Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
89 Псалом
1 Моисейын, Юмын еҥжын, кумалмыже.2 Господь! Тукым гыч тукымыш
Тый мемнан аралтышна улат.
3 Курык-влакын шочмышт деч ончычак,
мланде ден сандалыкым ыштымет деч ончычак
Тый курым гыч курымыш Юмо улат.
4 Тый айдеме-влакым мланде пуракыш пӧртылтет,
«Пӧртылза, айдеме эрге-шамыч!» – ойлет.
5 Вет Тыйын шинча ончылнет тӱжем ий
теҥгече эртыше кече гай, йӱдын ик орол черетше гай.
6 Вӱдташлем наҥгайыме семын Тый нуным наҥгает,
омо семын нуно каят эртен.
Нуно шудо гай улыт –
тудыжо эрден кушкеш, эрденак пелед шогалеш,
а кастене лывыжга да кошка.
7 Вет Тыйын сырыметлан кӧра ме пытена,
Тыйын шыдет мемнам кугу лӱдмашыш пурта.
8 Тый мемнан сулыкнам пыштенат Шке ончыкет,
шолып ыштыме языкна – Тыйын чурий ончылнет.
9 Тыйын шыдетлан кӧра илыме кечына-влак кӱчыкемыт,
мемнан ийна-влак шӱлалтыш семын йомыт.
10 Мемнан ӱмырна шымле ий шуйна,
ӱнар уло гын – кандашле,
эн сай пагытна-влакат паша ден орлыкышто эртат,
писын ий-влак йортат, да ме йомына.
11 Кӧ пала Тыйын сырыметын вийжым?
Кӧ Тыйын шыдет деч ок лӱд?
12 Илышаш кече чотым шотлаш туныкто мемнам,
тунам ме мунло шӱм-чонан лийына.
13 Мемнан дек савырне, Господь!
Мыняр жап тиде шуйнаш тӱҥалеш?
Шке тарзет-влакым чамане.
14 Порылыкетын перкелыкше дене мемнам эрденак теме,
да кажне илыме кечын ме куанен йывыртена.
15 Мыняр кече Тый мемнам шӱлыкаҥденат,
мыняр ий ме эҥгекым ужынна –
тунарак мыланна пу куанен илаш.
16 Ончыкто кӱдыратле пашатым шке тарзет-влаклан,
чапетым – нунын эргышт-влаклан.
17 Господь, мемнан Юмына, лий мемнан дек поро,
пашанам ворандарен шого,
ворандарен шого мемнан пашанам!
Глава 89
