Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
59 Псалом
1 Хор вуйлатышылан. «Танык лилий» семлан возымо.*а Давидын туныктымо сынан возымашыже.2 Месопотамийысе да Цовасе сириян-влак дене кредалмыж деч вара, Иоавын пӧртылшыла Шинчалан лапверыште латкок тӱжем идумейым кырен шалатымекше, Давид тидым возен.3 Юмем, Тый мемнам Шке дечет кораҥдышыч да мемнам шалатышыч;
Тый мыланна шыдешкышыч, но садак мемнан дек савырне!
4 Тый чытырыктышыч мландым, тудым печкалтарышыч –
тӧрлате тудын шелшыжым, вет тудо чытыра.
5 Шке калыкетлан Тый кугу нелылыкым ужыктышыч,
аҥыртарыше аракам мыланна йӱктышыч.
6 Тый дечет лӱдын илыше-влаклан тистым нӧлталат –
тудын йырже погынен,
нуно пикш дечын шылын кертыт.
*б7 Тек утлен кодыт Тыйын йӧратымет-влак.
Мыйым кол, пурла кидет дене утаре.
8 Шке святой верже гыч Юмо каласен:
«Сеҥымашлан куанен,
Сихем мландым, Сокхоф лапверым шеледен пуэм.
9 Галаад ден Манассий Мыйын улыт,
Ефрем – вуйыштем ӧшлӧк,
Иуда кучемвий тоям лиеш.
10 Моав – мушкылтмо атем,
Едом ӱмбак йолчиемем шуэм.
*в Филистим мланде, Мыйым куан йӱк дене вашлий!»
11 Кӧ мыйым чоткыдемдыме олаш вӱден пурта,
Едом марте кӧ мыйым ужата?
12 Вет Тый, Юмына, мемнам Шке дечет кораҥденат,
сарзына-влак дене пырля от лек.
13 Полшо мыланна сеҥаш тушманым,
вет айдеме полышлан ӱшан лиеш арам.
14 Юмо дене ме сеҥена,
Тудо тушманнам тошка.
*а 59:1 Псалтирь книгаште музык дене кылдалтше термин-влакын мом ончыктымышт раш пале огыл.
*б 59:6 Еврей текстыште тыште мом возымым умылаш неле.
*в 59:10 Йолчиемым шуышо еҥын тыге ыштымыже «мландын озаже ынде мый улам» манмым ончыктен кертын.
Глава 59
