмын эн куатле ыштымашыже,
тудым Ыштыше гына кердыжым тудын дек лишемден кертеш.
15 Кочкышым тудлан курык-влак пуат,
туштыжо янлык-шамыч модын юарлат.
16 Кия тудо ӱмылан вондерла йымалне,
шылын возеш купысо омыж коклашке.
17 Нине вондер-влак тудым ӱмылтат,
эҥер воктенысе арама-шамыч тудым авырат.
18 Виян вӱдйогын тудым ок лӱдыктӧ,
Иордан вӱд умшашкыже лупшалтеш гынат, ок коляне.
19 Кӧ, воктекше лишемын, тудым руалтен кертеш?
Кӧ тудын нерышкыже колчам чикта?
20 Эҥыр дене левиафаным луктын,
кертат мо йылмыжым кылден?
21 Чыкет мо неррожышкыжо кандырам,
шӱтет мо сагыле дене оҥылашлужым?
22 Тӱҥалеш мо тудо тыйым кужун сӧрвалаш
да, ӱедылын, тый денет кутыраш?
23 Ышта мо тудо тый денет ойпидышым,
лиеш мо курымешлан тыйын кулет?
24 Тӱҥалат мо тудын дене кайык семын модаш,
кылден шындет мо тудым мӧҥгысӧ ӱдырет-влаклан модашышт?
25 Колызо-влак тудлан акым шындат мо,
купеч-влаклан тудым ужашлен ужалат мо?
26 Сагылян умдо дене коваштыжым
да корсака
*б дене вуйжым шӱтен кертат мо?
27 Тӱкен ончо тудым ик гана –
от мондо ты кучедалмашым, тӱкаш от тошт тудым тетла!
*а40:10 Еврей йылмыште «бегемот» шомак кугу, ӧрыктарыше янлыкым ончыкта. Тиде могай янлык лийын кертеш, каласаш неле.
*б40:26 Корсака – кол кучымо ӱзгар, тушто пӱй ден сагыле-влак улыт.
Глава 40
