Библия
Выбрать язык
Книги Ветхого Завета
Книги Нового Завета
с русским текстом
ПРОРОК ИСАИЙЫН КНИГАЖЕ
9 Глава
1 «Мыланна аза шочын». 8 Израиль кугыжанышлан ойго толеш.1 Завулон мланде ден Неффалим мланде
ончыч ӱлыкшемдыме лийыныт,
но теҥыз деке кайыме корно,
Иордан вес вел кундем,
йот калык-влакын Галилей мландышт ончыкшым чапланат.
2 Пычкемыште коштшо калык кугу волгыдым ужеш,
колымаш ӱмылан мландыште илыше-влаклан
волгыдо волгалтеш.
3 Тый калыкым шукемдет,
тудын куанжым кугемдет.
Кузе тӱредме жап годым йывыртат
да сарыште руалтен налмым пайлыме годым куанат,
туге нуно Тыйын ончылнет веселитлаш тӱҥалыт.
4 Вет вачыштым темдыше неле омытам,
тупыштым кырыше тоям,
шыгыремдылшын пондыжым
Тый Мадиамым кырен шалатыме кечысе семын шалатенат.
5 Сӧйыштӧ лийше кажне йолчием,
вӱр дене амыргыше чыла вургем йӱлалтыме лийыт,
туллан нуно лийыт кочкыш.
6 Вет мыланна аза шочын,
мыланна Эрге пуалтын!
Тудын вачыштыже – кучемвий,
Тудын лӱмжӧ:
*а Ӧрыктарыше, Каҥашпуышо,
Виян Юмо, Курымаш Ача, Тынысын Онжо.
7 Тудын кучемвийжылан, тыныслыкын шукеммыжлан
ок лий мучаш –
Тудо Давидын престолыштыжо кугыжанышыжым вуйлата,
чынлык да чын ыштымаш дене тудым
курым-курымешлан пеҥгыдемда, чоткыдым ышта.
Господь Саваофын чон йӱлен тыршымыже тидым ышта!
8 Иаков ваштареш Господь шомакым колтен,
Израиль ӱмбаке тудо толын.
9 Пален налын тудым уло калык –
Ефрем, Самарийыште илыше-влак, –
кӧмыт кугешнен, тырга шӱм-чон дене ойленыт:
10 «Кермыч пырдыж сӱмырлен –
ме тудым руымо кӱ дене угыч нӧлталына,
ир смоква пушеҥге гыч чоҥымым шалатеныт –
тудым кедр дене вашталтена».
11 Господь нунын ваштареш Рецинын тушманже-влакым таратен,
тушманле калык-шамычым нӧлталын:
12 эрвел гыч – сириян-влакым,
касвел гыч – филистим-шамычым.
Опкын семын нуно Израильым пӧжгеныт!
Но тунамат Господьын шыдыже лушкен огыл,
кидше Тудын эшеат нӧлталме лийын.
13 Но калык тудым Кырыше дек савырнен огыл,
Господь Саваофым кычалын огыл.
14 Тунам Господь ик кечыштак Израильын вуй ден почшым,
пальме укш ден омыжшым руал кудалтен.
15 Вуй – тиде кугурак-влак ден лӱмлӧ еҥ-влак,
а поч – шояклан туныктышо пророк-шамыч.
16 Тиде калыкын вуйлатышыже-влак нуным йомын коштыктеныт,
вӱден наҥгайыме еҥже-шамыч корным йомдареныт,
17 сандене Господь нунын рвезыштлан куанен огыл,
тулык йоча ден тулык ватыштым чаманен огыл.
Вет чыланат Юмым шотлыдымо да осалым ыштыше лийыныт,
умшашт йырныкым ойлен.
Но тунамат Господьын шыдыже лушкен огыл,
Тудын кидше эшеат нӧлталме лийын.
18 Тул семын йӱла осаллык:
пытара коршаҥге ден иман вондерым,
йӱлалта сип чодырам –
шикш меҥге-влак кӱшкӧ нӧлталтыт.
19 Господь Саваофын кугу шыдыже мландым когарта:
калык лиеш туллан кочкыш,
ок чамане айдеме шке иза-шольыжым.
20 Пурла велне руалтен пӧжгат – кодыт шужышо,
шола велне кочкыт – огыт лий темше.
Кажне айдеме кочкаш тӱҥалеш кид чогашылжым.
21 Пӧжга Манассий Ефремым,
Ефрем – Манассийым,
коктын пырля – Иудам.
Но тунамат Господьын шыдыже ок лушко,
Тудын кидше эшеат нӧлталме лиеш.
*а 9:6 Септуагинтыште (Тошто Сугыньым акрет грек йылмыш кусарымаште) да черке-славян кусарымаште тышке эше «Кугу каҥашын Суксыжо» манмым ешарыме.
Глава 9
