Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
36 Псалом
Давидын псаломжо.1 Осал еҥлан кӧра ит шыдешке,
осалым ыштылшылан ит кӧране –
2 вашке нуно шудо семын лывыжгат,
ужар кушкыл семын кошкат.
3 Инане Господьлан да сайым ыште,
иле мландыште да лий ӱшанле.
4 Господьлан куане,
да Тудо шӱметын шонымыжым шукта.
5 Господьлан шке корнетым кучыкто да Тудлан инане:
кузе кӱлеш – Тудо ышта.
6 Тудо титакдыме улметым ӱжара семын,
чынлыкетым кече семын нӧлталеш.
7 Господьым колышт иле да Тудым ӱшанен вучо.
Воранен илыше айдемылан,
осал-чоя пашам ыштышылан ит кӧране.
8 Чарне шыдешкымым, кугу сырымашым кодо –
шыдешкымаш сайыш ок шукто.
9 Вет осалым ыштыше-влак пытат,
да мланде Господьлан инаныше-влакын лиеш.
10 Эше изишак – да осалым ыштыше еҥ огешат лий,
ончалат тудын лийме верышкыже – тудо уке.
11 Мланде ӱҥышӧ-влакын лиеш,
тыныс-эсенлыкыште нуно куанен илаш тӱҥалыт.
12 Осал еҥ чын ыштыше ваштареш шонкала осалым,
тудын ваштареш пӱйжым пуреш.
13 Тудым ончен, Господь воштылеш:
пала – вашке тудын кечыже шуэш.
14 Йорло ден незерым йӧрыкташ
да чын корно дене кайыше-влакым пытараш манын,
осалым ыштыше-влак кердыштым луктыт,
йоҥежыштым чымалтарат.
15 Но кердышт шке шӱмышкышт пура,
да пикшйоҥежышт шалана.
16 Чын ыштыше еҥын шагал погыжо
шуко осал еҥын поянлыкышт деч сайрак,
17 вет нунын кидышт пудыртымо лиеш,
а чын ыштыше-влакым Господь пеҥгыдемда.
18 Господь ужеш шылталаш лийдыме еҥ-влакын кечыштым,
шке мландышт курымеш нунынак лиеш.
19 Неле жап годым огыт пуро намысыш,
кинде укеан кечылаштат нуно темше лийыт.
20 А осалым ыштыше-влак колат,
Господьын тушманже-влак пача коям йӱлатыме семын пытат,
шикш семын нуно йомыт.
21 Осал еҥ кӱсын налеш да мӧҥгеш огеш пу,
а чын ыштыше еҥ шкенжыным чаманыде пуа.
22 Мланде Юмын суапландарымыже-влакын лиеш,
а каргымыже-шамыч пытат.
23 Кӧн коштмо корныжо Господьлан келша,
тыгай айдемын ошкылжым Тудо пеҥгыдемда.
24 Кунам тудо пуреҥгаяш тӱҥалеш – пурен ок кай,
вет Господь тудым кидше гыч куча.
25 Мый самырык лийынам да шоҥгемынам,
но ужын омыл чын ыштыше еҥым шуэн кодымым
да тудын шочшыжо-влакым киндым йодышт коштшым.
26 Тудо кажне кечын порылыкым ончыкта да кӱсын пуа,
шочшыж-влак моло еҥлан суапландарымаш лийыт.
27 Кораҥ осал деч, порым ыште –
тунам тый мландыштет курымеш илет,
28 вет Господь чынлыкым йӧрата
да шке ӱшанлыже-влакым огеш кодо,
нуным Тудо курымеш арала.
[А осал еҥ-шамыч поктен колтымо лийыт,]
Юмым пагалыдыме-влакын тукымышт пытат.
29 Мланде чын ыштыше-влакын лиеш,
тушто нуно илаш тӱҥалыт курымеш.
30 Чын ыштыше еҥ умшаж гыч ушан шомакым луктеш,
йылмыже тудын чын мутым ойла.
31 Юмыжын законжо – тудын шӱмыштыжӧ,
ошкылжо тудын огеш тайнышт.
32 Осал еҥ чын ыштышым эскерен коштеш,
тудым пушташ йӧнан жапым кычалеш.
33 Но Господь шке еҥжым тудын кидыш ок пу,
судышто тудым титаканыш лукташ ок пу.
34 Господьлан инане, Тудын корныж деч ит кораҥ –
тунам Тудо тыйым нӧлталеш, мланде тыйын лиеш,
да тый осал еҥ-влакын пытымыштым ужат.
35 Ужынам мый осал-торжа айдемым,
кӱкшӧ да ладыра пушеҥге семын шогышым.
36 Но тудо каен йомо,
кычальым тудым – шым верешт.
37 Эскере титакдыме еҥым, чын ыштышым ончо:
тынысле еҥым ончыкылык вуча.
38 А осалым ыштыше-влак чылан пытарыме лийыт:
Юмым пагалыдыме-шамычын ончыкылыкышт ок лий.
39 Чын ыштыше-влаклан утаралтмаш – Господь деч,
неле жап годым Тудо нуным арала.
40 Господь нунылан полша да нуным утара.
Утара нуным осал еҥ дечын,
вет нуно Тудын полышыжлан инанат.
Тау
Глава 36
