Библия
Выбрать язык
Книги Ветхого Завета
Книги Нового Завета
с русским текстом
ЭККЛЕСИАСТЫН, МУНЛО ТУНЫКТЫШЫН, КНИГАЖЕ
7 Глава
1 Мунло каҥаш-влак. 25 Вапшышкыже кучышо ӱдырамаш – колымаш деч кочырак.1 Поро лӱм тамлыпушан шергакан ӱй деч сайрак,
колымо кече шочмо кече деч сайрак.
2 Пайрем пӧртыш кайымешке,
лучо колышо еҥ шотышто шортмо пӧртыш каяш.
Вет кажне айдемым тыгай мучаш вуча,
кӧ ила – тек тидым ушышто куча.
3 Ойгырымаш воштылмаш деч сайрак,
вет шӱлыкан чурий годым шӱм лиеш порырак.
4 Мунлын шӱмжӧ – шортмо пӧртыштӧ,
а ушдымын шӱмжӧ – веселитлыме пӧртыштӧ.
5 Ушдымо-влакын мурыштым колыштмешке,
лучо мунло еҥын шылталымыжым колышташ,
6 вет ушдымо-влакын воштылмышт
под йымалне йӱлышӧ иман вондерын чодыртатымыж дене иктак.
Тидат – чыла арам!
7 Шыгыремдымылан кӧра мунло еҥ ушдымыш савырна,
взятке деч шӱм-чон пужла.
8 Мучаш тӱҥалтыш деч сайрак,
да чытышан еҥ кугешныше деч сайрак.
9 Ит вашке шыдешкаш,
вет шыде ушдымо-влакын шӱмыштышт пыжашым ышта.
10 Ит ойло:
«Молан ончычсо кече-влак кызытсе деч сайрак лийыныт?»,
вет тыгай йодыш мунло огыл.
11 Мунлылык ача деч кодшо пого семынак сай,
ош тӱняште илыше-влаклан тудо пайдам конда.
12 Окса семынак мунлылык арален шога,
но теве мо дене мунлылык шергырак:
тудо шке озажлан илышым конда.
13 Юмын пашаже-влакым ончал:
мом Тудо кадырым ыштен, кӧ кертеш тураҥден?
14 Сайын илыме годым куане,
а ойган кечылаште пален лий:
тидыжымат, тудыжымат Юмо пуэн –
тек Тудын ваштареш айдеме нимом ок керт каласен.
*а15 Тӱрлым ужынам мый арам илыме кечылаштем:
чын ыштыше еҥ чыным ыштенак кола,
а осал айдеме, осалжым ыштен, кужун ила.
16 Ит тӧчӧ утыждене чынле да мунло лияш –
молан тылат шкендым пытараш?
17 Осал пашалан шкендым ит пу, ушдымо ит лий –
молан тылат ӱмыр лугыч колаш?
18 Тиде икымше каҥашым колыштат
да весыжымат от шӱкал гын, тылат сай лиеш,
вет кӧ Юмо деч лӱдеш – пытымаш деч утла.
19 Мунлылык ушан еҥым
оласе лу вуйлатыше деч виянракым ышта.
20 Уке мландымбалне чын ыштыше еҥ, кудо эре порым веле ышта да нигунам сулыкыш ок пуро.21 Шотыш ит нал ойлымо кажне шомакым, уке гын колын кертат, кузе тарзет тыйын нерген осалым ойла.22 А вет шӱметше пала: тый шкежат весе-влак нерген осалым шуко гана ойленат.
23 Чыла тидым мый мунлылык дене тергенам да каласенам: «Тыге мый мунло лиям», но мунлылык мый дечем садак тораште лийын.24 Мо уло, чыла тиде тораште, моткоч келгыште – кӧ тудым муэш?25 Шонен пыштышым мый мунлылык ден ыҥлымашым умылаш, нуным шымлаш да муаш, да пален нальым: осал еҥ-влак окмак улыт, шонен моштыдымо-влак – ушдымо.
26 Теве мом мый пален нальым:
колымаш деч кочырак тугай ӱдырамаш,
кудыжо – пуйто оптыш,
шӱмжӧ тудын – шӧрга, кидше – кепшыл.
Юмылан келшыше еҥ тудын деч утла,
а сулыканым тудо куча.
27 Теве мом пален нальым, – каласыш мунло туныктышо. – Иктыш весым ешарен, мый умылтарымашым муым.28 А мом мыйын чонем кычале, шым му. Тӱжем еҥ коклаште мый ик пӧръеҥым муым, а ӱдырамашым иктымат шым му.29 Лач тидым умылышым: Юмо айдемым чын корно дене коштшым ыштен, но еҥ-влак утыждене шукым шонен лукташ тӱҥалыныт.
*а 7:14 «Тудын ваштареш айдеме нимом ок керт каласен»: тидым «айдеме тудын деч вара мо лийшашым ок пале» манынат умылаш лиеш.
Глава 7
