Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
9 Псалом
1 Хор вуйлатышылан. «Эрге колымо» семлан возымо.*а Давидын псаломжо.2 Тыйым, Господь, уло шӱмем дене чапландарем,
ӧрыктарыше чыла пашат нерген ойлем!
3 Тылат мый куанем да йывыртем,
Чыла деч Кӱшылысӧ, лӱмет моктен мурем!
4 Тушманем-влак чакнен куржыт,
шӱртнен камвозыт да чурий ончылнет колат.
5 Вет Тый мылам судым ыштенат,
мыйын пашам пыдал налынат –
Тый, Чынле Судья, престолыш шинчынат.
6 Калык-влакым Тый судитленат,
осалым ыштыше-шамычым пытаренат,
лӱмыштым мландымбач курымешлан ӱштылынат.
7 Тушманлан толын мучаш,
олаже-влакым Тый шалатенат –
тушман-влак нерген шарнымаш нунын дене пырля пытен.
8 Но Господь курымеш кугыжалана,
шке престолжым Тудо судлан ямдылен –
9 уло тӱням чынлык дене судитла,
калык-влаклан чын судым ышта.
10 Шыгыремдыме еҥлан Господь лиеш аралтыш,
неле жапыште Тудо шылын куржмо вер лиеш.
11 Тыйым пален налше-влак Тыланет ӱшанен илат,
вет Тыйым кычалше-влакым, Господь, Тый от кодо.
12 Сионышто илыше Господьым моктен мурыза,
Тудын пашаж-влак нерген калык-шамыч коклаште каласкалыза!
13 Вет Тудо йоктарыме вӱр верч ӱчым шукта,
шыгыремдыме-влакым шарна,
нунын йӧсын кычкырымыштым ок мондо.
14 Серлаге мыйым, Господь!
Мыйым ужмышудымо-влаклан кӧра орланымем ончал!
Тый мыйым колымаш капка деч илышыш пӧртылтет,
15 да мый Сион ӱдырын капкаж воктене
Тыйын нергенет моктен увертарем,
Тыйын утарыметлан куанем.
16 Вес калык-влак кӱнчымӧ вынемышкышт шкеак пурен каеныт,
шылтен шындыме лӧдышкышт шке йолышт пижын.
17 Еҥ-влакым чын судитлымыж дене Господь Шкенжым палдарен:
шке шындыме капканышкыже осал еҥ логалын.
18 Тек Юмым пагалыдыме еҥ-влак
да Юмым мондышо чыла калык вес тӱняшке каят.
19 Вет незер айдеме эрелан мондымо огеш лий,
йорло-влакын ӱшанышт йӧршешлан ок йом.
20 Кынел, Господь! Ит пу айдемылан сеҥаш,
тек калык-влак Тыйын ончылнет судитлыме лийыт.
21 Нунылан, Господь, лӱдмашым колто:
тек калык-влак палат – нуно айдеме гына улыт.
22 Молан, Господь, тораште шогет,
орлыкан жап годым Шкендым шылтет?
23 Осал еҥ кугешнымыж дене йорлым поктылеш –
шонен пыштыме чоялыкешыже тек шкеак пижеш.
24 Вет тыгай еҥ осал кумыл шупшмыж дене моктана,
шкаланже веле пайдам налаш йӧратыше еҥ «пиалан улам» манеш.
Господьым тудо мыскыла!
25 Господьын ончыкылык судшым
кугешныше осал еҥ шотыш ок нал,
тудын чыла шонымашыже – «Юмо уке!»
26 Тудын чыла пашаже воранен толеш,
Тыйын судет-влакым тудо ок умыло,
чыла тушманже ӱмбаке кӱшыч онча.
27 Шкаланже ойла:
«Мый пеҥгыдын шогем,
мый денем уда нигунам огеш лий».
28 Тудын умшаже каргымаш, шояклымаш да лӱдыктымаш дене темын,
йылмыж гыч орлык ден зияным кондышо мут-влак лектыт.
29 Ял мучаште тудо шылын-ваҥен шинча,
шолып верлаште титакдымым пуштеда,
шинчаже тудын полышдымо еҥым кӱта.
30 Кузе лев шылме верыштыже ваҥа,
тудат шылме верже гыч кӱта,
йорлым кучаш манын, вучен шинча –
да тудым, шке вапшешыже кучен, руалта.
31 Пӱгырна, возеш,
да полышдымо-влак тудын виян кӱчышкыжӧ логалыт.
32 Шке семынже ойла: «Юмо монден,
чурийжым петырен, нигунам огеш уж».
33 Кынел, Господь, мыйын Юмем!
Нӧлтал шке кидетым,
индыралтше-влакетым [йылт] ит мондо.
34 Кузе осалым ыштыше еҥ, Юмым укешке луктын, шонаш тоштеш:
«Юмо мыйым мут кучаш ок шогалте»?
35 Тый ужат орландарымаш ден пызырымашым,
Тый ончет да шке кидет дене вашмутым кучыктет.
Полышдымо еҥ шкенжым Тыйын кидышкет пуа,
тулык йочалан Тый полшышо улат.
36 Юмым пагалыдыме осал еҥын вийжым шалате –
тек чын огылжо деч огеш код кышат.
37 Господь курымешлан кугыжа, эрелан;
Тудын мландыштыже йот калык-влак пытат.
38 Господь! Тый колат ӱҥышемше-влакын сӧрвалымыштым,
пеҥгыдемде нунын шӱмыштым.
Поч шке пылышетым,
39 тулык йоча ден шыгыремдыме еҥлан чын судым ыште,
да ынже лӱдыктыл тетла ты мландыште илыше айдеме.
*а 9:1 Еврей текстыште кучылтмо «алму́т лаббе́н» шомак-влакын чынжымак мом ончыктымыштым каласаш неле.
Глава 9
