Выбрать язык
Книги Ветхого Завета
Книги Нового Завета
с русским текстом1 Иуда кугыжа Иоакимын,*а Иосий эргын, вуйлаташ тӱҥалмыж годым Иеремийлан Господь деч тыгай шомак лийын.
2 Господь мылам тыге каласен: «Шкаланет омытам ыште, тушан шӱштӱштым йӧнештаре да нуным шӱйышкет чикте.3 Вара тыгайымак Идумей ден Моавын кугыжаштлан, Аммон эрге-влакын кугыжаштлан, Тир ден Сидонын кугыжаштлан уверзышт-влак дене колто – нунышт Иуда кугыжа Седекий деке Иерусалимыш толыныт.4 Тек нуно озаштлан, шке кугыжашт-влаклан, тыге каласат: ”Господь Саваоф, Израильын Юмыжо, тыге ойла:5 Кугу куатем дене, нӧлталме кидем дене Мый мландым, тыгак тушто илыше айдеме ден янлык-влакым ыштенам. Тудым Мый кӧлан шонем, тудлан пуэм.6 Кызыт Мый чыла нине мландым Навуходоносор тарземын, Вавилон кугыжан, кидышкыже пуэм. Эсогыл янлык-влак тудым колышташ тӱҥалыт.7 Чыла калык Навуходоносорын, тудын эргыжын да уныкажын кулжо лиеш. Вара тудын мландыжланат жап шуэш, да шуко калык ден кугу кугыжа-влак тудым кулыш савырат.
8 Иктаж-могай калык але кугыжаныш Вавилон кугыжа Навуходоносорын кулжо лияш ок келше, тудын омытажым шӱйышкыжӧ чикташ ок пу гын, Мый тыгай калыкым керде, шужымаш да шучко чер дене наказатлем, – ойла Господь, – кугыжан кидше дене нуным пытарем.9 Пророк, мужедше, омо гоч шинчанужшо, колышын чонжым ӱжын лукшо да юзо-влакдам ида колышт. Нуно тыланда ойлат: ”Те Вавилон кугыжан кулжо огыда лий”.10 Тендам шке мландыда гыч торашке колташ манын, нуно тыланда шоя пророк шомакым ойлат. Мый тендам тышечын поктен колтем, да те пытеда.11 А кудо калык Вавилон кугыжан омытажым шке шӱйышкыжӧ чикташ пуа да тудын кулжо лиеш, тыгайым Мый шке мландыштыжак кодем, – ойла Господь. – Тудо тушто илаш да ты мландым курал-ӱдаш тӱҥалеш”».
12 Чыла нине шомакым мый Иуда кугыжа Седекийлан ойленам: «Вавилон кугыжан омытажым шӱйышкыда чикташ пуыза! Тудын да калыкшын кулжо лийза – тунам илаш тӱҥалыда!13 Молан тылат да калыкетлан керде, шужымаш да шучко чер деч колаш? Вет Вавилон кугыжан кулжо лияш тореш лийше кажне калык дене Господь тыге лиеш манын шижтарен ойлен.14 Пророк-влакын ”Вавилон кугыжан кулжо огыда лий” манын ойлымыштым ида колышт, вет нуно тыланда шояк пророк шомакым кутырат.15 ”Мый нуным колтен омыл, – ойла Господь, – нуно Мыйын лӱмем дене шоякым пророклен кутырат. Нуным колыштыда гын, Мый тендам поктен колтем, да те пытеда – те шкежат да тыланда пророкла ойлышо пророк-влакат!”»
16 Вара мый иерей-влак ден уло калыклан каласенам: «Господь тыге ойла: ида колышт пророк-влакдам, кӧмыт тыланда ”Господьын пӧртысӧ ате-ӱзгар Вавилон гыч вашке пӧртылтымӧ лиеш” манын ойлат. Нуно тыланда шоякым увертарат.17 Ида колышт нуным, Вавилон кугыжан кулжо лийза – тунам илаш тӱҥалыда! Молан тиде олам шаланымашке шукташ?18 Нуно пророк улыт да Господьын шомакше нунын дене гын, Господьын пӧртыштыжӧ, Иуда кугыжан пӧртыштыжӧ да Иерусалимыште кодшо ате-ӱзгар Вавилоныш наҥгайыме ынже лий манын, тек Господь Саваоф деч сӧрвалат.19 Вет колонно, ”теҥыз” манын лӱмдымӧ чан, той орва да моло ӱзгар шотышто Господь Саваоф тыге ойла – нунышт эше тиде олаштак улыт,20 Иуда кугыжа Иехонийым, Иоаким эргым, Иуда мланде ден Иерусалимын тӧраже-влакым Иерусалим гыч Вавилоныш наҥгайымыж годым Вавилон кугыжа Навуходоносор нине ӱзгарым пеленже налын огыл, –21 тыге ойла Господь Саваоф, Израильын Юмыжо, Господьын пӧртыштыжӧ, Иуда кугыжан пӧртыштыжӧ да Иерусалимыште кодшо ате-ӱзгар шотышто:22 ”Тудым Вавилоныш наҥгаят, – ойла Господь. – Пӧртылташ шонымешкем, тудо тушанак кодеш. Тиде жап шумеке, Мый тудым налам да тиде верыш пӧртылтем”».
*а 27:1 Тыште, очыни, Седекий кугыжа нерген ойлалтеш.
Глава 27