Библия
Выбрать язык
Книги Ветхого Завета
Книги Нового Завета
с русским текстом
ПРОРОК ИСАИЙЫН КНИГАЖЕ
56 Глава
1 Господь шке калыкше деке весе-влакымат уша. 9 Израильым вуйлатыше-влак сокыр да ушдымо улыт.1 Тыге ойла Господь:
«Чынлык верч шогыза, чын ыштыше лийза!
Вашке Мыйын утарымашем толеш,
вашке Мыйын чынлыкем шукталтеш.
2 Пиалан тудо еҥ, кӧ чыным ышта,
тугай айдеме, кӧ тидым пеҥгыдын шуктен шога,
кӧ шуматкечым святой кечылан шотла,
осалым ыштыме деч кидшым арала».
3 Тек Господь дек ушнышо йот тукым еҥ ок ойло:
«Господь мыйым шке калыкше деч кораҥда».
Тек евнух ок каласе: «Мый кошкышо пушеҥге улам».
4 Вет Господь тыге ойла:
«Мыйын шуматкечем шуктен шогышо,
Мылам келшышым ойырен налше
да ойпидышемлан ӱшанле улшо евнух-влаклан
5 шке храмыштем да пырдыжем коклаште
Мый чапкӱм да поро лӱмым пӧлеклем.
Тидыже эрге ден ӱдыр-влакан улмо деч сайрак лиеш.
Нунылан Мый курымашле, нигунам йомдымо лӱмым пуэм.
6 Тыгак йот тукым еҥ-влакым, кӧмыт Господь дек ушненыт,
Тудлан служитлат да Тудын лӱмжым йӧратат, Тудлан тарзе улыт,
шуматкечым святой кечылан шотлат
да Мыйын ойпидышемлан ӱшанле улыт –
7 Мый святой курыкышкем кондем,
кумалме пӧртыштем нунылан куаным пуэм.
Йӱлалтен пуымо да моло надырым
нуно Мыйын жертвенникышкем кондат,
надырышт-влак Мылам келшыше лийыт.
Мыйын пӧртем чыла калык-влакын кумалме пӧртышт лиеш».
8 Шалатен колтымо израиль эрге-влакым погышо Господь Юмо тыге ойла:
«Нунын деке Мый эше весе-влакымат погаш тӱҥалам».
9 Ир мландысе чыла янлык, толза!
Чодырасе чыла янлык, толза да кочса!
10 Израильын оролжо-влак сокыр да ушдымо улыт.
Нуно чыланат оптен моштыдымо кокок
*а пий улыт –
возыныт да нерен кият, малаш йӧратат.
11 Нуно сут, темын кертдыме пий улыт!
Нуно шонен моштыдымо кӱтӱчӧ улыт:
кажныже кая шке корныж дене,
икте кодде, шкаланышт пайдам кычалыт.
12 «Толза, – кычкырат, – йошкар аракам луктам,
теммеш пӱрым йӱына!
Эрласе кечымат эртарена тыгак,
эртарена эше сайрак!»
*а 56:10 Кокок – немой.
Глава 56
