Выбрать язык
Книги Ветхого Завета
Книги Нового Завета
с русским текстом1 Вара мый кече йымалне ышталтше чыла пызырымашым ужым да тидын нерген шонкалаш тӱҥальым. Теве пызырналт илыше-влакын шинчавӱдышт, а лыпландарышышт уке. Чыла вий-куат – нуным пызырыше-влакын кидыштышт, а лыпландарышышт уке.2 Тунам мый каласышым: колышо-шамыч илыше-влак деч пиаланрак улыт.3 А кӧмыт эше шочын огытыл да кече йымалне ышталтше осал пашам ужын огытыл, эн пиалан улыт.
4 Мый тыгак ужым: кеч-могай тыршымаш да пашам устан ыштымаш еҥ-влак коклаште кӧранымашым луктыт. Тидат – арам, мардежым поктылмо дене иктак!
5 Ушдымо еҥ, йогыланен, кидшым кыргештен*а шинча
да шкенжым пытымашке шукта.
6 Ласкан ыштен налме ик кормыж –
неле паша дене да мардежым поктылын ыштен налме
кок кормыж деч сайрак.
7 Мый кече йымалне ышталтше эше ик арам пашам ужым да тидын нерген шонкалаш тӱҥальым.8 Теве шкет айдеме – воктеныже нигӧ уке, уке эргыжат, иза-шольыжат. Уке тудын пашажлан мучаш, поянлыкше тудым ок куандаре. «Кӧлан мый тыршем, шкемым куан деч посна кодем?» Тидат – арам, сай огыл паша!
9 Шкет лиймеш, коктын лияш сайрак, вет пырля тыршымылан сай пӧлек вуча.10 Иктыже камвозеш гын, весыже тудлан кынелаш полша. Но шкет еҥлан ойго: тудо камвозеш гын, кынелтыше нигӧ уке.11 Тыгак коктын кият гын, нунылан шокшо. А шкетлан кузе ыраш?12 Иктым сеҥаш куштылго, но коктын ваштареш шоген кертыт, а кум ярым пырче гыч пунымо шӱртӧ вашке ок кӱрл.
13 Йорло, но ушан рвезе – шоҥго да ушдымо, ой-каҥашым колыштмым чарныше кугыжа деч сайрак.14 Кеч рвезе тудын кугыжаныштыже йорло шочын, тудо казамат гыч лектеш да вуйлаташ шогалеш.15 Мый ужым: кече йымалне илыше-влак чыланат кугыжалан шогалшаш вес рвезе почеш каят.16 Тудын кид йымалныже улшо-шамычым шотлен пытараш лийын огыл. Но вара шочшо-влаклан тудо келшен огыл. Тидат – арам, мардежым поктылмо дене иктак лийын!
17 Кунам Юмын пӧртыш кает, шкендым эскере. Ушдымо-влак семын шоналтыде надырым кондымешке, лучо тушко колышташ мияш – нунышт тидын дене осалым ыштымыштым огыт пале.
*а 4:5 Кидым кыргешташ – сложить руки крест-накрест.
Глава 4