Библия
Выбрать язык
Книги Ветхого Завета
Книги Нового Завета
с русским текстом
ЧЫЛА МУРЫЛАН МУРО
4 Глава
1 Каче шке таҥжын мотор улмыж нерген ойла. 8 «Шӱмбелем, каена мый денем!»1 «Мотор улат, йӧратымем, улат сӧрале!
Чурий леведыш вошт шинчат коеш кӧгӧрчен гай,
ӱпетше – Галаад курык гыч волышо каза кӱтӱ гай.
2 Пӱетше – мушмо да тӱредме шорык кӱтӱ гай,
кажныжын йыгыр пелашыже уло,
нунын коклаште шкет кодшо уке.
3 Тӱрвет – ал тасма гай,
умшат тыйын чатка.
Шӱргыначкатше – гранат саска гай,
чурий леведыш вошт тудо коеш.
4 Шӱетше – саргураллан чоҥымо Давидын башньыж гай,
тӱжем авыртыш тушто кеча,
нуно сарзе-влакын авыртышышт улыт.
5 Кок чызет – пуйто кок самырык пӱчӧ,
лилий-влак коклаште коштшо йыгыр ирказа.
6 Юалге кас мардеж лекмешке да ӱмыл йоммешке,
мый мирра курыкыш да ладын чоҥгашке каем.
7 Йӧратымем, улат чатка тый пӱтынек,
ик экшыкат уке ӱмбалнет!
8 Шӱмбелем, каена мый денем, каена Ливан гыч!
Воло Амана курык вуй гыч,
Сенир ден Ермон курык вуй гыч,
левын пыжашыж деч,
леопардын илыме курыкшо гыч!
9 Шӱжарем, шӱмбелем, шӱмем савыренат!
Шӱйысӧ шеретым ужмо денак,
ик ончалтышет дене мыйым сымыстаренат.
10 Шӱжарем, шӱмбелем,
могай ямле йӧратымашет!
Йошкар арака деч тудо мыняр пачаш сайрак,
шӱрымӧ ӱетын пушыжат чыла тамлыпуш деч сайрак!
11 Шӱмбелем, тӱрвет гыч караш мӱй чыпча,
шупшалметше мӱй да шӧр гай тамле,
Ливан кедрын тамлыпушыжо вургемет деч шарла.
12 Шӱжарем, шӱмбелем,
тый тӱкылен шындыме сад,
леведме таве, печать дене петырыме памаш улат!
13 Кушкыт тиде садыште гранат,
тӱрлӧ чапле саска, нард ден хна.
14 Тушто – нард ден шафран, аир ден корице,
тамлыпушан тӱрлӧ пушеҥге, мирра ден алой,
эн сай тамлыпушан кушкыл-влак.
15 Улат тый садысе памаш – йоргыктышо вӱдан таве,
йогынжо Ливан курык гыч толеш».
16 «Кынел, йӱдвелысе мардеж!
Тол, кечывалвел мардеж!
Пуалза сад ӱмбакем, тамле пушыжым шарыза!
Тек йӧратыме качем шке садышкыже толеш
да чапле саскажым кочкеш».
Глава 4
