Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
73 Псалом
Асафын туныктымашыже.1 Юмына, молан Тый мемнам Шке дечет кораҥдышыч?
Молан кӱтӱэтын шорыкшо-влаклан шыдет ылыжын?
2 Шарналте ожнак сулен налме калыкетым,
Шкаланет тӱлен налме тукымым,
да Сион курыкым, кушто Тый илаш тӱҥалынат.
3 Йолетым курымешлан сӱмырен кодымо пӧрт верыш виктаре –
святой верыште мо улмым тушман чыла шалатен.
4 Тыйын лӱмеш погынымо верыште тушман-влак ырлат.
Сеҥымаш пале семын шогалтеныт тушто шке тистыштым,
5 нугыдо чашкерыште пушеҥгым руышо семын товарыштым нӧлтыштыныт,
6 тушто улшо пӱчкеден ыштыме узор-влакым икте кодде
товар да шугыньо дене шалатеныт.
7 Святой верышкет нуно тулым чыкеныт,
Тыйын лӱметлан кумалме верым шакшыленыт.
8 Каласеныт шке шӱмыштышт: «Нуным пӱтынек пытарена»,
да ты элыште Юмын лӱмеш погынымо чыла верым йӱлалтеныт.
9 Нимогай палым она уж,
кодын огытыл пророк-влак мемнан коклаште,
чыла тиде мыняре шуйна – уке тидым палыше.
10 Юмына, эше мыняр жап тушман мыскылаш тӱҥалеш?
Курымеш мо тудо лӱметым шӱктараш тӱҥалеш?
11 Молан Тый шке кидет дене, пурла кидет дене, от полшо?
Лук кидетым помышет гыч да нуным пытаре.
12 Юмо – тӱҥалтыш гычак мыйын Кугыжам,
ыштет Тый мландымбалне утарымаш пашатым!
13 Шке куатет дене теҥызым кокыте шелынат,
вӱдыштӧ теҥыз кишке-влакын вуйыштым шалатенат.
14 Шалатенат левиафанын
*а вуйжо-влакым,
пуэнат тудым ир мландысе [Эфиопий] калыклан кочкаш.
15 Тый почынат памаш ден йогын-влакым,
а кугу вӱдан эҥер-шамычым коштенат.
16 Кече – Тыйын, йӱдат – Тыйын,
тылзе ден кечымат Тый ыштенат.
17 Палемденат мландын чыла тӱржым,
кеҥеж ден телым ыштенат.
18 Шарнен шого, Господь, кузе тушман игылт воштылеш,
ушдымо калык Тыйын лӱметым шӱктара.
19 Ит пу янлыклан шке кӧгӧрченетын чонжым,
незер калыкетым эрелан ит мондо.
20 Ит мондо шке ойпидышетым,
вет мландын чыла пычкемыш верже пызырымаш дене темын.
21 Шыгыремдыме еҥ мыскылалтше ынже кай,
йорло ден незер-влак тек лӱметым моктат.
22 Кынел, Юмем, да судитлалтме пашатым нал арален,
ушдымо еҥын Тыйым кечыгут шӱктарымыжым шарналте.
23 Ит мондо тушман-влакетын кычкырымыштым,
ваштарешет шогалше-влакын чарныде лӱшкымыштым.
Тау
*а 73:14 Левиафан – теҥызыште илыше акрет годсо мифысе шуко вуян кугу янлык.
Глава 73
