Выбрать язык
Книги Ветхого Завета
Книги Нового Завета
с русским текстом1 Озий кугыжан колымо ийын мый Господьым ужынам – Тудо кӱкшӧ, кӱш нӧлталме престолышто шинчен, Тудын вургем урвалтыже уло храмым темен.2 Тудын йыр серафим-влак*а шогеныт, кажныжын куд шулдыржо лийын: кокыт дене чурийыштым петыреныт, кокыт дене – йолыштым, а кокытшо дене чоҥештылыныт.3 Нуно икте-весыштлан кугу йӱкын ойленыт:
«Святой, святой, святой улеш Господь Саваоф!
Тудын чапше дене пӱтынь мланде темын!»
4 Кычкырыше-влакын йӱкышт деч омса янак чытырен, да пӧрт шикш дене темын.5 Мый каласенам:
«Ойго мылам! Мыланем мучаш!
Вет мый ару огыл умшан улам
да ару огыл умшан калык коклаште илем,
да мыйын шинчам Кугыжам, Господь Саваофым, ужын».
6 Тунам мый декем серафим-влак кокла гыч иктыже чоҥештен толын. Кидыштыже йӱлышӧ тулшол лийын, тудыжым шипши дене жертвенник гыч налын.7 Тиде тулшол дене тудо мыйын умшам деке тӱкнен да каласен: «Теве тиде тыйын умшат дек тӱкныш – тыйын титакет кораҥдыме, сулыкет кудалтыме».
8 Вара мый Господьын ойлымыжым колынам: «Кӧм Мыланем колташ? Кӧ Мемнан уверзына лиеш?» Тунам мый каласенам: «Теве мый, колто мыйым».9 Тудо ойлен: «Кай да тиде калыклан каласе:
”Пылыш дене колыштыда, но огыда умыло,
шинча дене ончеда, но огыда уж”.
10 Тунам тиде калыкын шӱмжӧ пешкыдемеш,
пылышыже пыкше колеш,
шинчажым тудо кума.
Сандене шинчаж дене огеш уж,
пылышыж дене огеш кол,
шӱмжӧ дене огеш умыло,
Мылам тудым паремдаш манын, Мый декем огеш савырне».
11 Мый йодынам: «Тиде эше мыняр шуйна, Господь?» Тудо вашештен:
«Ола-влак пустаҥыт,
тушто илыше-шамыч пытат,
пӧрт-влак еҥ деч посна кодыт,
тиде мланде чылт яра лиеш –
тидын марте шуйна.
12 Господь еҥ-влакым умбаке колта,
ты мланде пӱтынек коден кайыме лиеш.
13 Тушто калык деч луымшо ужаш кодеш гынат,
тудат пытарыме лиеш.
Но кузе теревинф пушеҥгым да тумым йӧрыктен шуат,
да нунын деч пундыш кодеш,
тугак калык деч кодшо пундыш гыч святой тукым кушкеш».
*а 6:2 Серафим-влак – Юмын престолжо пелен улшо Суксо-влак.
Глава 6